MONDAY REPORT - SEPTEMBER 7, 2026 - abridged version

 

MONDAY REPORT - SEPTEMBER 7, 2026

INTRO

NEWSCASTER 1: Magandang araw, Bayambang! Ako si ______ mula sa ______ (name department).

NEWSCASTER 2: At ako naman si ______, mula rin __________  (name department). Narito na ang pinakamahahalagang kaganapan sa ating bayan ngayong linggo.

NEWSCASTER 1: Mga programa, proyekto, at aktibidad ng LGU... mga balitang dapat ninyong malaman!

NEWSCASTER 2: ... Mga kwentong nagbibigay-inspirasyon sa ating bayan. Ating sabay-sabay na tutukan.

SABAY: Ito ang BayambangueNews!

 

1. Konstruksyon ng BPC Training Center, Nagsimula Na

Nagsimula na ang konstruksyon ng tatlong-palapag na BPC Training Center sa campus ng Bayambang Polytechnic College (BPC) sa Brgy. Bical Norte, kasunod ng patuloy na pagpapalawak ng mga pasilidad ng paaralan. Isinulong ang proyekto sa pamamagitan ng pakikipagtulungan ni Mayor Niña sa national government upang makapaglaan ng karagdagang pasilidad para sa pagkatuto at pagsasanay ng mga kabataan.

 

2. Ikawalong Anibersaryo ng Rebolusyon Laban sa Kahirapan, Ipinagdiwang

 

A. Bilang bahagi ng pagdiriwang ng ika-8 anibersaryo ng Bayambang Poverty Reduction Plan noong August 24, nilagdaan ng LGU-Bayambang at Pangasinan State University-Bayambang Campus ang isang Memorandum of Agreement. Layunin ng partnership na palakasin ang ugnayan ng lokal na pamahalaan at academia sa pagbuo ng mga solusyong nakabatay sa datos, research, at aktuwal na pangangailangan ng komunidad.

 

B. Kasabay nito ay ang ceremonial unveiling ng librong Recalibrated BPRP.

 

C. Sa okasyon ay naging panauhing pandangal si Secretary Lope B. Santos III, Lead Convenor ng National Anti-Poverty Commission. Dito ay pinuri niya ang Bayambang sa pagpapatupad ng Bayambang Poverty Reduction Action Plan 2018–2028, at itinanghal niya ito bilang modelong anti-poverty program ng lahat ng LGU sa buong Pilipinas.

 

D. Bumisita rin si Secretary Santos sa Saint Vincent Ferrer Prayer Park at CSFirst Green AID upang makita ang proseso ng paggawa ng engineered bamboo at ang mga produktong yari dito.

 

3.      Wilcon Depot, Nag-courtesy Call

Nag-courtesy call ang Wilcon Depot, Inc. sa LGU kaugnay ng planong pagtatayo ng Wilcon Depot store sa Brgy. Dusoc. Inaasahang makatutulong ang proyekto sa pagpapalakas ng lokal na ekonomiya, paglikha ng trabaho, at pagpapalawak ng negosyo at komersyo sa Bayambang.

 

(pronounce Depot as DEE-pow)

 

4.      Mayor Niña, Nagbahagi ng Birthday Treat

 

A. Bilang parte ng pagdiriwang ng kanyang kaarawan, muling nagpamahagi si Mayor Niña ng libreng pananghalian sa iba’t ibang sektor ng bayan. Sa magkakahiwalay na birthday treat, siya ay nagbigay ng libreng lunch sa mga empleyado ng Munisipyo, mga tricycle driver, mga vendor sa palengke, iba’t ibang kumpanya, at lahat ng barangay hall. Sa malawakang paghahandog na ito, ipinakita ng alkalde na ang kanyang kaarawan ay pagkakataon ding magbahagi ng saya at biyaya.

 

B. Samantala, nagtuluy-tuloy naman ang pamimigay ng Mayor Niña ng libreng lugaw sa iba’t ibang barangay habang maulan ang panahon, gamit ang kanyang Galila Mangan Tila food truck.

 

5.      MNJQ, Agad Tumugon sa Hiling na Wheechair

Agad na tinugunan ni Mayor Niña ang kahilingan para sa isang wheelchair para sa 88-anyos na si Pablorito Lacerna Oficiar ng Brgy. Manambong Sur, na limang buwan nang hindi makatayo dahil sa sakit. Ipinagkaloob ang wheelchair noong August 25 bilang agarang tugon sa kanyang pangangailangan.

 

6.      NMIS Regional Technical Director, Bumisita

Nag-courtesy call ang Regional Office I OIC-Director ng National Meat Inspection Service na si Dr. Cherrie Ann T. Javier upang talakayin ang requirements para sa DA-PRDP Municipal Slaughterhouse Project. Tinalakay ang accreditation, inspection, technical standards, at iba pang hakbang para matiyak ang ligtas at compliant na operasyon ng proyekto.

 

7.      Stroke Survivor, Hinandugan ng Bahay Kubo

Salamat sa pag-sponsor ni Ms. Josie Carayugan-Khoo, former President ng Bayambang Association of Southern California, nabigyan ng bahay kubo si Cerio Ferrer ng Barangay Iton, isang stroke survivor na nahaharap sa kawalan ng regular na trabaho at sapat na tahanan. Ipinakita ng programa na ang serbisyo ng pamahalaan ay hindi lamang tungkol sa imprastraktura kundi sa pagbibigay ng dignidad, kalinga, at bagong pag-asa.

 

8.      KSB Year 9, Nagpatuloy sa Tanolong

Sa kabila ng masamang panahon, ipinagpatuloy ang Komprehensibong Serbisyo sa Bayan (KSB) Year 9 noong August 27 para sa mga residente ng Tanolong, Inanlorenza, at Maigpa, sa kabila ng masamang panahon, upang ilapit sa mga residente ang iba’t ibang serbisyong pampamahalaan. Pinangunahan ni Mayor Niña ang programa, kung saan tampok ang libreng lugaw, ice cream, fresh milk, spaghetti, at raffle prize na bigas.

 

9.      Libreng Mobile Chest X-ray, Isinagawa

Nagsagawa ang RHU II ng libreng mobile chest X-ray para sa active TB case finding sa Manambong Parte at San Gabriel 2^nd noong August 26, na nakapagserbisyo sa 120 kliyente. Dalawampu’t apat na presumptive PTB cases ang na-refer para sa karagdagang pagsusuri gamit ang GeneXpert, sa tulong ng Philippine Business for Social Progress.

 

10.  Mga Magsasaka, Tumanggap ng Farm Equipment at Inputs

A. Sa tulong ng Agriculture Office, tumanggap ang Masekder Manambong Parte Farmer Association ng multicultivator na nagkakahalaga ng P299,889 mula sa DA-RFO I. Inaasahang mapapahusay nito ang paghahanda ng lupa, kahusayan sa pagsasaka, at produksyon ng mga pananim.

 

B. Tumanggap naman ang Managos Farmers Agricultural Cooperative ng farm inputs at kagamitan mula sa DA-RFO I matapos lumahok sa Gulayan sa Bayan 2026.

 

11.  Lalaking Anim na Taong Nawawala, Natulungang Makauwi

Matapos ang anim na taong paghahanap, natulungan ng LGU na makauwi sa kaniyang mga kaanak sa San Nicolas, Pangasinan si Marco Claro noong August 26. Bago siya ihatid, binigyan siya ng pagkain, hygiene kit, at malinis na damit habang nasa kustodiya ng LGU, sa tulong ng MSWDO.

 

12.  Saku-sakong Bigas, Ipinamahagi sa TODA

Namahagi ang lokal na pamahalaan ng tig-5 kilong bigas sa 2,192 miyembro ng TODA na naapektuhan ang kabuhayan dahil sa pagbaha at 18 araw ng tuluy-tuloy na pag-ulan. Pinangunahan ni Mayor Niña ang distribusyon noong August 27. Ayon sa mga benepisyaryo, malaking tulong ang bigas sa kanilang mga pamilya habang unti-unti silang bumabangon.

 

13.  Preemptive at Forced Evacuation, Ipinatupad

Bilang tugon sa mabilis na pagtaas ng tubig sa Tarlac River noong August 28, nagsagawa ng forced evacuation ang MDRRM Council at Barangay DRRM Council sa Purok 7, Brgy. Managos, kung saan labinlimang pamilya ang tinukoy na posibleng maapektuhan. Isang pamilya na binubuo ng limang indibidwal ang boluntaryong lumikas at ligtas na inilipat sa Barangay Hall habang patuloy na mino-monitor ng LGU ang lebel ng tubig.

 

14.   Relief and Rescue Operations, Isinagawa

 

A. Agad na naghatid si Mayor Niña ng mainit na pandesal at kape sa mga kababayang nasa evacuation center bilang simpleng dagdag-ginhawa sa gitna ng paglikas dahil sa banta ng pagbaha. Muling hinikayat ang mga residente sa low-lying at flood-prone areas na unahin ang kaligtasan at agad sumunod sa mga abiso ng awtoridad. Sumunod namang nagsagawa ang MDRRMO at MSWDO ng relief operations sa mga nagsilikas sa mga evacuation center.

 

B. Noong August 29 naman ay nagdeklara ang LGU ng state of calamity. Sa pamamagitan nito, mas mabilis ma-aaccess ng LGU ang mga pondo at iba pang resources upang ma-intensify ang relief at rehabilitation operations nito.

 

C. Agad namang rumesponde ang MDRRMO, PNP, BFP, at BPSO sa ilang pamilyang hindi kusang lumikas sa kabila ng paulit-ulit na abiso, at biglang humingi ng saklolo sa Brgy. San Gabriel 2nd, at sila ay nailikas tungo sa ligtas na lugar gamit ang dalawang rescue boat ng LGU.

 

15.  Mga Tulay sa Bayambang, Sinuri at Nakitang "in Good Condition"

Isinagawa ng Municipal Engineering Office ang inspeksiyon sa mga tulay ng Bayambang bilang pag-iingat matapos masira ang bahagi ng Aquino Bridge at Agana Bridge sa Tarlac dahil sa malakas na ulan at pagtaas ng tubig. Napag-alamang nasa maayos na kundisyon ang Calvo Bridge at Wawa o Romulo Bridge, kabilang ang bailey bridge, at nananatiling maayos at functional ang mga ito. Nanatiling limitado naman ang mga dumaraan sa Warding-San Vicente Bridge.

 

16.  Relief Goods, Agad Ipinamahagi; Hot Meals Inihatid Araw-Araw sa mga Barangay

A. Sa pangunguna ni Mayor Niña, agad na ipinamahagi ng LGU noong September 1 at 2 ang kahun-kahong relief goods mula as DSWD sa mga pamilyang lubhang naapektuhan ng pagbaha. Katuwang ang team ni Cong. Rachel Arenas, nagtungo ang LGU officials at staff sa iba’t ibang barangay upang personal na maihatid ang tulong sa mga residenteng halos nalubog na ang mga tahanan.

 

B. Kasabay naman nito ay ang pamimigay araw-araw ng Munisipyo ng sariling relief packs sa mga malubhang binahang residente at ang adisyunal na pamimigay naman ng tulong ni Mayor Niña at ng LGU na mga hot meals na umikot araw-araw sa lahat ng binahang barangay.

 

C. Samantala, ang LGU-Bayambang ay nagpapasalamat sa lahat ng nagdonate at patuloy na namimigay ng iba't ibang uri ng ayuda mula sa pribadong sektor para sa ating mga kababayan na nalubog ang kabahayan sa baha. Kabilang dito ang Feeding Angels of Bayambang, Bayambang Matikas Eagles Club, pamilya Santos ng Inirangan, Mader Sammy TV, Los Barberos, LGBTQI Association of Bayambang, former Councilor Benjie de Vera, Dr. Alvin Rosales, at St. Vincent Ferrer Parish Church.

 

17.   LGU, Muling Ibinahagi ang EEC Best Practices

Muling ibinahagi ng LGU-Bayambang ang mga Energy Efficiency and Conservation initiatives at best practices nito sa DOE Luzon Field Office at Province of Pangasinan workshop noong August 26–28 sa Lingayen. Kinatawan ni EEC Officer, Engr. Rudyfer P. Macaranas, ang bayan, at naglahad ng mga hakbang sa mahusay na paggamit ng enerhiya bilang bahagi ng sustainable at responsableng pamamahala.

 

18.   LGU, Tumanggap muli ng Pinablin Award!

Tumanggap ang LGU-Bayambang ng Pinablin Award mula sa Philippine Red Cross noong August 26 bilang pagkilala sa mahalagang suporta nito sa blood donation at blood services. Nirepresenta ang LGU ng tatlong Blood Coordinators ng mga RHU.

 

19.  BPC Student, Kinilala sa Young Farmers Challenge sa Pangasinan!

 

Kinilala bilang Provincial Awardee ng Young Farmers Challenge 2026 ng DA-RFO I si Samson Flores Junio Jr., estudyante ng Bayambang Polytechnic College, para sa kaniyang makabagong Complete Vermicomposting Starter Kit. Bilang awardee, tatanggap siya ng 80,000-peso grant upang higit pang mapaunlad ang kaniyang sustainable agriculture enterprise, sa gabay ng kaniyang coach na si Ms. Bethel Charis Elevazo.

 

 

OUTRO

NEWSCASTER 1: At iyan ang mga balitang bumuo sa linggong ito.

NEWSCASTER 2: Patuloy nating tutukan ang mga susunod pang proyekto, programa, at aktibidad.

NEWSCASTER 1: Ako si ______.

NEWSCASTER 2: At ako si ______.

SABAY: Hanggang sa muli... BayambangueNews!