Turbaan Songs - Bayambang version

 Turbaan Songs

 

Akar ak lan akar

Arawi lan dalin

Katanga-tangay ko et

Abong a di salming

Balitok so takayan

Sampulado’y dingding

Bangon, bangon ka la inaro

Bangon, bangon ka la inaro

Ta wadya ak lan pinablim.

 

No Tuwan Inarom Ak

 

No tuwan inarom ak

Ya inutel ed pusom

Iyasulan mo ak pa siri’y

Inumen kon danom

Agko labay ta’y

Inasol ed bubon

No ag ingen sata’y

Pinespes ed pusom.

 

No asiim ko’y inarok

Ya akareteng? ed siak

Samsambuten mo’y

Manamayo’d satan

No say matam tan say matak

So makapantelekan

Inawa’y pagew kon

Aga nasabsabaan.

 

Iyanapan mo ak pa siri’y

Tambal na ermen ko

Dalayap ya poypoy

Anggapo’y akseng to

Bayawas ya aluto

Angapo’y bukel to

Niog ya malangwer

Wala la’y pala to

 

No Say Inarok et Agko Gabay

 

No say inarok ed agko gabay

Parukulen ko ed paway

Padangan ko ed putoy wasay

Panulusen ko’y agilay-gilay

 

No say inarok et maninagem

Pakanen ko met na genggeng

Piyan magano ya umpatey

Nasalatan met la’y sananey

 

No say inarok et gabay ko la

Parukulen ko ed kama

Padangan ko’d ensaimada

Panulusen ko ya di burda.

 

 

No kumon agi ta

Limon kan kakanen

Agta ka gatgaten

Agta ka akmunen

Iyan ta kad nguroy dilak

Ya patulin-tulinen.