Monday Report - September 29, 2025

 

Monday Report - September 29, 2025

 

 

NEWSCASTER 1: Isang masaya at produktibong umaga, Bayambang!

 

NEWSCASTER 2: Sama-sama nating sulyapan ang mga kwentong nagpapakita ng malasakit at aksyon.

 

NEWSCASTER 3: Ito ang inyong lingguhang ka-partner sa impormasyon.

 

SABAY: ... BayambangueNews!

 

 

***

 

[SALITAN NA KAYO RITO]

 

1. Bayambang, Pasok sa Top 5 Most Business-Friendly Municipalities!

 

Sa unang pagkakataon, napabilang ang bayan ng Bayambang sa Top 5 Most Business-Friendly LGU Awards sa Municipality Level 1 Category nationwide! Ito ay isang mahalagang pagkilala sa business practices, social services, at infrastructure development sa bayan ng Bayambang at ang kontribusyon natin sa ekonomiya ng bansa, partikular na sa pagdami ng investors at pagtaas ng employment rate. Ang patimpalak para sa taong 2024 ay inorganisa ng Philippine Chamber of Commerce and Industry o PCCI.

 

Congratulations, LGU-Bayambang!

 

 

2. LCR Info Drive, Nagpatuloy sa Idong

 

Noong September 17, nagpunta ang LCR sa Idong Elementary School upang magsagawa ng info drive ukol sa tamang pagrerehistro at magbigay ng updates ukol sa PSA memorandum circulars. Dahil dito, mas napalawak pa ang kaalaman ng mga residente roon ukol sa civil registration at nakatulong na maiwasan ang anumang pagkakamali sa mga civil registry records.

 

 

3. LGU, Nakilahok sa Enhanced LDRRMP Training

 

Aktibong sumali ang LGU  sa isang training ukol sa Enhanced Local Disaster Risk Reduction and Management Plan noong September 15-19 sa Dagupan City. Layunin ng training na palakasin ang kaalaman at kakayahan ng mga lokal na pamahalaan sa pagpapatupad ng Local DRRM Plan, kabilang ang prevention and mitigation, preparedness, response, at rehabilitation and recovery. Binigyang-diin din ang tamang paglalaan ng pondo, monitoring, at evaluation.

 

 

4. MDRRMO, Nakilahok sa Rescue March Challenge

 

Lumahok ang MDRRMO-Bayambang sa Rescue March Challenge sa San Carlos City noong September 22, na naglalayong paigtingin ang kahandaan ng local disaster responders. Ipinakita rito ng MDRRMO ang kanilang kakayahan at determinasyon sa mga hamon sa aspetong pisikal, teknikal, at mental, upang mapabuti ang kanilang disaster preparedness.

 

 

5. ESWMO Staff, Naging Malikhain sa Paggamit ng Recyclables

 

Isang staff mula sa ESWMO ang nagpakita ng pagkamalikhain sa pamamagitan ng pag-recycle ng ibinasurang plastic containers para gawing mga dustpan, na magagamit ng mga street sweepers ng departamento. Ang inisyatibang ito ay isang hakbang tungo sa mas eco-friendly na kagawian, sa pamamagitan ng recycling o up-cycling.

 

 

6. Mga NGOs, May Feeding Activity Muli

 

A. Ang Bayambang Matikas Eagles Club at Gabriel Medical Clinic ay nagsponsor ng isang feeding activity at namahagi rin ng bigas sa ilang residente ng Brgy. M.H. Del Pilar.

B. Isa pang feeding activity naman ang muling inisponsor ng Gabriel Medical Clinic at Gabs Pharmacy sa Purok 4, Brgy. Sancagulis para sa 200 undernourished at indigent beneficiaries. Ang mga ito ay isinagawa sa pakikipag-ugnayan sa Nutrition Office.

 

 

7. Mayor Niña, Pinangunahan ang PDRA para sa Bagyong "Nando"

 

A.     Pinangunahan ni Mayor Niña Jose-Quiambao ang isang Pre-Disaster Risk Assessment (PDRA) upang maghanda para sa bagyong "Nando" sa pamamagitan ng Zoom video noong September 21. Tinalakay sa pulong ang mga posibleng epekto ng bagyo, tulad ng pagbaha, at mga hakbang ng iba't ibang departamento at ahensya sa pagtugon at paghahanda.

 

B.     Sa araw ding iyon, nakipag-ugnayan ang MDRRMO sa mga Barangay DRRMC upang palakasin ang paghahanda laban sa posibleng epekto ng Supertyphoon 'Nando.' Nagsagawa sila ng inspeksyon sa mga flood-prone areas upang matiyak ang 24/7 na kahandaan ng mga komite at ang maayos na pamamahala ng mga evacuation center.

 

8. Relief Operations, Isinagawa Bunsod ng Bagyong 'Nando'

 

Sa direktiba rin ni Mayor Niña, agad na kumilos ang Municipal DRRM Council at Barangay DRRM Council members upang magsurvey at magmonitor ng mga nabahang residente at tinamong pinsala at maghatid ng ayuda sa mga tuluyang naapektuhan at nag-evacuate, matapos ang pananalasa ng supertyphoon 'Nando.'  Sa gabi ng September 23, namahagi ang MSWDO ng mga food pack sa mga residente ng Brgy. M.H. Del Pilar, Bongato East, at Bongato West at kinalaunan sa Bry. Tambac, Zone V, Iton, atbp. Nagbigay naman ang mga RHU ng leptospirosis prophylaxis, mga gamot, at bitamina.

 

 

9. Suporta sa Sektor ng Edukasyon, Patuloy

 

Patuloy ang pagbibigay-suporta ni Mayor Niña sa sektor ng edukasyon, sa pamamagitan ng Local School Board (LSB) gamit ang Special Education Fund. Noong September 23, itinurn-over ng LSB ang isang photocopier machine, na may kasamang isang toner cartridge, drum cartridge at printer ink, sa DepEd Bayambang II. Sa kabuuan, ang donasyon ay nagkakahalaga ng P84,160.

 

 

10. LGU at Federated PTA, Nakilahok sa Dayalogo

 

Nakilahok ang LGU at ang Municipal Federated Parents-Teachers Association (MFPTA) sa isang dayalogo ukol sa Basic Education Support and Shared Accountability na inorganisa ng DepEd Schools Division Office I Pangasinan noong September 19 sa Lingayen. Sa dayalogong ito, higit na napalakas ang komunikasyon at ugnayan sa pagitan ng DepEd SDO I Pangasinan at mga pangunahing stakeholders upang mas mapatibay ang implementasyon ng mga programang pang-edukasyon sa buong lalawigan.

 

 

11. 47 Farmers, Nagtapos sa School-on-the-Air Program

 

May 42 na lokal na magsasaka at limang empleyado ng Agriculture Office ang nagsipagtapos sa DA School-on-the-Air Masagana Rice Industry Program, sa graduation ceremony na ginanap sa Calasiao noong September 19. Layunin ng school-on-air program na maipamahagi ang dagdag-kaalaman sa mga magsasaka kahit nasa tahanan o bukid lamang. Kinilala ang MAO bilang pangalawa sa may pinakamaraming grumaduate sa buong rehiyon, at isa sa kanila ang nagtamo ng karangalan.

 

 

12. RHU I at III, Nagdaos din ng Buntis Congress

 

Matapos ang matagumpay na Buntis Congress 2025 ng RHU II, sumunod namang nagdaos ng sariling Buntis Congress ang RHU I at RHU III, upang palawakin ang kaalaman at kakayahan ng mga ina sa tamang pangangalaga sa kanilang sarili at kanilang mga anak. Naging sentro ng programa ang mga lektyur ukol sa prenatal care, kahalagahan ng pagbabakuna para sa proteksyon ng mga sanggol, oral health, at tamang nutrisyon at diet. Kabilang sa naging pakulo ang pagdaos ng Ms. Gandang Buntis 2025 beauty pageant.

 

 

13. 1,026 na Magsasaka, Tumanggap ng Food Assistance

 

Mahigit sa isang libong magsasaka sa Bayambang ang tumanggap ng food assistance sa isinagawang pamamahagi na pinangunahan ng DSWD at Pinoy Workers Partylist, sa pamamagitan ni Board Member Raul Sabangan. Ang mga magsasakang binigyan ng tulong ay yaong mga labis na naapektuhan ng pinakahuling kalamidad.

 

 

14. DOST at Bureau of Plant Industry, Naghandog ng Training sa Onion Farmers

 

Noong Setyembre 24, naghandog ng training ang Forest Products Research and Development Institute  ng DOST katuwang ang Crop Pest Management Division ng Bureau of Plant Industry para sa mga onion farmers at farmers’ cooperatives at farmers' associations ng Bayambang, kung saan ipinakilala ang paggamit ng tinaguriang Bamboo LIQUOR bilang organikong pesticide na makakatulong sa ligtas at sustenableng pagsasaka.

 

 

15. PRDP Sub-Project Pre-Construction Conference, Isinagawa

 

Noong September 24 to 26, ang LGU ay nagsagawa ng isang pre-construction conference para sa nalalapit na implementasyon ng DA-PRDP-World Bank sub-project na "Road Opening and Concreting of San Gabriel II to Pantol Farm-to-Market Road." Sa kumperensyang ito, siniguro na ang lahat ng involved sa sub-project pati na ang contractor nito ay lubos na nauunawaan ang scope of work, implementation schedule, roles and responsibilities, at iba pang technical at administrative concerns ng naturang sub-project.

 

 

16. Social Sector, Nag-update sa BPRAT

 

Ang mga miyembro ng social sector ng LGU ay nagbigay ng update sa Bayambang Poverty Reduction Action Team upang mamonitor kung nasaan na ba ang mga aktibidad at proyekto na nakahanay ayon sa Bayambang Poverty Reduction Plan. Sa pamamagitan ng regular na monitoring ng mga nasabing proyekto at aktibidad, nasisiguro na tuluy-tuloy ang implementasyon ng mga ito tungo sa pagkakapanalo ng Rebolusyon Laban sa Kahirapan.

 

 

17. Mini-Job Fair, May 59 HOTS

 

Isang mini-job fair na inorganisa ng PESO-Bayambang noong September 25 ang dinagsa sa Events Center.

Sa 171 na aplikante na nagparehistro, 59 sa kanila ang hired on the spot.

 

 

18. Bayambang Inter-District Basketball Tournament 2025, Nagsimula Na!

‎

Noong September 27, opisyal nang nagsimula ang Bayambang Inter-District Basketball Tournament 2025 para sa mga kabataan sa Brgy. Bani Covered Court. Tampok sa programa ang makulay na motorcade, Oath of Sportsmanship, Selection of Best Muse, at Ceremonial Toss. Dinaluhan ito ng mga opisyal bilang suporta sa layuning itaguyod ang sportsmanship, talento, at pagkakaisa ng mga kabataan sa pamamagitan ng basketball.

 

 

19. Panibagong Responder para sa Oras ng Sakuna

 

Dahil sa tapat na pamamahala ni Mayor Nina, ang buwis ng taumbayan ay bumabalik din para sa kapakinabangan ng lahat. Noong September 25, nagkaroon ng isang blessing ceremony para sa isa na namang rescue vehicle responder, sa pangunguna ng MDRRMO. Ang bagong responder ay nagkakahalaga ng P2.488 million pesos, at pang-labing-limang responder na ng LGU.

 

 

20. GCash at SEE, Nagpromote ng Cashless Payments Gamit ang Paleng-QR PH

 

Sa kolaborasyon ng Office of Special Economic Enterprises, tinulungan ng GCash ang mga vendor sa public market at mga tricycle driver na magkaroon ng Paleng-QR PH codes na magagamit nila upang tumanggap ng digital payment mula sa kanilang mga mamimili noong September 25. Ang mga QR code ay magagamit ng kanilang mga customer upang magbayad, hindi lamang gamit ang GCash kundi kahit na anong digital payment na kasama sa Paleng-QR PH program. Ang Paleng-QR PH program ay programa ng Bangko Sentral at DILG upang palaganapin ang cashless transactions.

 

 

21. Kasunduan para sa 10MW Solar Plant, Nilagdaan ng CSFirst Green!

 

[Note: MW should be read as mega-watt]

 

Noong September 23, lumagda sa isang 10-megawatt Renewable Energy Supply Agreement ang CENPELCO at CS First Green AID Inc., sa headquarters ng National Electrification Administration, na sinaksihan ni NEA Administrator Antonio Mariano Almeda. Ang proyekto, na itatayo sa bayan ng Bayambang, ay maghahatid ng maaasahan, episyente, at malinis na enerhiya para sa mga residente. Dumalo rin sa seremonya ang mga opisyal mula NEA, CENPELCO, at CSFirst Green na pinangunahan ni Dr. Cezar Quiambao.

 

 

***

 

Bayambang, Dapat Alam Mo! (Tamang Pamamaraan ng Pagtapon ng Basura)

 

Bayambang, dapat alam mo na, upang mapanatiling malinis at maayos ang ating kapaligiran, ipinatutupad ang sumusunod na alituntunin sa pagtatapon ng basura:

 

1. Huwag ibaon sa lupa ang mga diaper at sanitary napkin. Ang mga ginamit na diaper at sanitary napkin ay ilalagay sa sako at isasabit sa lugar na hindi maaabot ng aso.

 

2. Mahigpit na ipinatutupad ang waste segregation sa pinagmumulan:

 

- Ang biodegradable waste ay hindi na kokolektahin. Ito ay dapat itapon sa compost pit, hardin, o sa itinakdang community composting area.

 

3. Ang lahat ng residual waste at special waste (battery, light bulbs, eletronic appliances) ay dadalhin sa MRF o Material Recovery Facility sa Brgy. Telbang para sa tamang pagtatapon.

 

4. Ang mga recyclable waste ay mananatili sa bawat tahanan o dadalhin sa Barangay MRF.

 

5. Huwag magsunog ng basura.

 

6. Huwag magtapon ng basura sa mga bakanteng lote.

 

Dapat alam mo na tayong lahat ay may malaking papel sa kalinisan ng ating bayan.

 

Sama-sama nating isulong ang maayos na pamamahala ng basura tungo sa isang mas malinis at mas ligtas na komunidad.

 

Ang lahat ng ito, Bayambang, ay dapat alam mo!

 

[To video editor: Cite these references as runners or footnotes: D.O.H. Memorandum Circular 2019 # 0054, R.A. 9003, M.O. #18]

 

***

 

[OUTRO]

 

NEWSCASTER 1: Dito sa Bayambang, bawat proyekto ay may layuning makapaglingkod nang tapat at may puso.

NEWSCASTER 2: At bawat kwento, tagumpay nating lahat bilang isang komunidad.

NEWSCASTER 1: Magsama-sama tayong muli sa susunod na ulat!

SABAY: Ito ang… BayambangueNews!