Monday Report - May 11, 2026

 

Monday Report - May 11, 2026

 

INTRO

Newscaster 1: Magandang araw, Bayambang! Ako po si Mr. Bryan Bulatao. Narito na naman kami upang ihatid ang mga pinakabagong balita at mahahalagang impormasyon para sa ating lahat.

Newscaster 2: Ako naman po si Engr. Jefferson Malicdem, at kami ay mula sa Bayambang Polytechnic College—naghahatid ng tapat, malinaw, at makabuluhang ulat para sa ating komunidad.

Newscaster 1: Kami ang inyong gabay sa pag-alam at pag-unawa sa mga kaganapan sa ating bayan.

Newscaster 2: Nag-uugnay, nagpapabatid, at naglilingkod para sa Bayambang.

Both: Ito ang… BayambangueNews!

 

HEADLINES

 

1.      RHU Birthing Home, Accredited Na!

Natanggap ng RHU Bayambang Municipal Birthing Home ang PhilHealth accreditation para sa taong 2026. Patunay ito na pasado ang pasilidad sa pamantayan para sa ligtas at abot-kayang serbisyong pangkalusugan, lalo na sa mga ina at sanggol. Saklaw din nito ang Gamot Package na makapagpapagaan ng gastusin ng mga pasyente.

 

2.      Bagong MPDC, Itinalaga

Itinalaga si Environmental Planner Ryan James Nicholai Dizon bilang bagong Municipal Planning and Development Coordinator ng Bayambang. May malawak siyang karanasan sa urban planning at inaasahang mangunguna sa mga programang pangkaunlaran ng bayan.

 

3.      Panukalang Ordinansa para sa Barangay OSCA Coordinators, Dininig

 

Tinalakay ng Sangguniang Bayan ang ordinansang magtatatag ng OSCA coordinators sa bawat barangay upang mapalakas ang serbisyo para sa mga senior citizen. Suportado ito ng alkalde at inaasahang magpapabilis ng koordinasyon at benepisyo alinsunod sa Expanded Senior Citizens Act. Inaasahang magdudulot ito ng mas organisado at epektibong paghahatid ng tulong sa mga nakatatanda.

 

4.      MDRRMO, Nagbigay ng Basic Life Support Lecture

 

Nagdaos ang MDRRMO ng Basic Life Support lecture para sa ROTC cadets ng PSU-Bayambang. Layunin nitong palakasin ang kakayahan ng mga estudyante sa pagresponde sa emerhensiya sa pamamagitan ng lectures at hands-on training tulad ng CPR.

 

5.      BPC, Naglunsad ng Trade Fair

 

Inilunsad ng BPC ang LUMALAKO 2026, isang trade fair, upang hubugin ang mga estudyante bilang student-enterpreneurs. Tampok ang mga seminar, product showcase, at iba’t ibang kumpetisyon na nagpapakita ng inobasyon at kasanayan, upang palakasin ang entrepreneurial mindset ng kabataan tungo sa pag-unlad ng lokal na ekonomiya at pagsuporta sa mga lokal na magsasaka.

 

6.      BPC, Nagdaos ng Fun Run

Isang Color Fun Run ang isinagawa ng BPC upang magsilbing pangwakas na aktibidad ng Lumalako Trade Fair 2026. Sa pamamagitan ng isang masaya at non-competitive na aktibidad, pinalakas ang samahan at diwa ng paaralan bilang isang organisasyon habang isinusulong ang kalusugan.

 

7.      Tatlong Kubo, Inihatid sa mga Panibagong Benepisyaryo

 

Muling naghatid ang LGU, sa tulong ng Rotary Club of Bayambang, ng mga bagong bahay kubo para sa tatlong nailistang benepisyaryo. Sila ay sina Gng. Rhealyn Diaz ng Brgy. Buayaen, Gng. Elizabeth Dignos ng Ligue, at Gng. Lea Honrado ng Duera. Laking tuwa at pasasalamat ng mga nabiyayaang pamilya, dahil sila ay nabigyan ng panibagong pag-asa sa pagkakaroon ng mas maayos na sariling tirahan.

 

8.      Problema sa Birth Certificate ng mga Taga-Tococ East, Sinagot ng LCRO

Dinagsa ng mga residente ng Brgy. Tococ East ang isinagawang programa ng Local Civil Registry Office, na direktang naghatid sa mga malalayong barangay ng iba’t ibang civil registry services, mula late registration ng birth, marriage, at death hanggang sa legitimation at supplemental report. Ipinakita nito ang matinding interes ng komunidad sa mga serbisyong sibil at legal na direktang nakatutulong sa kanilang pang-araw-araw na buhay.

 

9.      Mayor Niña, Todo-Suporta sa Atletang Bayambangueño

Noong May 6, tinanggap ng mga atletang Bayambangueño ang halagang ₱170,000 na tulong pinansyal mula sa sariling bulsa ni Mayor Niña, bilang buong-pusong suporta sa kanilang paglahok sa Palarong Pambansa na gaganapin sa Agusan del Sur mula May 24 hanggang 30. Ang nasabing halaga ay inilaan para sa kanilang plane ticket upang matiyak ang maayos na paglalakbay sa kanilang pagsabak sa pambansang kumpetisyon, handa sa hamon habang bitbit ang pangalan ng bayan ng Bayambang.

 

10.   Mga Serbisyo ng Municipio, Dinala sa Sanlibo

Ang Komprehensibong Serbisyo sa Bayan Year 9 ay sumunod na nagtungo naman sa Catalino Castañeda Elementary School upang paglingkuran at hatiran ng serbisyo ang mga residente ng Brgy. Sanlibo, Idong,  at Inanlorenza. Gaya ng dati, hindi mga residente ang lumapit sa gobyerno; sa halip ay ang gobyerno ang bumaba sa kanilang barangay, kung saan ___ na residente ang nakinabang. Dahil sa diwa ng KSB, ang tunay na serbisyo ay inklusibo, nakikita, at higit sa lahat—nadarama.

 

11.  Mga OJT, Nagsanay sa First Aid

Nagsagawa ang MDRRMO ng lecture at demonstration sa first aid para sa mga OJT noong May 5 sa Wawa Evacuation Center. Sa pagbahagi ng mahahalagang kaalaman sa pangunang lunas, pinapalakas nito ang kakayahan ng kabataan sa agarang pagresponde sa emerhensiya at maging katulong sa komunidad.

 

12.  Clearing Operation, Isinagawa sa Malioer

Sa abiso ng Bureau of Fire Protection, agad na nagsagawa ng clearing operation ang MDRRMO sa Brgy. Malioer noong May 6 matapos tamaan ng kidlat ang dalawang puno ng niyog doon. Gamit ang chainsaw, tinanggal ang mga napinsalang puno upang maiwasan ang panganib sa mga residente.

 

13.  IEC sa Kahandaan sa Sakuna, Isinagawa sa mga Barangay

Pinalawak ng MDRRMO ang information-education campaign nito sa kahandaan sa sakuna sa Brgy. Manambong Sur noong May 5 at Amancosiling Sur noong May 6. Tinalakay ang go-bag, family emergency plan, at mga hakbang bago, habang, at pagkatapos ng sakuna, upang patibayin ang kamalayan at kahandaan ng bawat mamamayan sa lebel ng barangay.

For VO

14.   COMPLETED: Wawa Evacuation Center Perimeter Fence

Natapos na ang paggawa ng perimeter fence sa paligid ng Wawa Evacuation Center bilang bahagi ng pagpapalakas ng seguridad at kahandaan ng pasilidad para sa mga mamamayang lilikas tuwing may sakuna. Layunin nitong maprotektahan ang gusali at kagamitan laban sa paninira, pagnanakaw, at pagpasok ng mga hindi awtorisadong tao upang manatiling maayos at handang magamit sa oras ng emergency.

15.   Pagresponde sa Grass Fire Incidents, Pinaigting

Pinaigting ng BFP Bayambang Fire Station ang kampanya at pagresponde laban sa dumaraming grass fire incidents dulot ng matinding init ng panahon. Kabilang sa mga pangunahing sanhi nito ang pagsusunog ng tuyong damo at basura, pagtatapon ng upos ng sigarilyo, at kaingin na nagiging banta sa kalikasan at kaligtasan ng mga residente. Hinihikayat ng BFP ang publiko na maging responsable at agad magreport ng anumang kahina-hinalang usok o apoy upang maiwasan ang paglala ng sunog.

 

 

***

BAYAMBANG, DAPAT ALAM MO!

 

Kuya Ngen, pasok!

 

 

Bayambang, dapat alam mo na taun-taon, mahigit 2,500 ang gumagraduate sa Bayambang … pero tinatayang nasa 700 hanggang 900 sa kanila ang hindi na nakakapagpatuloy sa college.

 

(pause)

Ang sakit sa bangs, ‘no?

 

Pero Bayambang, dapat alam mo rin na may isang nakakita ng problema at gumawa ng solusyon. Walang iba kundi si former Mayor at ngayo’y SATOM, Dr. Cezar T. Quiambao. Noong 2022, naisipan niyang magpatayo ng isang kolehiyo, isang tulay para sa mga kabataang may pangarap ngunit kapos sa pagkakataon.

 

At dito na pumasok ang Bayambang Polytechnic College o BPC, na binuksan sa unang taon ng panunungkulan ni Mayor Niña Jose-Quiambao.

 

Ngayon, Bayambang, dapat alam mo na 1,100 students na ang nasa BPC at mahigit 450 sa kanila ay nakapagtapos ng TESDA programs tulad ng EIM at CSS.

At alam mo kung anong mas nyerpuk?

Ilan sa kanila ay working na!

Dito sa Bayambang, sa ibang lugar, at oo, kahit abroad.

 

(pause)

Grabe, diba?

 

Pero wait… hindi pa ‘yan ang highlight.

Dapat alam mo na ngayong taon, yes this year, magkakaroon na ng unang batch ng college graduates ang BPC. At karamihan sa kanila ay first-generation graduates.

 

Teka, alam mo ba ibig sabihin nun?

Ibig sabihin, sila ang unang miyembro ng pamilya nila na makakapagtapos ng kolehiyo. Sa kaunang-unang pagkakataon.

 

(lean in tone)

Kung ikaw ‘yun, hindi ka ba maiiyak? Hindi ka ba mapapangiti nang sobra?

Kasi hindi lang diploma yan e. Pagbabago ‘yan ng buong pamilya. Dahil naniniwal si Mayor Nina, na kapag may isang miyembro ng pamilya ang makapagtapos ng kolehiyo, siya ang magiging simbolo ng hope para umangat at gumanda ang buhay nila.

 

Dapat alam mo rin na kung akala mo ay diyan na nagtatapos ang mga pasabog, nagkakamali ka, girl! Hindi pa talaga yan sha tapos. Sa ngayon, nasa ikatlong palapag pa lang ng isang mall ang BPC, pero pagdating ng 2027, magbubukas na ang isang state-of-the-art campus sa Brgy. Bical Norte.

 

(pause, playful)

Hello? It’s giving…. high class institution! Alam mo bang airconditiooned lahat ng classrooms nyan…. Bongga!

 

Pero ito na talaga, ready ka na ba?

Dahil sa malasakit at paniniwala na walang pangarap ang dapat maputol, 100% discount ang tuition para sa mga Bayambangueño students at 50% discount naman para sa mga taga-karatig bayan. Totoo ito guys… open to all… kaya mag-enroll na…. at ito pa ang pasabog, alam mo bang si Mayor Nina ang nagbabayad ng lahat ng tuition fee ng bawat bata, nasa 20million taon-taon ang binibigay na donasyon nila Mayor Nina…. Grabeeeeeeee

 

(pause)

Sana all? Hindi. Pwede na ‘to. Apply ka na.

 

Bayambang, dapat alam mo na sa pangunguna ni Mayor Niña at ng BPC President, mas marami pang pasabog ang aasahan. Sa kasalukuyan, may dalawang kurso ang BPC: BS Entrepreneurship at BS Agribusiness.

 

But wait, Bayambang because there’s more, more, MORE!

 

Dapat alam mo na sa mga susunod na taon ay maaaring madagdagan pa ang mga offered courses ng institusyon. Ilan sa mga ito ay

• Doctor of Veterinary Medicine

• BS Food Technology

• BS Agriculture

• BSE Major in Technical Education

• BS Criminology

 

(build energy)

Grabe na ‘to, Mayor Niña. Munisipyo pa lang tayo nito? What more pa kung syudad na us? Kaya Bayambang, manatili tayong nagkakaisa at patuloy sa pagbibigay ng total quality service at edukasyon para sa lahat.

 

Mabuhay ang Bayambang. Mabuhay ang BPC. At ikaw, oo ikaw ngani, choose BPC.

 

Bayambang, ang lahat ng ito ay dapat alam mo.

 

Muli, ito si Kuya Ngen na nagsasabi at nagpapaalala… ang weather ay buhay-buhay lang.

 

 

***

OUTRO

Newscaster 1: Maraming salamat sa inyong patuloy na pagtitiwala at pakikinig.

Newscaster 2: Asahan ninyo ang patuloy naming paghahatid ng mga balitang makabuluhan, napapanahon, at kapaki-pakinabang sa ating komunidad.

Newscaster 1: Patuloy tayong magkaisa tungo sa mas maunlad at mas maalam na Bayambang.

Newscaster 2: Hanggang sa muli, kami ang inyong mga tagapagbalita, Mr. Bryan Bulatao.  

Newscaster 1: At Engr. Jefferson Malicdem mula sa Bayambang Polytechnic College.

Both: Ito ang… BayambangueNews!