Editorial - July 2021 - Isang Masustansiyang Buwan!

“Isa sa pinakamalaking sanhi ng kahirapan sa bayan ay ang pagkakaroon nito ng sakiting mamamayan.” Ang katotohanang ito ang isa sa pumukaw sa atensyon ng alkalde ng bayan na si Dr. Cezar T. Quiambao nang kanyang inilunsad ang Rebolusyon Laban sa Kahirapan.

Parte ng Rebolusyon ang pagbibigay niya ng pokus sa sektor ng pangkalusugan, lalo na sa nutrisyon, kaya’t binuo niya ang Municipal Nutrition Action Office (MNAO) upang maging daan para masolusyunan ang malnutrisyon na minsa’y naging talamak sa Bayambang.

Tuwing buwan ng Hulyo, ipinagdiriwang ang Nutrition Month kung saan ay mas nalilinawan at nabibigyang-kaalaman ang publiko sa kahalagahan ng opisinang ito at ng mga aktibidad, proyekto at programang isinasagawa nito.

At gaya ng nakasaad sa tema para sa taong 2021 – “Malnutrisyon Patuloy na Labanan, First 1000 Days Tutukan” – mayroon nang programa at aksyon na ginagawa ang MNAO mula sinapupunan pa lamang hanggang sa paglaki ng bata upang masiguro ang hangarin nitong “healthy mommy at healthy baby.”  Ilan dito ay ang 90-Day Dietary Supplementation Program for Pregnant Women at Infant and Young Child Feeding Program na pawang nakapaloob sa Early Childhood Care and Development - First 1000 Days Program ng National Nutrition Council.

Ayon sa pag-aaral ay natuklasan ng mga staff ng MNAO na isa sa pinaka-epektibong paraan upang malabanan ang malnutrisyon ay maisasagawa na sa first 1000 days of life na magsisimula sa pagbubuntis pa lamang. Sa mga naturang programa, mga masusustansyang pagkain gaya ng gulay, prutas, itlog at iba pa ang ipinamimigay sa mga buntis na may mababa, mataas at normal na body mass index o BMI, sa tulong ng National Nutrition Council. Dahil sa pagiging epektibo nito ay ipinagpapatuloy na ng lokal na pamahalaan ang programa gamit ang sariling pondo.

Mga forum naman ukol sa tamang paraan ng pagpapasuso ang madalas na isinasagawa rin ng MNAO sa bawat barangay katuwang ang RHU upang masigurong healthy at nutritionally sound ang mga infant. Ang programang ito na naayon sa Milk Code ay mas pinaigting pa dahil na rin sa COVID-19 pandemic na kung saan ay wala pang bakuna na angkop sa edad ng mga bata at tanging breast milk pa lamang ang first line of defense nila laban sa mga sakit.

Upang mamonitor kung sinu-sino, ilan at nasaan ang mga bata na mas nangangailangan ng agarang suportang pangkalusugan ay nakikipagtulungan sa RHU ang opisina para sa Operation Timbang Plus upang maassess ang nutritional status ng bawat bata. Mayroon ding Checklist for Child Developmental Milestone Assessment na isinasagawa upang makita kung may delay ba sa kanilang development. Lahat ng naassess sa OPT Plus na mga malnourished, underweight, stunted at wasted ay inienrol sa Routine Dietary Supplementation Program for 6-59 Month-Old Children sa loob ng tatlong buwan upang maisailalim sila sa rehabilitasyon upang masiguro ang kanilang recovery.

Sa inisyatibo ng Nutrition Office ay taunan ding nabibigyan ng free weight calibration sa tulong ng Department of Science and Technology ang mga timbangan na ginagamit sa 77 na barangay ng Bayambang upang masiguro na maayos at wasto ang timbangan at maiwasan ang false positive result sa malnutrisyon. Dito ay mapapansin na full support din sa mga barangay ang opisina upang maimprove ang kanilang kagamitan sa pagmomonitor ng kalusugan ng mga bata.

Sila rin ay nagsasagawa ng training para sa mga Barangay Nutrition Scholars (BNS) – na sa ngayon ay 77 na mula sa dating 20 lamang. Ang mga BNS ang nagiging focal person ng bawat barangay, at nagiging daan rin sila upang maapbrubahan ang Nutrition Plan ng kada barangay.

Tuluy-tuloy rin ang kanilang pamimigay ng food packs na naglalaman ng mga gulay at prutas na sariling ani ng ating mga magsasaka sa bayan sa tulong ng Municipal Agriculture Office at Municipal Disaster Risk Reduction and Management Office.  Mayroon ding multivitamins na ibinibigay sa lahat ng batang Bayambangueño, malnourished man o hindi.

Minomonitor at hinihikayat din ng MNAO ang lahat ng mga bakery, retail store, at school canteen na gumamit at magbenta ng mga fortified product para mapanatiling masusustansyang pagkain ang nakukunsumo ng mga Bayambangueño alinsunod sa Food Fortification Act RA 8976.

Lingid sa kaalaman ng nakararami, ito ay ilan lamang sa mga gawain ng MNAO upang itaguyod ang wastong nutrisyon sa ating bayan upang ang lahat ng kabataan ay lumaking malusog at produktibong miyembro ng pamayanan.