Editorial (April 2023) - Kakatwang Alinsangan

 Kakatwang Alinsangan

 

Halo-halo, ice cream, fruit shake, at milk tea – ilan lamang ito sa cravings ng lahat sa panahon ng tag-init, pansamantalang solusyon pampawi ng uhaw at panlaban sa nag-iinit na pakiramdam. Pero hanggang kailan nga ba nito kayang labanan ang tindi ng umaapoy na init ng araw?

Ayon sa ulat ng PAGASA, magsisimula ang El Niño sa darating na buwan ng Hulyo at pinangangambahang aabot pa hanggang sa susunod na taon. Subalit, dahil sa pagpailanlang ng heat index sa danger levels na lampas 40, hindi pa man dumarating sa buwan na ito ay napakarami nang naiuulat na kaso ng heat stroke, dry season diseases, pagkahilo at pagkahimatay na sa kasamaang palad ay walang pinipiling edad. Maging ang mga kabataan, lalo na ang mga estudyante, ay walang takas dito. Kung kaya naman ilan sa mga paaralan ang minarapat na ibalik sa modular learning ang kanilang klase at ang iba naman ay nag-adjust na ng oras ng pasok.

Marami ring manggagawa ang umaaray at nagpupuyos ang damdamin dahil bukod sa tagaktak na pawis, at mas mabilis na pagkapagod, mas lalo pa silang nanghihina dahil sa nabubutas na bulsa gawa ng bayarin sa kuryente dahil sa ’di maiwasang paggamit ng cooling devices.

50/50 rin ang kalagayan ng mga magsasaka sa banta ng kakulangan sa tubig sa kanilang irigasyon. Kaya’t takot ang bumabalot sa mga mamamayan sa pag-iisip na baka lalo pang tumaas ang presyo ng mga bilihin lalo na ang gulay, prutas, at bigas kung hindi na sasapat ang produksyon ng mga ito.

Dahil dito, samu’t saring teorya na ang naglipana. May ilang iniisip na nalalapit na ang katapusan ng mundo, may nagsasabing paparating na raw ang panahon ng paghahari ni Satanas, at ang ilan naman ay parusa diumano ng Diyos sa sangkatauhan ang mala-impiyernong sidhi ng init. Subali’t mayroong isang potensyal na dahilan ang hindi mahirap paniwalaan kung bakit natin nararanasan ang kakaibang alinsangan. Ito ay marahil sa hindi maayos na pangangalaga natin sa ating kapaligiran na naging sanhi ng exteme weather conditions. Tunay na walang kinikilalang propesyon, titulo, o antas ng pamumuhay ang kalikasan kung ang bagsik nito’y mararamdaman.

Kaya’t habang may oras pa ay ating ingatan at mahalin ang tahanang ipinagkaloob sa atin ng Maykapal. Ang bunga ng ating pagkukulang ay nariyan na, ngunit mayroon pa rin tayong magagawa. Tayo ay dapat na magkaisa sa pangangalaga ng kalikasan at ingatan at payabungin ang natitirang likas-yaman.

Ito ay ating magagampanan lamang kung mapapanatili nating ligtas ang ating sarili. Kaya’t huwag kalimutang uminom ng sapat at malinis na tubig, magdala ng panangga sa sinag ng araw, at magpakonsulta sa duktor kung kinakailangan. Samantala, sabay-sabay tayong manalangin na maalpasan ang pagsubok ng kakatwang init at nawa’y dumating na sa lalong madaling panahon ang muling pagbuhos ng ulan, kasabay ng pagbulusok pababa ng temperatura at paghupa ng mga agam-agam.