MONDAY REPORT – AUGUST 4, 2025

 

MONDAY REPORT – AUGUST 4, 2025

 

[INTRO]

 

NEWSCASTER 1: Isang masaya at produktibong umaga, Bayambang! Ako po si Valentine Garcia dela Cruz.

 

NEWSCASTER 2: At ako naman po si Drey Galsim, at kami ay mula sa Tanggapan ng Tagapangasiwa ng Bayan.  Handog namin ang mga balitang sumasalamin sa bayang progresibo.

 

NEWSCASTER 1: Sama-sama nating sulyapan ang mga kwentong nagpapakita ng malasakit at aksyon.

 

NEWSCASTER 2: Ito ang inyong lingguhang ka-partner sa impormasyon…

 

SABAY: Ang… BayambangueNews!

 

***

 

[SALITAN NA KAYO RITO]

 

1.     Relief Operations, Nagpatuloy

A. Naging puspusan ang rescue and relief operations ng MDRRMC-Bayambang sa gitna na malawakang pagbaha, lalo na sa mga mabababang barangay. Nagtulung-tulong ang miyembro ng Quick Response Team upang makapaghatid ng relief goods sa mga binuksang evacuation center.

 

B. Nagmigay naman ng libreng checkup, prophylaxis, at bitamina ang mga RHU sa mga apektadong indibidwal.

 

C. Nagkusang-loob naman ang lahat ng mga opisyal at iba't ibang pribadong grupo sa paghahatid ng karagdagang tulong sa mga lubhang nasalanta, kaya’t buhay na buhay ang bayanihan at pagiging madiskarte sa bayan ng Bayambang.

 

2.     Pamilyang Nasunugan sa Bical Sur, Tinulungan

Isang pamilyang nasunugan sa Brgy. Bical Sur noong July 20 ang hinatiran ng tulong ng LGU. Matapos apulain ng BFP ang sunog, nagtungo ang MDRRMO para mag-rapid damage assessment, at namigay naman ang MSWDO ng relief packs at financial aid. Inaabisuhan ang publiko na patuloy na mag-ingat at maging mapagmatyag, dahil hindi komo maulan o may bagyo ay hindi na masusunugan.

 

3.     Declogging Operation, Isinagawa sa Zone IV

Matapos mag-ulat ang isang insidente ng oil spill sa drainage ng Zone IV, agad itong pinuntahan ng ESWMO at agad ding nagsagawa ng declogging operation ang Engineering Office at ang barangay council, kasama ang BFP noong July 26. Patuloy na mino-monitor ng mga kinauukulan ang lugar. Tinitiyak na pananagutin sa batas ang sinumang may kagagawan nito. Pinaalalahanan naman ang lahat na labag sa batas ang di maayos na pagtatapon ng hazardous waste.    

 

4.     Mayor Niña, May Pasabog sa Flag Ceremony!

 

A. Noong July, sinurpresa ni Mayor Niña ang mga kawani ng LGU-Bayambang sa kanyang unang personal na pagdalo sa flag ceremony matapos ang ilang buwan. Sa kanyang talumpati, inanunsyo niya ang pagdodonate ng pamilya ng isang milyong pisong tulong sa mga nasalantang magsasaka.

 

B. Matapos siyang magpasalamat sa lahat ng naging responders at volunteers na tumulong sa rescue and relief operations, siya ay nanawagan sa publiko na pairalin ang disiplina, partikular na sa tamang pagtatapon ng basura upang maiwasan ang pagbara sa mga imburnal.

 

C. Inanunsyo rin niya ang pagsasampa ng kaso laban sa mga may illegal jumper connections sa 17 barangays at tulong para sa reconnection fees ng mga naputulang streetlights.

 

5.     Mga Kapitan, Pinulong ukol sa Calamity Fund

Noong July 24, pinulong ng LGU ang mga Punong Barangay sa Pinoy Workers Center upang talakayin ang tamang proseso ng paglalabas ng Calamity Fund at Quick Response Fund, kasunod ng deklarasyon ng State of Calamity. Nilinaw rin sa pulong ang mga isyu sa ayuda mula sa MSWDO at replacement project ng MDRRMO para sa mga barangay na may generator set.

 

6.     Korean Volunteers, Nakipag-ugnayan sa LGU

Noong July 28, bumisita ang Asez Wao, isang international youth volunteer group, sa LGU-Bayambang upang mag-alok ng kanilang mga serbisyo para sa mga programang pangkalinisan at iba pang aktibidad. Bitbit nila ang kanilang “Plastic Free Challenge 2040” campaign at nagpasimula rin ang mga ito ng isang signature drive para sa kalikasan.

 

7.     Task Force Disiplina Members, Nag-seminar

Noong July 28, sumabak sa isang orientation-seminar ang lahat ng miyembro ng Task Force Disiplina, sa pangunguna ni Dr. Cezar Quiambao. Bahagi ng seminar ang mga lektyur sa courtesy, discipline, at physical conditioning bilang paghahanda sa implementasyon ng Disiplina Zones sa Agosto 1.

 

8.     TODA Members, Pinulong ukol sa Disiplina Zone

Noong July 28, pinulong ang mga miyembro ng TODA bilang bahagi ng paghahanda sa pagpapatupad ng Disiplina Zones sa bayan. Dito ay tinalakay ang mga patakaran at dininig ang mga saloobin ng mga tsuper. Inanunsyo rin ang pamamahagi ng libreng uniporme para sa mga TODA members mula kina SATOM Cezar Quiambao, Board Member Raul Sabangan, at Concilor Zerex Terrado.

 

9.     ₱1M Donasyon, Inihandog sa mga Magsasaka

Nagbigay ng isang milyong pisong tulong noong Julyo 28 ang pamilya Quiambao-Jose para sa mga nasalantang magsasaka ng Bayambang, sa pamamagitan ng Niña Cares Foundation. Ang MAO ang mangunguna sa pagtukoy ng mga benepisyaryo ng ayuda.

 

10. 51st Nutrition Month Celebration, Naging Matagumpay

 

A.    Senior Citizens, Sumali sa Nutri-Bingo

Noong July 28, nagdaos ang mga RHU at ng MNAO ng isang katuwaang bingo game para sa mga senior citizen at PWD bilang parte ng Nutrition Month celebration. Bukod sa kasiyahan, tampok dito ang mga lektyur sa tamang nutrisyon at kausugan at libreng lab tests para sa kalusugan.

 

B.     Mayor Niña, Nagbigay ng Bigas

Kasabay nito, namigay si Mayor Niña ng surpresang tig-sampung kilong bigas sa lahat ng mga lumahok sa nasabing aktibidad.

 

C.   MNAO, May Healthy Food Treats Muli

Tuwing Lunes sa buwan ng Hulyo, nagpamahagi ng libreng healthy food treats ang MNAO sa mga kawani ng munisipyo bilang bahagi ng Nutrition Month celebration. Layunin nitong hikayatin ang pagkain ng masusustansyang pagkain sa LGU sa halip na mga junk food.

 

D.    Mga Barangay, Paaralan at CDC, Nakiisa sa Nutrition Month

Sa buong buwan ng Hulyo, nakiisa ang mga barangay at mga paaralan, kabilang ang mga Child Development Center, sa selebrasyon ng 51st National Nutrition Month sa pamamagitan ng iba't ibang aktibidad. May mga nagsagawa ng pagrampa ng mga buntis, Mother's Class graduation, at pamamahagi ng food packs at vitamins, lecture, slogan and poster making contest, nutri-quiz, at cookfest, at iba pa.

 

E.     Culmination Day, Punung-Puno ng Aktibidad

Ang Culmination Day noong July 31 sa Events Center ay naging punung-puno ng masasayang aktibidad. Kabilang dito ang awarding of winners sa Amazing Race Season 2, Search for Nutrition A1 Child, at Search for Most Outstanding BNS; recognition of active donors and sponsors; at ukay-ukay for a cause with live selling and fashion show ng BPRAT; at mayroon pang food fair bilang fund-raising activity.

 

 

11. PNP-Bayambang, Binigyan ng Bahay Kubo

Noong July 25, ipinagkaloob ng Office of the Mayor ang isang bahay kubo na nagkakahalaga ng ₱75,000 sa PNP-Bayambang bilang pansamantalang opisina at pahingahan sa checkpoint sa Brgy. Nalsian Sur. Layunin nitong suportahan ang kapulisan sa kanilang tungkulin lalo na sa panahon ng matinding panahon.

 

12. MDRRMC, Nagsagawa ng RDANA

Isinagawa ng MDRRMC ang Rapid Damage Assessment and Needs Analysis o RDANA noong Hulyo 28 upang agad na matukoy ang lawak ng pinsalang dulot ng mga bagyong Crising, Dante, at Emong kasabay ng habagat. Aabot sa 2,948 na sambahayan o 15,080 na katao ang apektado ng pagbaha sa iba’t ibang barangay.

 

13.  Regional at Provincial RDANA Team, Bumisita

 

Kasunod nito ay ang pagbisita naman ng Region I at probinsya upang magsagawa ng sariling RDANA noong July 29. Kasama ang MDRRMO, sinuri ang lawak ng pinsala at tinukoy ang mga agarang pangangailangan ng mga apektadong barangay upang magsilbing batayan ng mga isusunod na tulong at aksyon ng gobyerno. ‎

 

14. 2 Pasyente, Naipagamot ng MAC

 

Dalawang pasyente ang tinulungan ng Mayor's Action Center at Bayambang Public Safety Office upang maoperahan ng libre. Sila ay sina Aljohn Aquino ng Brgy. Langiran na nagpaopera ng hemorroid sa Region I Medical Center at Samuel Mendoza ng Manambong Norte na nagpa-opera sa puso sa Philippine Heart Center. Patuloy silang inaasistehan ng MAC at BPSO sa kanilang mga follow-up check-up.

 

15. Economic and Infra Sector, Nag-update para sa 2^nd Quarter

 

Noong July 29, pinulong ang lahat ng miyembro ng Economic and Infrastructure Development sector kaugnay ng Bayambang Poverty Reduction Plan 2018-2028 upang mag-update at magmonitor ng mga proyekto at aktibidad na nakahanay para sa naturang sektor para sa second quarter.

 

16. P5M Financial Aid, Tulong sa Nasalantang Farmers

Ang LGU ay nagbigay ng apat na milyong piso bilang tulong sa mga magsasakang naapektuhan ng matinding pag-ulan at pagbaha. Ang apat na milyon ay nagmula sa Calamity Fund, habang ang isang milyon naman ay personal na donasyon ng pamilya Quiambao-Jose. Dumaan sa maingat na assessment at verification process ang 2,500 qualified farmers mula sa Registry System for Basic Sectors in Agriculture.

 

17. Budget Forum, Isinagawa

Sa Budget Forum na idinaos ng Municipal Budget Office noong July 30, tinalakay ang hinggil sa pampinansyal na direksyon ng bayan. Binigyang-diin ang kahalagahan ng maayos na budget preparation process, kabilang ang timeline ng key activities, at ang paghahanda para sa nakatakdang budget hearing, upang masiguro ang organisado at transparent na pamamahala ng pondo ng bayan.

 

18. Iba’t Ibang Isyu, Tinutukan sa ManCom Meeting

Sa ginanap na Management Committee Meeting noong July 30, tinalakay ang mga mahahalagang isyu kaugnay ng operasyon, programa, at serbisyong ibinibigay ng lokal na pamahalaan. Tinukoy sa pulong ang mga suliraning nangangailangan ng agarang aksyon, at mga hakbang tungo sa maayos na paglilikod sa mga Bayambangueño.

 

19.  Task Force Disiplina, Pormal nang Ipatutupad ang Disiplina Zones!

 

Sa unang araw ng Agosto, inilunsad ng LGU ang pagpapatupad ng Disiplina Zones sa bayan ng Bayambang. Sa ilalim ng bagong programang ito, ibayong paiigtingin ng Task Force ang pagpapatupad ng lahat ng mga batas na dapat ay matagal nang sinusunod ng lahat. Dumalo sa formal launching ang lahat ng empleyado ng LGU na na-deputize upang maghuli ng sinumang lumalabag nang walang kinikilingan, bukod pa sa PNP, mga sundalo, at ang Bayambang Public Safety Office. Inaasahan ang pakikiisa ng lahat, dahil sa disiplinadong mamamayan, uunlad ang bayan ng Bayambang!

 

***

 

[OUTRO]

 

NEWSCASTER 1: Dito sa Bayambang, bawat proyekto ay may layuning makapaglingkod nang tapat at may puso.

 

NEWSCASTER 2: At bawat kwento, tagumpay nating lahat bilang isang komunidad.

 

NEWSCASTER 1: Ako pong muli si Valentine dela Cruz Garcia, kasama sa paglalahad ng mga kaganapan sa bayan.

 

NEWSCASTER 2: At ako si Drey Galsim, mula sa Tanggapan ng Tagapangasiwa ng Bayan. Magsama-sama tayong muli para sa susunod na ulat!

 

SABAY: Ito ang… BayambangueNews!