FLAG CEREMONY; JUNE 1, 2026; 8:00AM; BBEC
To my dear husband, our SATOM, DR.
CEZAR T. QUIAMBAO;
To Vice-Mayor IAN CAMILLE SABANGAN and the
Sangguniang Bayan Members;
To our Municipal Administrator, ATTY. RODELYNN
RAJINI SAGARINO-VIDAD;
Magandang araw sa ating lahat, mga
minamahal kong kabaleyan.
Ngayong umaga, may naisip akong isang
salita na halos araw-araw nating naririnig ngunit marahil ay hindi natin
gaanong napag-iisipan nang malalim.
Ang salitang iyon ay "Upgrade."
Kapag sinabi nating upgrade, kadalasan
ang unang pumapasok sa isip natin ay cellphone. Kapag may bagong modelong
lumabas, gusto nating mag-upgrade. Kapag may bagong sasakyan, mas magandang
bahay, mas mabilis na internet, o kahit bagong level sa mobile games, excited
tayong mag-upgrade.
At wala namang masama doon.
Natural sa tao ang maghangad ng mas
maganda, mas mabilis, at mas maayos.
Pero habang iniisip ko ang salitang
iyon, napatanong ako sa sarili ko:
Paano kaya kung gamitin natin
ang salitang "upgrade" hindi sa mga gamit natin, kundi sa serbisyo
publiko? Hindi sa mga bagay na hawak natin, kundi sa buhay ng mga taong
pinaglilingkuran natin?
Noong 2016, nang magpasya ang aking
asawa na si Dr. Cezar Quiambao na tumakbo bilang Mayor, simple lamang ang aming
pangarap. Hindi naman namin pinangarap na magkaroon ng pinakamagandang
munisipyo sa buong bansa. Hindi rin namin pinangarap na makilala sa social
media. Ang pangarap namin noon ay mas simple ngunit mas mahalaga.
Gusto naming i-upgrade ang
buhay ng bawat Bayambangueño.
At kapag binalikan natin ang ating
naging paglalakbay, masasabi nating malayo na rin ang ating narating.
Naaalala ko noon, wala pang 400 na
empleyado ang ating munisipyo. Ngayon, mahigit 900 na empleyado na ang
nagsisilbi sa iba't ibang tanggapan.
Marami ang nagtatanong kung bakit
nadagdagan. Simple lang ang sagot. Dahil habang lumalaki ang pangangailangan ng
tao, kailangan ding lumaki ang kakayahan ng gobyerno na maglingkod. Kung dati
ay kakaunti ang tumutugon sa napakaraming pangangailangan ng bayan, ngayon ay
mas marami na ang maaaring tumulong. Kung dati ay limitado ang naaabot ng
serbisyo, ngayon ay mas marami nang naaabot. Iyon ay isang uri ng upgrade.
Naalala ko rin noong mga unang taon,
bilang sa daliri ang mga sasakyan ng munisipyo. Kapag may emergency, minsan ay
nagkakaproblema pa kung sino ang unang reresponde.
Ngayon, mayroon na tayong mahigit
tatlumpung sasakyan, rescue units, ambulansya, service vehicles, patrol
vehicles, at iba pang kagamitan. Hindi natin ito binili para lamang magmukhang
moderno. Binili natin ito dahil bawat sasakyan ay may katumbas na buhay na
maaaring maisalba, serbisyong maaaring maihatid, at taong maaaring matulungan. Iyon
ay upgrade.
Kapag nakikita ko ang mga bagong
pasilidad, scholarship programs, mga serbisyong pangkalusugan, mga proyekto sa
agrikultura, turismo, kabuhayan, at edukasyon, alam kong sama-sama nating
naitaas ang antas ng ating bayan.
Ngunit mga kasama, habang
ipinagmamalaki natin ang mga nagawa natin, may isang tanong na gusto kong iwan
sa bawat isa.
Nag-u-upgrade pa ba tayo?
Dahil minsan, ang pinakamalaking
kalaban ng progreso ay hindi kakulangan sa pondo. Hindi kakulangan sa
kagamitan. Hindi kakulangan sa tao. Kundi ang pagiging komportable.
Kapag nasanay tayo sa maganda, minsan
akala natin sapat na iyon. Kapag nasanay tayo sa mga tagumpay ng nakaraan,
minsan nakakalimutan nating may mas maganda pa tayong maaaring marating. Tingnan
ninyo ang cellphone ninyo. Kapag may lumabas na update at hindi ninyo
in-install, darating ang panahon na mabagal na itong gumana. Hindi na
compatible sa mga bagong applications. Minsan nagha-hang pa.
Ganoon din tayo bilang mga
lingkod-bayan. Kapag tumigil tayong matuto, tumigil tayong magbago, at tumigil
tayong maghanap ng mas mahusay na paraan ng paglilingkod, unti-unti rin tayong
mapag-iiwanan.
Kaya nais kong hamunin ang bawat
opisina at departamento.
Sa Treasury, Assessor's Office, Civil
Registrar, Agriculture Office, MSWDO, at lahat ng frontline services, tanungin
natin ang ating sarili:
Mas mabilis ba tayo ngayon
kaysa noong isang taon?
Mas magalang ba tayo ngayon
kaysa dati?
Mas maginhawa ba para sa ating
mga kababayan ang pagkuha ng serbisyo?
Sa Engineering Department, baka
panahon nang tanungin natin kung paano pa natin mapapabilis ang ating pagtugon
sa mga concern ng tao upang hindi na tayo kailangang makita lamang sa Facebook
kapag may reklamo.
Sa MTICAO at mga tanggapan na may
kinalaman sa impormasyon, baka panahon nang pag-isipan kung paano natin mas
mapapalapit ang gobyerno sa mamamayan gamit ang makabagong paraan ng
komunikasyon.
At para sa lahat ng empleyado ng
munisipyo, baka panahon nang tanungin ang ating sarili:
Ano ang bagong kaalaman na
natutunan ko ngayong taon?
Ano ang bagong sistema na
maaari kong gawin para mas gumanda ang serbisyo ko?
Dahil ang totoo, hindi sapat na
upgraded ang ating opisina kung hindi upgraded ang ating mindset.
Ngunit habang hinihikayat ko ang ating
mga kawani na mag-upgrade, nais ko ring hamunin ang ating mga kabaleyan.
Mga minamahal kong kababayan,
mag-upgrade din tayo.
I-upgrade natin ang paraan ng ating
pag-iisip.
I-upgrade natin ang paraan ng ating
pagsusuri.
I-upgrade natin ang ating pagiging
mamamayan.
Minsan kasi, madali nating makita ang
pagkukulang ng gobyerno.
Ngunit nakakalimutan nating tanungin
ang ating sarili kung nagagampanan din ba natin ang ating mga tungkulin. Kapag
may lubak na daan, nagtatanong tayo kung bakit hindi naaayos. At tama naman
iyon. Karapatan ninyong magtanong.
Ngunit sana ay itanong din natin: Nagbabayad
ba tayo ng tamang buwis? Nagbabayad ba tayo ng amilyar? Sumusunod ba tayo sa
mga ordinansa? Dahil ang pondong ginagamit para sa mga proyekto ng bayan ay
hindi nahuhulog mula sa langit. Pinaghahatian natin iyon bilang isang bayan.
At isa pa, sana ay i-upgrade din natin
ang ating paggamit ng social media. Sa panahon ngayon, napakadaling maniwala. Napakadaling
mag-share. Napakadaling magalit. Ngunit hindi lahat ng nakikita natin sa
internet ay totoo.
Kaya bago tayo maniwala, magtanong
muna tayo. Bago tayo magbahagi, magsaliksik muna tayo. Bago tayo humusga,
alamin muna natin ang buong kwento. Dahil sa panahon ngayon, ang critical
thinking ay hindi na luho. Isa na itong pangangailangan.
At sa huli, habang ina-upgrade natin
ang ating sarili, ang ating trabaho, at ang ating bayan, huwag nating
kalimutang i-upgrade din ang ating relasyon sa Panginoon. Dahil anumang
tagumpay ang ating makamit, anumang proyekto ang ating matapos, anumang upgrade
ang ating gawin, kung wala tayong gabay ng Diyos, madali tayong maliligaw.
Mga kabaleyan, ang Bayambang ngayon ay
hindi pareho ng Bayambang noong 2016. At sigurado akong ang Bayambang ng 2030
ay hindi rin dapat kapareho ng Bayambang ngayon.
Kaya ngayong linggong ito, may isa
lamang akong hihilingin sa bawat isa sa atin.Pag-uwi ninyo mamaya, bago kayo
matulog, tanungin ninyo ang inyong sarili:
Ano ang isang bagay na maaari
kong i-upgrade sa aking sarili upang maging mas mabuting empleyado, mas
mabuting mamamayan, mas mabuting magulang, at mas mabuting tao?
Dahil kapag bawat isa sa atin ay
nagdesisyong mag-upgrade, hindi lamang ang ating sarili ang aangat. Aangat ang
ating pamilya. Aangat ang ating bansa. At
higit sa lahat, aangat ang Bayambang na ating mahal.
Muli, magandang umaga, maraming
salamat, at sa Diyos ang lahat ng papuri at parangal. Niñaaro ta kayo!
No comments:
Post a Comment