Monday Report – May 4, 2026

 

Monday Report – May 4, 2026

 

INTRO

Host 1:
Magandang araw, Bayambang! Ako po si ___ ng ____ Office. Narito na naman tayo upang ihatid ang mga pinakabagong balita at mahahalagang impormasyon na dapat ninyong malaman.

Host 2:
At ako naman po si _________ ng _________ Office. …Naghahatid ng tapat, malinaw, at makabuluhang ulat na sumasalamin sa mga kaganapan sa ating komunidad.

Host 1:
Narito kami upang maging inyong gabay sa pag-alam at pag-unawa.

Host 2:

Nag-uugnay, nagpapabatid, at naglilingkod sa bayan.

Both Hosts:
Ito ang… BayambangueNews.

 

1.    International Film Director, Bumisita!

Bumisita ang isang international film director kay Mayor Niña Jose-Quiambao para humingi ng permiso sa pagkuha ng footage sa St. Vincent Ferrer Statue bilang bahagi ng kanyang binubuong global documentary na “In the Shadow of Giants.” Tinalakay ni Burak Akyol, isang Turkish citizen, ang ukol sa permit at drone operations. Inaasahang magdadala ang naturang dokumentaryo ng mas malawak na pagkilala sa Bayambang. Isang world-class exposure para sa bayan.

 

2.    Red Ribbon, Nagbukas ng Branch sa Bayambang!

Nag-courtesy call ang mga opisyal at staff ng Red Ribbon kasabay ng opening ng kanilang branch sa Royal Mall. Buong suporta at pasasalamat naman ang ipinabatid ng lokal na pamahalaan sa naturang bakery chain store.

 

3.    Mga Isyu sa Agrikultura, Tinalakay sa Pulong

Nagtipon ang mga lider ng mga samahang magsasaka upang talakayin ang updates sa Presidential Assistance for Farmers and Fisherfolk Program, paghahanda sa wet season planting, at iba pang usaping agrikultural. Kabilang din sa napag-usapan ang farm machinery inventory at epekto ng pagtaas ng presyo ng gasolina.

 

4.    Philippine Coconut Authority, Nag-Validation Activity sa Managos

Sa tulong ng MCDO, nagsagawa ang Philippine Coconut Authority ng isang validation activity para sa nakatakdang pamamahagi ng coconut seedlings sa mga miyembro ng kooperatiba sa Brgy. Managos, ang Managos Farmers Agriculture Cooperative. Dito ay tiniyak ng PCA na magiging maayos ay distribusyon ng naturang seedlings at mapapalakas ang industriya ng niyog sa lugar.

 

5.    RHU I Dental Clinic, Accredited na ng PHIC!

Opisyal nang kinilala ng Philippine Health Insurance Corporation ang mga dental clinic ng RHU I at RHU II, at ito ay magbibigay-daan upang na makapagbigay ng mga libreng serbisyong dental sa mga residente. Kabilang dito ang cleaning, fluoride treatment, at iba pang preventive care services. Malaking hakbang ito upang mapabuti ang oral health ng komunidad.

 

6.    KALIPI ng Bacnono, Wagi sa Eco Space Competition

Nanguna ang KALIPI members ng Brgy. Bacnono sa Eco Space Competition na isinagawa ng ESWMO bilang parte ng Bali-Balin Bayambang clean-green-and -bloom program. Sinundan ito ng Brgy. Bani at Brgy. Sanlibo batay sa creativity at sustainability ng kanilang entries. Ang patimpalak na ito ay lalong nagpalakas sa pangangalaga sa kalikasan sa pamamagitan ng inobasyon.

 

 

7.    Management Review Meeting, Isinagawa

Isinagawa ang isang Management Review Meeting kung saan tinalakay ng mga departamento ang kanilang ulat kaugnay ng kani-kanilang quality management process at internal quality audit. Isa-isang nagbahagi ang bawat tanggapan ng kanilang accomplishments, mga naging hamon, at nakatakdang solusyon upang mapanatili ang epektibong serbisyo publiko.

 

8.    Mga Senior Citizen, Tumanggap ng Social Pension

Sa pagtutulungan ng Treasury Office at MSWDO, maayos na tumanggap ng kani-kanilang social pension ang mga indigent na senior citizen para sa 1^st quarter noong April 28 at 29. Ang payout activity ay ginanap sa iba’t ibang barangay sa magkahiwalay na araw upang hindi na bumiyahe pa ang mga senior citizen sa sentro ng bayan.

[Note the proper pronunciation of indigent.]

 

9.     Civil Registry Services, Dinala sa Amanperez

Dinala ng LCRO ang kanilang rumurondang mga serbisyo sa Brgy. Amanperez noong April 29, kaya naman mas napadali para sa mga residente ang pag-aayos ng kanilang mahahalagang civil registry documents nang hindi na bumibiyahe. Marami ang nakinabang sa mga serbisyong tulad ng late registration, record correction, at iba pang proseso, habang nabigyan din ng kaalaman ang komunidad tungkol sa kahalagahan ng tamang dokumentasyon.

 

10. BPC Campus Construction Update

Patuloy ang progreso ng ipinatatayong campus at Academic Building ng Bayambang Polytechnic College sa Brgy. Bical Norte. Inaasahang makukumpleto ang konstruksyon ngayong taon, at target na makalipat ang mga mag-aaral sa unang bahagi ng 2027. Libu-libong estudyante ang nakatakdang makinabang sa mas malawak, mas maayos, at world-class na pasilidad dito mismo sa ating bayan.

 

11. Iba’t Ibang Bagong Concerns, Tinalakay sa LSB Meeting

 

Sa ginanap na pulong ng Local School Board noong April 30, pinag-usapan ang ukol sa maintenance and repair activities para sa mga paaralan, Brigada Eskwela, enrolment, Summer Aral program, ang bagong 3-term school calendar, ang request para sa adisyunal na konstruksyon ng classroom building sa Catalino Castañeda Elementary School, at 500 wooden armchairs sa Don Teofilo Mataban Memorial School.

 

12.Isang Dayuhan, Tinulungang Makauwi Matapos Ma-scam

Isang Bangladeshi national ang tinulungan ng LGU Bayambang, matapos siyang mabiktima ng ilegal na recruitment ng kanyang kababayan at maiwang walang trabaho at pera. Sa tulong ng DFA at ni Mayor Nina, naihatid ang beinte-dos (22) anyos na si G. Rakibul Islam sa Embahada ng Bangladesh sa Lungsod ng Makati para sa repatriation at makapagsampa rin ng reklamo laban sa illegal recruiter.

---

BAYAMBANG, DAPAT ALAM MO!

 

Bayambang, dapat alam mo na mayroong bagong batas na magpapabago sa sistema ng pagbili at pagkuha ng serbisyo ng pamahalaan. Ito ay ang Republic Act No. 12009 o ang New Government Procurement Act (NGPA) na nilagdaan noong July 20, 2024.

 

Dapat alam mo rin na hindi na lang “lowest bid” ang basehan ngayon. Sa ilalim ng RA 12009, mas pinapahalagahan na ang quality, efficiency, at long-term value o ang tinatawag na Most Economically Advantageous Responsive Bid (MEARB). Ibig sabihin, hindi lang mura, kundi sulit at dekalidad ang pipiliin.

 

Narito ang ilang mahahalagang pagbabago:

•       Mas maraming procurement modes – tulad ng Direct Acquisition, Competitive Dialogue, at Unsolicited Offers para sa mas flexible at innovative na proyekto

•       Fit-for-purpose approach – hindi na “one-size-fits-all”; pipiliin ang paraan base sa pangangailangan ng proyekto

•       Digitalization – gagamit na ng electronic government procurement system o e-GP, kasama ang e-signatures at online payments

•       Sustainability at inclusivity – isinusulong ang Green Public Procurement at pagbibigay ng pagkakataon sa local at social enterprises

•       Mas maayos na sistema upang maiwasang mag-bid ang deskwalipikadong mga supplier sa pamamagitan ng centralized database

•       Mas maayos na planning, kung saan hinihikayat ang multi-year planning para mas episyente ang paggastos ng pondo ng bayan.

 

Bayambang, dapat alam mo na ang batas na ito ay epektibo na simula pa noong August 13, 2024, at mayroong tatlong (3) taong transition period ang mga ahensya ng gobyerno upang ganap itong maipatupad.

 

Sa kabuuan, nabuo ang RA 12009 upang masigurong ang bawat piso sa kaban ng bayan ay napupunta sa tama at tunay na kapaki-pakinabang na proyekto para sa mamamayan.

 

Bayambang, ang lahat ng ito, ay Dapat Alam Mo!

 

 

***

OUTRO

Host 1:
Maraming salamat sa inyong patuloy na pagtitiwala at pakikinig sa BayambangueNews.

Host 2:
Asahan ninyo na mananatili kaming tapat sa pagbibigay ng mga balitang makabuluhan, napapanahon, at makatutulong sa ating komunidad.

Host 1:
Patuloy tayong magkaisa sa paghubog ng mas maunlad at mas maalam na bayan.

Host 2:
Hanggang sa muli nating pag-uulat, kami ang inyong mga tagapagbalita, _____________ ng _____ Office.

Host 1:

At ____________ ng ___________ Office.

Both Hosts:
At ito ang…. BayambangueNews!