Sino ba si Cezar Quiambao?

Sino ba si Cezar Quiambao?

Ikalabingpito ng Nobyembre taong 1948 nang ipinanganak si Cezar Terrado Quiambao sa bayan ng Bayambang. Bilang pangalawang anak nina Simplicio at Veronica Quiambao, si Cezar ay unang nangarap na magkaroon ng magandang buhay noong siya ay estudyante pa lamang sa Bayambang Central School. Dala niya ang pangarap na ito hanggang sa makatapos siya sa Bayambang National High School at bitbit niya ito nang lumuwas siya sa Maynila para kumuha ng kursong Business Administration major in Accountancy sa University of the East at Strategic Economic Program sa University of Asia and Pacific.

Ang kanyang paglipad patungo sa Indonesia ay naging malaking hakbang sa pagtupad ni Cezar sa kanyang pangarap. Doon siya nagtrabaho sa loob ng dalawampung taon, at dahil sa kanyang sipag at tyaga, nagtuloy-tuloy ang kanyang pag-asenso hanggang sa makauwi siya ng Pilipinas.

Taong 1994 nang bumalik si Cezar sa kanyang bayang sinilangan. Gamit ang mga kaalaman at kakayahan na inuwi niya mula sa pagta-trabaho sa Indonesia ay sinimulan niya ang programang “Baley Ko, Pawilen Ko, Aroen Ko, Tulungan Ko” kasama ang mga kaklase niya mula sa Batch ’65 ng BNHS. Ang programang ito ay nabuo dahil ang pangarap ni Cezar Quiambao ay hindi lamang para sa kanyang sarili kundi para rin sa buong Bayambang.

Nagsimulang naging konkreto ang mga pangarap ni Cezar nang ipinabato niya ang maputik na daan mula barangay Tanolong  hanggang sa Bical Norte. Ginawa niya ito matapos makarating sa kanya ang reklamo ng mga kaawa-awang guro na nagtitiis maglakad sa putikan araw-araw para makapasok lang sa trabaho. Pagkatapos nito ay sinunod naman niyang proyekto ang pagsasaayos ng daan sa Mangabul.

Nagtuluy-tuloy ang pagtulong ni Cezar Quiambao sa kanyang tahimik na paraan sa mga sumunod pang mga taon. Isa sa mga pinakaimportanteng kanyang nagawa ay ang pagpapa-ayos ng Public Plaza na dati ay masangsang ang amoy at kahiya-hiya sa mga bisita.

Nagtatag rin siya ng College of Information Technology sa PSU-Bayambang noong taong 2000 at ngayon ay kitang-kita na ang dami at ganda ng mga produkto ng kolehiyong ito.

Noong 2004 ay itinatag niya ang Kasama Kita sa Barangay Foundation katulong si ex-Councilor Levin Uy upang tumulong sa mga kabataan at mga walang hanapbuhay sa pamamagitan ng mga training at seminar sa iba't-ibang TESDA-accredited courses at livelihood projects.

Sa kanyang sariling paraan ay unti-unting tinulungan ni Cezar na bumangon ay kanyang minamahal na bayan, ngunit ang progreso sa Bayambang ay totoong nagsimula noong taong 2012 nang kanyang ipatayo ang Royal Mall. Ang Royal Mall, Strategic Alliance Holdings Inc., Land Registration Systems at STRADCOM, na mga negosyo ni Cezar, ang nagbigay ng pondo sa munisipyo na noon ay pinamamahalaan pa ng ibang alkalde dahil sa laki ng tax na ibinabayad nito. Napakalaki ng pondong ibinigay ng mga ito sa munisipyo na kung ginamit sana noon sa makabuluhang proyekto ay nakatulong pa sa pagpapaganda ng buhay ng mga ordinaryong Bayambangueño.

Nang magdiwang ang bayan ng Bayambang ng 400th Year Anniversary ay malaki ang naging papel ni Dr. Cezar Terrado Quiambao. Gamit ang personal niyang ipon ay nagbigay siya ng P25M na pondo sa lokal na pamahalaan upang masungkit ng Bayambang ang Guinness World Record for the longest barbeque grill noong April 4, 2014. Dahil sa lahat ng kanyang suporta sa mga Bayambangueño ay nakilala ng buong mundo ang Bayambang.

Malaking tagumpay at kasiyahan ito para sa bayan, ngunit ito rin ang naging mitsa upang magising siya sa mapait na katotohanan: napag-alaman niya ang korapsyon ng mga namumuno noon sa Bayambang. Libre niyang ibinigay ang mga grill na ginamit sa Kalutan ed Dalan, ngunit nalaman ni Cezar na ibinenta pa ang mga ito sa mga Bayambangueño at ang ibinayad nila ay pinakinabangan ng mga nakaupo sa pwesto sa panahon na iyon.

Ang pangyayaring ito ang nag-udyok sa kanya para siya na mismo ang tumakbo bilang alkalde noong taong 2016. Simula nang siya ay nanalo at naupo sa pwesto kasama si Vice Mayor Raul Sabangan ay naging tuloy-tuloy na ang pag-angat ng Bayambang. Kasama ang buong Team Quiambao-Sabangan ay nilabanan ni Cezar ang korapsyon, kriminalidad at political dynasty, at patuloy pa rin nilang nilalabanan, kasama ang buong LGU Bayambang, ang kahirapan sa pamamagitan ng Bayambang Poverty Reduction Plan.

Ang pangarap na binuo ni Cezar noong siya ay bata pa ay ang pangarap na mag-aangat sa sa bayang pinakamamahal niya. Kaya naman ginagawa at binibigay ni Cezar ang lahat para masiguro na ang bawat kabataan, kababaihan, magsasaka, guro, manggagawa, at kalalakihan sa kanyang bayan ay makakasiguro sa magandang kinabukasan.

Nangarap, nagtrabaho, at ngayon ay tumutulong sa mga Bayambangueño. Ayan si Mayor Cezar Terrado Quiambao.