BNHS: 80 Taon Na!

 

BNHS: 80 Taon Na!

(Ang sumusunod ay hango sa mensahe ng alcalde, Kgg. Mary Clare Judith Phyllis ‘Niña’ Jose-Quiambao, sa ika-80 anibersaryo ng pagkakatatag ng Bayambang National High School.)

Isang mainit at taos-pusong pagbati ang aking inihahatid sa ika-80 anibersaryo ng pagkakatatag ng Bayambang National High School!

Sa mga iginagalang na guro at kawani, mga alumni, mag-aaral, at sa buong pamayanan ng BNHS, alam kong alam ninyong lahat na may espesyal na puwang sa aking puso ang inyong institusyon, sapagkat ito ang alma mater ng aking minamahal na asawa, si Dr. Cezar T. Quiambao. Ang apat na taon niyang pananatili sa loob ng inyong mataas na paaralan ay madalas niyang ikuwento nang may labis na pagmamahal. Hanggang ngayon, ang kanyang mga naging kaklase noon ay nananatili niyang mabubuting kaibigan. At siyempre, and BNHS ay naging tahanan din ng halos lahat ng mga Bayambangueno na nagsipag-aral dito.

Ang walumpung taon, kung ihahalintulad sa buhay ng isang tao, ay isang mahabang panahon. At sa loob ng walong dekadang ito, nanatiling matatag ang BNHS sa patuloy na paghubog ng mahuhusay at de-kalibreng mga mag-aaral taun-taon. Ang mga alumni ng BNHS ay nagsisilbing mga haligi ng ating bayan at bansa sa iba’t ibang larangan, lalo na sa mga propesyon at industriyang nagpapalakas sa ating ekonomiya.

Ang pagdiriwang ng inyong ika-80 taon ay isang patunay ng matibay na pamana ng katapatan, karunungan, at kahusayan sa industriya na pinagyaman ng BNHS sa paglipas ng panahon. Ang inyong temang, "BNHS: A Legacy of Loyalty, Knowledge, and Excellence in Industry," ay isang napapanahong paalala ng mga pagpapahalagang naghubog sa maraming henerasyon ng inyong mga mag-aaral tungo sa pagiging mga pinuno, innovator, at tagapagpabago, hindi lamang sa ating bayan kundi maging saanman sa mundo.

Habang inaalala natin ang inyong makasaysayang ika-80 na taon, bigyang-pugay natin ang mga nagtatag ng institusyong ito, ang mga guro na walang sawang humuhubog sa kaisipan ng kabataan, ang mga kawani na nagpapanatili ng kaayusan sa paaralan, at higit sa lahat, ang mga mag-aaral na may matatayog na pangarap at nagsisikap upang maisakatuparan ang mga ito. Ang BNHS ay nagsilbing tanglaw ng pag-asa at oportunidad, hindi lamang sa larangan ng akademya kundi pati na rin sa pagpapaigting ng diwa ng bayanihan at pagmamalasakit sa komunidad.

Nawa’y magsilbing inspirasyon ang pagdiriwang na ito upang patuloy tayong magsikap at magpunyagi para sa mas mataas pang antas ng tagumpay, nang sa gayon ay manatiling gabay ang pamana ng BNHS sa mga susunod pang henerasyon. Sama-sama nating pangalagaan ang katapatan at mga mithiin ng edukasyon, karunungan, at inobasyon—mga mahahalagang sangkap sa patuloy na pag-unlad ng Bayambang at ng ating bayan.

Muli, pagbati sa inyong makasaysayang anibersaryo. Nawa’y magpatuloy ang BNHS bilang isang haligi ng ating bayan sa maraming darating pang taon.

Mabuhay ang Bayambang National High School! Mabuhay ang Bayambang!