Monday Report – May 5, 2025

 

Monday Report – May 5, 2025

 

[INTRO]

 

NEWSCASTER 1: Magandang Monday morning, Bayambang! Ako po si ___________________.

 

NEWSCASTER 2: At ako naman po si __________, at kami po ay mula sa Municipal Health Office.

 

NEWSCASTER 1: Narito na ang buong puwersa ng LGU-Bayambang...

 

NEWSCASTER 2: Maghahatid sa inyo ng mga maiinit at napapanahong balita...

 

SABAY KAYO: Ito ang…. BayambangueNews!

 

***

 

[SALITAN NA KAYO RITO]

 

Sa ulo ng nagbabagang balita:

 

1. Unang Batch ng Events Management Scholars, Nagtapos

 

Noong April 28, tinanggap ng mga iskolar ang kanilang Certificate of Completion matapos nilang matagumpay na makumpleto ang 14-day course sa Events Manangement na hatid ng Gintong Aral at ng HERO Group. Ang nasabing kurso ay naglalayong bigyang-kaalaman at kasanayan ang mga Bayambangueño sa larangan ng maayos at propesyonal na pamamahala ng anumang uri event.

 

 

2. Provincial at Municipal Veterinarians, Naghandog ng mga Libreng Serbisyo

 

Noong April 29, ang Provincial Veterinary Office ay naghandog ng iba't ibang libreng veterinary services sa Zone VII Covered Court kasama ang veterinary team ng Agriculture Office. Kabilang dito ang libreng konsultasyon, bakuna sa rabies, deworming, vitamins, gamot, at information campaign. May 178 na residente o pet owners ang nag-avail ng mga libreng serbisyo, kabilang ang 305 anti-rabies vaccinations, 321 deworming cases, 90 na treatment, 192 na consultations, at pamamahagi ng 176 vitamin packs.

 

 

3. Dalawang Benepisyaryo, Binigyan ng Kubo

 

Dalawa na namang benepisyaryo ang nabiyayaan ng munting bahay kubo, salamat sa lahat ng bumili ng mga pre-loved items sa mga nakaraang Ukay for a Cause at sa lahat ng sumali sa nakaraang fun run. Sila ay ang PNP CHeckpoint sa Brgy. Wawa at ang pamilya ni Jackielyn Dumlao Castillo ng Brgy. Caturay, na inirekomenda ng MSWDO at DSWD. Nagpapasalamat ang PNP at ang pamilya Castillo sa lahat ng tumulong at nakiisa sa mga naturang fund-raising activities. Natulung-tulong sa turnover ceremony ang Administrator's Office, MSWDO, DSWD, at Engineering Office.

 

 

4. MDRRMC, Pinaigting ang Oplan SumVac

 

Ang MDRRM Council ng Bayambang ay naging alerto para sa Operation SumVac o Summer Vacation 2025. Sa tulong ng MDRRMO, PNP, BFP, mga RHU, BPSO, at mga Barangay DRRM Council, nagsagawa ng mga hakbang upang matiyak ang kaligtasan at kaayusan ng mga mamamayan at mga bisita sa panahon ng tag-init. Kabilang dito ang pagsubaybay sa mga aktibidad sa Ilog Agno, mga resort at iba pang mga pasyalan; pagpapanatili ng maayos na daloy ng trapiko; pagtugon sa pangangailangan ng mga pasahero sa mga terminal; pagpapaigting ng sistema sa pag-uulat ng mga Barangay DRRM Council; at pagpapataas ng police visibility.

 

 

5. Dry Run para sa Temporary Bus Station sa Central School, Isinagawa

 

Noong April 29, isang briefing ang isinagawa para sa mga driver ng bus, UV Express, at jeepney kaugnay ng dry run ng operasyon sa pansamantalang bus station na matatagpuan sa lumang Central School malapit sa Bonifacio Street. Pinangunahan ito ni BPSO Chief Leonardo Solomon upang ipaliwanag ang mga patakaran ng terminal, loading at unloading ng pasahero, at pagpapanatili ng kaayusan at kaligtasan, upang maging maayos ang daloy ng trapiko sa sentro ng bayan.

 

 

6. LGU-Bayambang, Handang-handa na para sa Ligtas at Mapayapang Halalan

 

Bilang bahagi ng pagtiyak sa isang maayos, ligtas, at mapayapang halalan, naging puspusan ang paghahanda ng Lokal na Pamahalaan katuwang ang iba’t ibang ahensya ng gobyerno. Kasama sa mga hakbangin ng LGU ang pagpapatupad ng mahigpit na seguridad sa mga polling precincts, pag-deploy ng karagdagang mga pulis at tanod, at pagbibigay ng impormasyon sa publiko hinggil sa tamang asal sa panahon ng pagboto. Nakahanda rin ang mga emergency response team upang agad na tumugon sa anumang insidente.

 

 

7. 4Ps Sustainability Plan 2024 at 2025, Tinutukan sa MAC Meeting

 

Sa isinagawang pulong ng Municipal Advisory Council (MAC) noong April 29, naging sentro ng usapin ng DSWD Municipal Operations Office ang isinagawang Sustainability Plan para sa 868 benepisyaryong grumaduate o nag-exit mula sa 4Ps noong nakaraang taon. Bukod dito, inilahad din ang panukalang Sustainability Plan 2025 para sa tinatayang 2,803 na graduating at exiting 4Ps household beneficiaries sa darating na Setyembre 2025.

 

 

8. ARTA Requirements ng mga Barangay, Tinalakay sa Pulong

 

Noong April 30, pinulong ng LGU at DILG ang mga departamento upang ipaalam sa lahat ang ukol sa implementasyon ng Anti-Red Tape Authority (ARTA) Advisory No. 2025-009. Ayon sa advisory, ang lahat ng mga Barangay LGU ay kinakailangang magsumite ng sumusunod na mga dokumento hanggang May 31, 2025 sa pamamagitan ng Local Committee on Anti-Red Tape o ARTA Unit ng Barangay: Barangay Citizens’ Charter at Certificate of Compliance, Barangay Client Satisfaction Measurement Report, at Barangay Initial Reengineering Plan.

 

 

***

 

It's Trivia Time!

 

Alam ba ninyo na ang ating tatlong Rural Health Units ay pawang accredited na bilang PhilHealth KONSULTA provider?

 

Kabilang sa mga benepisyo ng pagiging PhilHealth KONSULTA provider ay ang sumusunod:

 

- libreng konsultasyon 

- libreng laboratory/diagnostic tests

- libreng gamot

- at libreng vitamins pa!

 

Kaya't magpaenroll na sa PhilHealth! Isama pa ang lahat ng mga kapamilya, kamag-anak, at kaibigan sa ating mga RHU.

 

Walang bayad dito! Mag-fill out lamang ng PhilHealth Member Registration Form at magdala ng government-issued ID, at ayos na!

 

***

 

[OUTRO]

 

NEWSCASTER 1: At iyan po ang mga balitang nakatutok sa iba't ibang programa at proyekto ng LGU-Bayambang.

 

NEWSCASTER 2: Mga balitang may tatak Total Quality Service.

 

NEWSCASTER 1: Muli, ako po ang inyong lingkod, _________________.

 

NEWSCASTER 2: At ako naman po si _________, mula sa Municipal Health Office.

 

[SABAYANG BIGKAS]: At ito ang... Bayambangueñews!