MONDAY REPORT – JUNE 29, 2026

 

MONDAY REPORT – JUNE 29, 2026

 

[ENERGY, VOLUME, SMILE]

 

INTRO

1: MAGANDANG ARAW, BAYAMBANG! Ako po si ___________.

2: At ako naman po si _______, at kami ay mula sa Local Civil Registry Office.

1: Narito na ang mga pangunahing balitang sumasalamin sa patuloy na pag-unlad, malasakit, at sama-samang pagkilos ng ating bayan.

2: Mula sa mga proyektong nagbibigay ng bagong pag-asa, hanggang sa mga programang nagsusulong ng kaunlaran at mabuting pamamahala…

1: …Narito naa ang mga balitang nagbibigay ng positibong pagbabago sa buhay ng bawat Bayambangueño.

2: …Mga balitang dapat ninyong malaman ngayong linggo.

1&2: Ito ang… BayambangueNews.

 

1.      Mayor Niña, Nagpamahagi ng Sampung Bahay Kubo

Sampung pamilyang Bayambangueño mula sa iba't ibang barangay ang pinagkalooban ng bagong bahay kubo ni Mayor Niña Jose-Quiambao gamit ang personal na pondo. Bukod sa bahay, tumanggap din ang bawat benepisyaryo ng solar light, solar electric fan, at tig-isang kaban ng bigas. Napuno ng emosyon ang seremonya dahil sa tuwa ng mg benepisyaryo, na umuwing punung-puno ng pasasalamat. Ang mga benepisyaryo ay dumaan sa masusing pagsusuri ng DSWD at MSWDO.

 

2.      Special Notice of Compliance for LPTRP, Iginawad sa LGU!

Isang mahalagang pagkilala ang natanggap ng LGU-Bayambang matapos itong pagkalooban ng Special Notice of Compliance para sa Local Public Transport Route Plan o LPTRP mula sa LTFRB. Ang nasabing pagkilala ay patunay ng pagsunod ng bayan sa mga itinakdang pamantayan para sa mas maayos at episyenteng pampublikong transportasyon. Malaking hakbang ito tungo sa patuloy na modernisasyon ng sistema ng transportasyon sa Bayambang.

 

3.      MDRRMO, Nag-inspeksyon sa 58 Fire Hydrants sa Bayan

Sa direktiba ni Mayor Niña, nagsagawa ang MDRRMO, katuwang ang BFP at Bayambang Water District, ng aktuwal na inspeksyon at pag-testing sa functionality ng 58 fire hydrants sa iba’t ibang bahagi ng bayan noong June 15. Bahagi ng aktibidad ang pagdodokumento, geo-tagging, at pagsubok sa lakas ng buga ng mga fire hydrant upang matiyak ang kahandaan ng mga ito at mapalakas ang kakayahan ng bayan sa mabilis at epektibong pagtugon sa mga insidente ng sunog at iba pang emerhensiya.

 

4.      2Q Social Pension, Ipinamahagi sa Senior Citizens

Ipinamahagi ng MSWDO ang tig-P3,000 na social pension para sa mga kwalipikadong indigent senior citizens sa iba't ibang bahagi ng bayan. May kabuuang 3,091 na mga benepisyaryo ang nakatanggap ng ayuda na naglalayong makatulong sa kanilang pangunahing pangangailangan.

 

5.      Buklat Aklat Year 3, Inilunsad sa Buenlag 1st

Inilunsad sa Barangay Buenlag 1st ang Buklat Aklat Project Year 3 ni Mayor Niña, upang maghatid ng mga aklat at reading exercises para sa mga mag-aaral doon. Sa pamamagitan ng programa, nahihikayat ang mga mag-aaral na paigtingin ang kanilang interes sa pagbabasa at palawakin ang kanilang kaalaman. Tuwang-tuwa ang mga chikiting dahil sila ay nilibre ng McDonald’s meal ni Mayor Nina.

 

6.      KSB Year 9, Dinala sa Ambayat 1st

Pinangunahan ni Mayor Nina ang Komprehensibong Serbisyo sa Bayan Year 9 sa Barangay Ambayat 1st bilang bahagi ng patuloy na paghahatid ng mga serbisyong pangkomunidad sa mga residente ng malalayong barangay. Nakinabang sa programa ang 3,721 na residente sa pamamagitan ng iba't ibang libreng serbisyo, kabilang ang medical at dental services, bakuna sa  hayop, employment services, legal consultation, seeds at seedling distribution, libreng gupit, at marami pang iba. Ang mga benepisyaryo ay nakatipid ng halagang P209,079.

 

7.      Seguridad sa mga Paaralan, Tinutukan sa MADAC-MPOC Meeting

Sa isinagawang ng Joint Quarterly Meeting para sa ikalawang quarter ng 2026 ng Municipal Anti-Drug Abuse Council at Municipal Peace and Order Council, tinutukan ang isyu ukol sa seguridad sa mga paaralan, bunsod ng mga ulat ng insidente ng karahasan sa ibang lugar. Bukod dito, kapansin-pansin naman ang mga magagandang naisakatuparan ng mga miyembro ng MADAC at MPOC para sa kapayapaan at kaayusan, na nagreresulta sa isang progresibong Bayambang.

 

8.      Bayambang, Host ng Meeting DOLE para sa PESO at Job Placement Offices

Noong June 25, idinaos sa Bayambang ang 2nd quarter meeting ng DOLE para sa mga PESO at Job Placement Offices ng DOLE sa buong probinsya ng Pangasinan. Dito ay tinalakay ang mga programa at isyung pang-empleyo, kabuhayan, at labor compliance. Dumalo ang mga kinatawan ng PESO at JPO sa Pangasinan upang palakasin ang koordinasyon at serbisyo para sa mga manggagawa at mga job seeker.

 

9.      Tatlong Pusa mula Animal Shelter Cats, Nagkaroon ng Bagong Fur-Ever Home

 

Ang Bayambang Animal Shelter ay matagumpay na nakapagpa-ampon ng mga stray cats noong June 22 at 23 sa tatlong adoptive parents. Ang mga naturang sheltered cats ay nakatanggap ng anti-rabies vaccination, deworming, at neutering upang masiguro na sila ay healthy at safe alagaan. Dahil dito, nabigyan ng pangalawang pagkakataon ang mga ligaw, inabandona, at napabayaang hayop, at nahanapan ng mga responsible pet owners.

 

10.  Libreng Panganganak sa RHU 1, Nagpatuloy

 

Magandang balita para sa mga buntis na kababaihan sa Bayambang! Matapos ang anim na buwang renovation, muling nagbubukas ang RHU I para sa libreng pagpapaanak ng mga low-risk pregnant mothers na may kumpletong prenatal check-up. Hinihikayat ang mga buntis na ina na makipag-ugnayan sa kanilang barangay health workers o direktang bumisita sa RHU I para sa karagdagang impormasyon.

 

11.  BPC, Matagumpay na Nagdaos ng Unang Commencement Exercises

Isang makasaysayang yugto ang naitala sa Bayambang Polytechnic College matapos nitong idaos ang kauna-unahang Commencement Exercises noong June 25 para sa 91 students. Nagtapos ang may 40 na mag-aaral sa kursong BS Entrepreneurship at 51 naman sa BS Agribusiness, kung saan 55 sa kanila ay kauna-unahang college graduate sa kanilang pamilya, 11 ang 4Ps, at apat ang nagtapos nang may distinction. Naging panauhing pandangal sa okasyon si Dr. Mudjekeewis Santos ng National Academy of Science and Technology.

 

12.  Mobile Blood Donation Drive, Gaganapin sa July 6

Inaanyayahan ng lokal na pamahalaan ang lahat ng kwalipikadong blood donors na makilahok sa Mobile Blood Donation Drive na gaganapin sa July 6 sa Balon Bayambang Events Center. Magsisimula ang aktibidad mula alas-8 ng umaga hanggang alas-3 ng hapon sa pakikipagtulungan ng Philippine Red Cross at Philippine Coconut Authority. Layunin nitong madagdagan ang suplay ng dugo at makatulong sa mga pasyenteng nangangailangan ng agarang pagsasalin ng dugo.

13.  BSWM, Nag-onsite Validation

Nagsagawa ng on-site validation ang Bureau of Soils and Water Management (BSWM) at CR Domingo Construction Inc. para sa itatayong solar-powered irrigation project sa Brgy. San Gabriel 2nd. Inaasahang makapagbibigay ang proyekto ng mas maaasahan at episyenteng suplay ng tubig para sa humigit-kumulang na treinta (30) ektaryang sakahan, na magpapataas ng produktibidad ng mga magsasaka at magpapalakas sa sektor ng agrikultura sa barangay.

14.  38 Donors, Nag-alay ng Dugo sa Mobile Drive

Dalawampu't walong volunteer-donors ang matagumpay na nakapagbigay ng dugo sa Mobile Blood Donation Drive ng RHU III at Region 1 Medical Center na ginanap sa Brgy. Tatarac Covered Court. Mula sa 36 na rehistradong kalahok, 28 ang pumasa sa screening at naging bahagi ng makataong programang naglalayong makapagligtas ng buhay sa pamamagitan ng sapat na suplay ng dugo.

15.  Bayambangueña, Byaheng Global IT Challenge Muli!

Muling itataas ni Dianebrei Mae Estrada ang bandera ng Bayambang at Pilipinas matapos mapabilang sa Team Pilipinas para sa Global IT Challenge for Youth with Disabilities 2026 sa Da Nang, Vietnam sa darating na Oktubre. Sa ika-apat na pagkakataon, kinatawan ng isang tubong Bayambang na si Dianebrei ang bansa sa prestihiyosong patimpalak, patunay ng kanyang natatanging husay sa Information Technology at inspirasyon sa mga kabataang may kapansanan na patuloy na mangarap at magtagumpay.

16.  Medical Mission ng BAIPHIL, Nakatulong sa Maraming Residente

Maraming residente ang nakinabang sa isinagawang medical mission ng BAIPHIL sa pakikipagtulungan ng lokal na pamahalaan at iba pang katuwang na organisasyon. Nagbigay ang programa ng libreng konsultasyon, pagsusuri, at iba pang serbisyong medikal para sa mga mamamayan. Ayon sa mga organizer, umabot sa libu-libong pasyente ang nabigyan ng serbisyong pangkalusugan sa naturang aktibidad.

 

***

[ENERGY, VOLUME, SMILE!]

OUTRO

1: At iyan po ang ilan sa mga mahahalagang balitang ating tinutukan ngayong linggo.

2; Muli, ako po si __________.

1: At ako naman po si _________, mula sa Local Civil Registry Office.

2: Patuloy nating tutukan ang mga programa at proyektong nagbibigay ng positibong pagbabago sa buhay ng bawat Bayambangueño.

1: Hanggang sa susunod na edisyon…

1&2: Ito ang…BayambangueNews!