MONDAY REPORT - AUGUST 3, 2026

MONDAY REPORT - AUGUST 3, 2026

[Observe proper volume, speed, diction, and don’t forget to smile.]

INTRO

NEWSCASTER 1: Magandang araw, Bayambang! Ako po si ______ mula sa ______ Office.

NEWSCASTER 2: At ako naman po si ______, mula rin sa __________ Office. Narito na ang mga pinakamahahalagang kaganapan sa ating bayan ngayong linggo.

NEWSCASTER 1: Mga programa, proyekto, at aktibidad ng LGU... mga balitang dapat ninyong malaman!

 NEWSCASTER 2: ... Mga kuwentong nagbibigay-inspirasyon sa ating bayan. Ating sabay-sabay na tutukan.

 SABAY: Ito ang… BayambangueNews!

________________________________________

 

1.      ISO QMS Certification, Muling Napanatili ng LGU!

Muling napanatili ng LGU ang ISO 9001:2015 Quality Management System Certification matapos itong makapasa sa external audit noong July 20, matapos walang maitalang major o minor non-conformities sa lahat ng tanggapan. Binigyang-diin ni Mayor Niña na ang ISO ay hindi simpleng sertipiko o tropeyo, kundi isang pangakong isabuhay araw-araw ang de-kalidad, episyente, at maaasahang serbisyo publiko para sa bawat Bayambangueño.

2.      LGU, Nakiisa sa Induction at Coronation Night ng BASC

Noong June 11, nakiisa ang LGU sa Induction of Officers at Coronation Night ng Bayambang Association of Southern California sa Los Angeles City, California, kung saan kinatawan si Mayor Niña nina Municipal Administrator, Atty. Rodelynn Rajini Sagarino-Vidad, at BPC President, Dr. Rafael Saygo. Sa harap ng mahigit dalawang-daang Bayambangueño at iba pang Pangasinense, ibinahagi ang mga programa at proyekto ng bayan at hinikayat ang mga kababayang nasa Amerika na maging katuwang sa patuloy na pag-unlad ng Bayambang sa pamamagitan ng pamumuhunan, pagsuporta sa edukasyon, at iba pang makabuluhang inisyatiba.

3.      3-Day DDRM Course for Public Sector, Nagpatuloy

Sa layong palakasin ang kahandaan at kakayahan ng mga lingkod-bayan sa pagharap sa mga sakuna, muling nagpatuloy ang MDRRMO sa pagbibigay nito ng tatlong araw na Disaster Risk Reduction & Management Course for Public Sector mula July 22 hanggang 24 sa Events Center, sa tulong ng Office of Civil Defense Region I. Sa pagkakataong ito, naging kalahok ang mga opisyal ng barangay sa District 7 at mga bagong department head ng LGU.

4.      KSB Year 9, Nagpatuloy sa San Gabriel 2nd

Muling inilapit ng LGU ang iba't ibang serbisyong publiko sa malalayong barangay sa pamamagitan ng Komprehensibong Serbisyo sa Bayan Year 9 noong July 23 sa San Gabriel 2nd Covered Court. Nakinabang dito ang mga residente ng Brgy. Paragos, San Gabriel 2nd, at Iton at nagpasalamat sa mga libreng serbisyong medikal at dental, legal consultation, financial assistance, bakuna sa hayop, pagproseso ng mga dokumento, employment services, libreng gupit, pamamahagi ng buto at punla, at iba pa.

5.      Bayambang, Nakiisa sa 48th National Disability Rights Week Celebration

Nakiisa ang LGU sa pagdiriwang ng 48th National Disability Rights Week sa pamamagitan ng isang seminar at leadership training para sa PWD leaders. Tinalakay sa programa ang Magna Carta for Persons with Disabilities, isinagawa ang oathtaking ng mga bagong opisyal ng PWD Federation, at pinalakas ang kakayahan ng mga lider upang higit na maisulong ang pantay na karapatan, aktibong partisipasyon, at inklusibong pag-unlad sa bawat barangay.

6.      Polisiya para sa Lokal na Pagmimina at Quarrying, Binalangkas

Nagdaos ang LGU ng isang Technical Working Group Meeting on Mining and Quarrying Activities upang palakasin ang koordinasyon at pagpapatupad ng mga regulasyon sa pagmimina at quarrying sa bayan ng Bayambang. Tinalakay sa pulong ang mga tungkulin ng TWG, monitoring at reporting system, koordinasyon ng mga opisina, at iba pang mekanismong magtitiyak ng responsableng pangangasiwa sa mga aktibidad na may kaugnayan sa pagmimina at quarrying sa Bayambang.

7.      NIA, Nag-inspeksyon para sa Irrigation Project

Nagsagawa ang National Irrigation Administration (NIA)-Central Office, NIA-Region I, at SDS Consultancy ng pinal na site inspection para sa Bayambang Pump Irrigation Project sa Barangay Amancosiling Norte noong July 22, bilang paghahanda sa susunod na yugto ng implementasyon. Inaasahang magbibigay ang proyekto ng mas maaasahang suplay ng irigasyon sa mga sakahan, na magpapataas ng ani, magpapalakas sa kabuhayan ng mga magsasaka, at makatutulong sa food security ng bayan.

8.      Managos Co-op Members, Nagtapos sa Buffalo Production and Management Training

Matagumpay na nakumpleto ng mga kasapi ng Managos Farmers Agriculture Cooperative ang apat na araw na Social Preparation at Buffalo Production and Management Training bilang paghahanda sa pagtanggap ng mga genetically superior carabao sa ilalim ng Philippine Carabao Center Buffalo Production Program. Sa tulong ng PCC at ng LGU, pinalawak ng pagsasanay ang kaalaman ng mga kalahok sa wastong pag-aalaga ng kalabaw at pagpapalakas ng kanilang kooperatiba upang mapabuti ang kabuhayan at kita.

9.      San Gabriel II-to-Pantol Farm-to-Market Road Concreting, Sinimulan!

A. Pinangunahan ni Mayor Niña ang contract signing para sa Road Opening and Concreting of San Gabriel II–Pantol Farm-to-Market Road sa pagitan ng LGU at ng contractor na R.R. Ricafort Construction and Supplies. Ang kontrata ay nagkakahalaga ng mahigit 302 million pesos.  

B. Matapos nito, pormal na sinimulan ang road opening at concreting noong July 24 upang mapadali ang pagbiyahe ng ani ng mga magsasaka, mapababa ang kanilang gastos sa transportasyon, at mapalakas ang kanilang kabuhayan.

10.  LGU CDC, Nagdiwang ng Nutrition Month

Ang Municipal Child Development Center ay nagdaos ng sariling pagdiriwang ng Nutrition Month noong July 28, kung saan ang mga daycare learner ay nagpaligsahan sa Healthy Food Costume Showcase. Mayroon ding Little Chef Cookfest, kung saan sila ay nagtagisan sa tatlong segments: ang Healthy Snacks Making, Healthy Sip, at Healthy Plating contest.

11.  Gawad Parangal, Idinaos sa Pagtatapos ng Nutrition Month

Noong July 29, nagtapos ang pagdiriwang ng Nutrition Month 2026 sa isang gawad parangal para sa lahat ng mga nagwagi sa mga naging patimpalak at sa mga natatanging indibidwal at grupo na nagbigay ng suporta sa programang pangnutrisyon ng pamahalaang bayan. Kabilang sa mga pinarangalan ang mga nanalo sa Search for Nutrition A1 Child Year 9, Baby Crawl Challenge, Search for Outstanding Barangay Nutrition Scholar, Search for Outstanding Barangay Nutrition Committee, Search for Outstanding HAPAG Implementer, Search for Outstanding Schools Nutrition Program Management, mga CSO, NGO, donor, at iba pang partner na buong-pusong sumusuporta sa LGU nutrition programs, at Nutrition Month 2026 Technical Working Group members.

12.  Awarding Ceremony para sa National Disaster Resilience Month, Idinaos

Noong July 30, nagtapos naman ang pagdiriwang ng National Disaster Resiliency Month 2026 sa isang gawad parangal para sa mga nagwagi sa DRRM photo contest. Isinagawa ang aktibidad sa Municipal Museum.

13.  Technical Budget Hearing, Isinagawa

Ang LGU ay nagsagawa ng isang technical budget hearing upang tiyakin ang maayos at episyenteng paglalaan ng pondo para sa mga programa, proyekto, at serbisyong nakapaloob sa Annual Investment Program ng munisipyo. Dinaluhan ito ng mga department head at kinatawan ng iba't ibang tanggapan na nagpresenta ng kani-kanilang panukalang badyet, bilang bahagi ng masusing pagpaplano para sa patuloy na paghahatid ng mahusay na serbisyo publiko.

14.  OSCA, Nakipagpulong ukol sa Panukalang Universal Social Pension for Senior Citizens

Lumahok ang Office of the Senior Citizen Affairs (OSCA) ng Bayambang sa isang Convergence Meeting noong July 24 sa Lingayen upang talakayin ang panukalang Universal Social Pension na naglalayong mabigyan ng social pension ang lahat ng senior citizen anuman ang kanilang kalagayan sa buhay. Ipinaliwanag dito ng DSWD ang kasalukuyang proseso ng pagpili ng mga benepisyaryo sa pamamagitan ng CBMS, PSA verification, at validation ng DSWD at mga katuwang na ahensya.

15.  Natagpuang Cobra, Kaagad Itinurn-over sa Otoridad

Isang juvenile Philippine cobra ang boluntaryong isinuko ni PSMS Vina de Leon ng Bayambang Municipal Police Station sa MENRO matapos itong matagpuan sa kanilang bakuran. Kaagad itong inasikaso at ligtas na itinurn-over sa DENR-CENRO Dagupan noong July 27. Muling pinaalalahanan ang publiko na iulat sa mga awtoridad ang mga wildlife species sa halip na saktan o patayin ang mga ito.

16.  Mayor Niña, Nagdonate ng Dog Food at Gamot

Nagkaloob si Mayor Niña, sa pamamagitan ng Agriculture Office, ng apat na sako ng dog food at mga gamot sa Rescued Paw PH sa Brgy. Pantol, upang makatulong sa pangangalaga sa mga nailigtas na aso at pusa. Bahagi ito ng pagsulong ng LGU sa mga programang nagtataguyod ng animal welfare at pagsuporta sa mga indibidwal at grupong kumakalinga sa mga abandonado at nirescue na hayop.

17.   Vertical Garden Project, Itinayo sa Munisipyo

Nagtayo ang ESWMO ng isang pilot vertical garden sa likurang bahagi ng Engineering Office at sa tabi ng Nutrition Office, bilang bahagi ng programa ng LGU para sa mas luntiang kapaligiran at malikhaing pag-transform ng limitadong espasyo gamit ang plastic containers bilang recyclable materials. Bunga ng pagtutulungan ng iba't ibang tanggapan ng munisipyo, ang proyekto ay isa nang produktibong gulayan na nagsusulong ng urban gardening, food security, at pangangalaga sa kalikasan.

18.  Municipal Councilors, Dumalo sa PCL National Assembly 2026

Dumalo ang mga miyembro ng Sangguniang Bayan ng Bayambang sa 2nd Quarterly Continuing Local Legislative Education Program ng Philippine Councilors League mula July 29 hanggang 31 sa Iloilo City. Tinalakay sa programa ang mga estratehiya sa pagpapalakas ng katatagan ng mga lokal na pamahalaan, kabilang ang energy resilience, food security, green infrastructure, at water security, upang higit pang mapaunlad ang serbisyo publiko.

19.  LGU, Kalahok sa Induction of ECCD Service Providers

Lumahok ang LGU sa tatlong araw na Induction Program for Local ECCD Service Providers upang higit pang mapahusay ang pagpapatupad ng mga programa para sa maagang pag-aalaga at pag-unlad ng mga bata. Tinalakay sa pagsasanay ang pagpapalakas ng mga serbisyo sa nutrisyon, social services, at lokal na pagpaplano upang mas epektibong matugunan ang pangangailangan ng mga bata at kanilang pamilya.

20.  Validation ng Potential Beneficiaries para sa Social Pension, Isinagawa

Sumailalim sa validation activity ang 619 senior citizens na potential beneficiaries ng Social Pension Program sa pangunguna ng OSCA, katuwang ang DSWD, MSWDO, at iba pang ahensya upang matiyak ang maayos at transparent na proseso ng pagpili ng mga benepisyaryo. Ipinaalala ng mga opisyal na ang pagdalo sa validation ay hindi garantiya ng pagiging benepisyaryo, sapagkat ang pinal na pagpili ay nakabatay sa resulta ng beripikasyon at sa mga itinakdang pamantayan ng DSWD.

 

VO

1.      LGU, Pinarangalan sa Pagsuporta sa Rehabilitasyon ng Kabataan

Ang LGU ay ginawaran ng Certificate of Recognition ng DSWD Field Office I bilang pagkilala sa mahalagang suporta, aktibong pakikipagtulungan, at matatag na dedikasyon nito sa mga programa at serbisyo ng Regional Rehabilitation Center for Youth (RRCY). Iginawad ang parangal noong March 12 sa Bauang, La Union.

 

2.      Bayambang, National Representative ng Region I sa Gawad Pugay Puso!

Sa pinakahuling pulong ng Municipal Advisory Council, inanunsyo ng DSWD Region I na magiging kabilang ang LGU-Bayambang sa mga napiling national representative ng DSWD Region I sa Search for Gawad Pugay Puso sa taong 2026 ng 4Ps National Program Management Office ng naturang departamento. Ito ay dahil sa pagkapanalo nito bilang Best 4Ps Implementing LGU sa buong rehiyon.

3.      Bayambang, Top 7 sa Pangasinan at Top 11 sa Region I sa Local Revenue!

Naging Top 7 sa Pangasinan at Top 11 sa Region I ang Bayambang sa Locally Sourced Revenue (LSR) para sa unang kuwarter ng 2026, ayon sa Bureau of Local Government Finance, matapos makalikom ng 75.43 million pesos na lokal na kita. Ang tagumpay na ito ay bunga ng pagtutulungan ng LGU at ng mga tapat na nagbabayad ng buwis, na ang ambag ay patuloy na nagpapalakas sa paghahatid ng mga serbisyo publiko at programang pangkaunlaran para sa bawat Bayambangueño.

4.      Budget Office at Treasury, Binigyan ng Komendasyon!

Ang Bureau of Local Government Finance (BLGF) ay nagbigay ng komendasyon sa Bayambang Municipal Budget Office at Municipal Treasury Office matapos makitang compliant ang mga ito sa pagsumite ng Statement of Receipts and Expenditures Reports para sa second quarter ng Financial Year 2026. Congratulations sa Budget Office at Treasury Office!

5.      Bayambang, Pinarangalan sa 498% Tax Collection Increase!

Kinilala ng Bureau of Internal Revenue Revenue District 4 ang Lokal na Pamahalaan at si Lady Ann Razzel Purisima ng Accounting Office noong July 22, dahil sa kanilang natatanging kontribusyon sa paglago ng koleksyon ng buwis. Kinilala ang LGU at si Ms. Purisima matapos makapagtala ang bayan ng 498% na pagtaas sa tax payment noong buwan ng Mayo 2026, kumpara sa koleksyon noong nakaraang taon. Dahil dito, ang Bayambang ay kinalala na may pinakamataas na pagtaas ng ibinayad na buwis o "Highest Increase in Tax Payment" sa lahat ng LGU sa ilalim ng hurisdiksyon ng distrito.

6.      Mga RHU, Ginawaran ng Certificate of Quality Service

Ginawaran ng Department of Health – Ilocos Center for Health Development, sa ilalim ng National Rabies Prevention and Control Program, ng Certificate of Quality Service ang Bayambang Rural Health Unit I, II, at III, matapos matugunan ang mga itinakdang pamantayan para sa Animal Bite Treatment Center. Inisyu ang mga sertipiko bilang pagkilala sa pagsunod ng tatlong RHU sa mga pamantayan ng DOH para sa dekalidad na serbisyo sa Animal Bite Treatment Center.

7.      Mayor Niña, Nag-ulat sa Bayan sa SOMA 2026

Bunga ng matatag na pamumuno, mahusay na pamamahala, at sama-samang pagkilos ng lokal na pamahalaan at mamamayang Bayambangueño, inilahad ni Mayor Niña Jose-Quiambao ang mga makabuluhang tagumpay na naabot ng bayan sa kanyang State of the Municipality Address 2026 noong July 27. Sa kanyang ulat, binigyang-diin niya ang mga programa, proyekto, at inisyatibang nagbigay ng positibong pagbabago sa iba't ibang sektor—mga bunga ng isang pamahalaang nakatuon sa mahusay na paglilingkod, pananagutan, at patuloy na pagsusulong ng isang mas maunlad, matatag, at inklusibong Bayambang.

 

OUTRO

 NEWSCASTER 1: Maraming salamat sa inyong pagtutok.

 NEWSCASTER 2: Abangan ang mas marami pang balitang direktang nagmumula sa inyong pamahalaang bayan.

 NEWSCASTER 1: Muli, ako po si ______.

 NEWSCASTER 2: At ako naman po si ______, at kami po ay mula sa ____ Office.

 SABAY: Ito ang... BayambangueNews!