EDITORIAL - November 2025 - Mapagmahal sa Kabataan

 EDITORIAL:

Mapagmahal sa Kabataan

 

Sa bayan ng Bayambang, ang mga kabataan ay hindi lamang itinuturing na “pag-asa ng bayan” — sila ay itinuturing na kasalukuyang puhunan ng kinabukasan. Sa likod ng bawat batang malusog, masigla, at matalino, ay naroon ang matibay dahil mapagkalingang pagsuporta ng Lokal na Pamahalaan ng Bayambang sa pamumuno ni Mayor Niña Jose-Quiambao, kasama ang Sangguniang Bayan.

Mula sa kalusugan at nutrisyon hanggang sa edukasyon, proteksyon, at partisipasyon sa komunidad — hindi matatawaran ang lawak, lalim, at pagkakaiba-iba ng mga serbisyong iniaalok ng LGU para sa kabataan. Lahat ng ito ay isinasakatuparan sa tulong ng nakalaang 1% Children’s Welfare Fund, Special Education Fund (SEF), at iba pang pondo. Bukod pa rito, ang taunang donasyon ni Mayor Niña ng kanyang buong sweldo sa SEF ay patunay ng kanyang personal na malasakit sa edukasyon ng mga batang Bayambangueño.

Sa larangan ng kalusugan, ipinagmamalaki ng bayan ang mga libreng serbisyong gaya ng newborn screening, immunization, Vitamin A supplementation, deworming, iron supplementation, at iba pang medikal, dental, at minor surgical services sa ilalim ng Komprehensibong Serbisyo sa Bayan. Patuloy din ang mga programang tulad ng Supplementary Feeding Program, Nutrition Month activities, at Operation Timbang Plus na layuning maiangat ang antas ng nutrisyon ng mga bata.

Pagdating naman sa edukasyon, masasabing all-out ang suporta ng LGU. Bukod sa pagpapatakbo ng mga Child Development Centers at daycare programs, mayroon ding Stimulation Therapeutic Activity Center na nagbibigay ng libreng therapy sa mga batang may kapansanan. May mga proyektong tulad ng Buklat Aklat literacy project, pamimigay ng school supplies, suporta sa Gulayan sa Paaralan, at libreng kolehiyo sa Bayambang Polytechnic College. Sa mga kabataang nais magkaroon ng karanasan sa trabaho, patuloy din ang SPES, GIP, at OJT programs ng PESO.

Hindi rin nakakalimutan ng LGU ang proteksyon ng kabataan. Sa ilalim ng aktibong Local Council for the Protection of Children (LCPC), isinasagawa ang mga seminar tungkol sa karapatan ng bata, mental health, at teenage pregnancy. May tulong din para sa mga children in conflict with the law, victims of abuse, at mga batang nangangailangan ng tulong legal at psychosocial. Kaakibat pa rito ang mga hakbang para sa kaligtasan gaya ng mga earthquake drill, anti-bullying at anti-drug campaigns, at police visibility sa mga paaralan. Higit sa lahat ay angpaggawa ngmga batas para sa pagsulong sa lahat ng karapatang pambata.

At syempre, hindi rin mawawala ang aspeto ng kasiyahan at partisipasyon sa komunidad. Ang mga kabataan ng Bayambang ay aktibong kalahok sa mga selebrasyon tulad ng Nutrition Month, Tourism Month contests, Little Mr. & Ms. Bayambang, Halloween trick-or-treat, National Children’s Month, Linggo ng Kabataan, at Pamaskong Handog para sa mga batang kapos sa kabuhayan.

Sa kabuuan, malinaw na ang LGU-Bayambang ay hindi lamang nagbibigay ng serbisyo — ito ay nagtataguyod ng isang kultura ng pag-aaruga, oportunidad, at pag-asa. Sa ilalim ng pamumunong may puso at tunay na pagmamahal, ang mga programang ito ay hindi basta proyekto lamang, kundi konkretong pahayag na ang bawat batang Bayambangueño ay mahalaga.

Tunay ngang sa Bayambang, ang kabataan ay hindi nalilimutan — sila ang sentro ng pag-unlad.