MONDAY REPORT – January 26, 2026

 

MONDAY REPORT – January 26, 2026

INTRO:

[VOLUME, ENERGY, SMILE!]

1: Magandang araw, Bayambang!  Ako po si ______ ng _____.

2: At ako naman po si _____ ng _______.

1: Narito na ang mga pinakahuling balita at kaganapan sa ating bayan.

2: Tampok ang iba't ibang hakbang tungo sa kaunlaran.

1&2: Ito ang...BayambangueNews!

1. Mga RHU, Muling Humakot ng Parangal sa Health Summit

 

Muling nagbigay karangalan sa bayan ang RHU matapos nilang mag-uwi ng iba’t ibang parangal sa 15th Provincial Health Summit at LGU Scorecard Awarding na ginanap noong January 16 sa Calasiao, Pangasinan. Kinilala ang Bayambang bilang Champion sa Epidemiological Surveillance Unit, Annual Operational Plan, at Mental Health Program, habang Runner-Up naman sa Health Promotions at Maternal Health Programs.

2. Mayor Niña, Naghandog ng Responder sa BFP

 

Isang bagong responder vehicle na pinondohan ng MDRRMO ang opisyal na ipinagkaloob ni Mayor Niña sa Bureau of Fire Protection. Ang bagong sasakyan ay isa na namang instrumento ng mabilis na aksyon upang mas maraming buhay ang maililigtas sa oras ng sakuna.

3. Mandatory Calibration ng mga Timbangan, Muling Isinagawa

 

Muling nagsagawa ang Office of Special Economic Enterprises ng mandatory calibration ng mga timbangan na ginagamit ng mga nagtitinda sa Pamilihang Bayan upang matiyak ang tamang timbang ng mga paninda. Saklaw nito ang mga fish, vegetable, at meat vendors, sari-sari stores, at mga nagtitinda ng iba pang produkto. Isinulong sa aktibidad ang patas na kalakalan at proteksyon sa karapatan ng mga mamimili.

4. DRRM Orientation at Scientific Meeting, Ginanap

 

Noong January 19, nagsagawa ang MDRRMO ng DRRM Orientation at Scientific Meeting upang higit na maihanda ang mga barangay at lokal na opisyal sa anumang sakuna. Tinalakay sa aktibidad ang Philippine Risk Reduction Management Act, hydro-meteorological hazards, at ang SOP ng operasyon ng San Roque Dam. Nagpamahagi rin ng rescue equipment at disaster preparedness kits sa mga barangay.

5. LGU at Rotary Club, Nagbuklod para sa Bali-Balin Bayambang

 

Pormal na nilagdaan ng LGU-Bayambang at Rotary Club of Bayambang ang isang Memorandum of Understanding upang isulong ang mga programang pangkalikasan sa bayan. Saklaw ng kasunduan ang waste management, tree planting, at iba pang inisyatiba para sa kalinisan at kaayusan ng kapaligiran. Bahagi rin ng MOU ang pagsama ng Rotary Club bilang miyembro ng Bagong Bali-Balin Bayambang Committee.

6. Women’s Month 2026, Pinaghahandaan

 

Noong January 20, pinangunahan ng MSWDO ang isang pulong upang planuhin ang mga aktibidad para sa pagdiriwang ng Buwan ng Kababaihan 2026. Dito ay tiniyak ang pagkakaroon ng mga makabuluhang aktibidad upang maisulong ang adbokasiya para sa karapatan at kapakanan ng mga kababaihan.

7. Iba't Ibang Tulong Pang-edukasyon, Tinalakay sa Pulong

 

Sa pinakahuling pulong ng Local School Board, tinalakay ang approval ng badyet na mahigit 11.2-million pesos para sa Special Education Fund 2026, ang pagsumite ng Project Procurement Management Plan at Calendar of Activities ngayong taon, Division Meet 2026, rehistrasyon para sa Boy Scout of the Philippines, at iba pang usapin.

8. 356 Indigent Solo Parents, Tumanggap ng Financial Subsidy

Noong January 22, tumanggap ng financial subsidy mula sa LGU ang may 356 indigent solo parents bilang bahagi ng implementasyon ng Expanded Solo Parents Welfare Act na naglalayong magbigay ng buwanang tulong-pinansyal sa mga kwalipikadong solo parents. Ito ay matapos dumaan sa masusing validation process ng MSWDO ang mga benepisyaryo.

9. LGU Officials, Dumalo sa COA Entrance Conference

 

Noong January 23, nagsagawa ang Commission on Audit (COA) ng entrance conference upang pormal na simulan ang audit process para sa Fiscal Year 2026. Tinalakay nila sa mga opisyal ang magiging audit timeline, mga kinakailangang dokumento, at mga responsibilidad ng auditor at auditee, habang binigyang-diin ang kahalagahan ng transparency at accountability sa pamamahala sa kabang yaman ng bayan.

[RESERVE THIS SPACE FOR POSSIBLE VOs]

--. MTICAO, National Contender sa 2nd Tourism Challenge!

 

Pasok ang Bayambang bilang isa sa apat na regional entries sa 2nd Tourism Champions Challenge ng Department of Tourism Region I, kaya't kakatawan ito sa rehiyon sa national level. Ito ay matapos matagumpay na idepensa ng MTICAO ang kanilang infrastructure tourism project na “Bayambang Expo Cultural Greenhouse,” na siyang tanging entry ng rehiyon mula sa probinsya ng Pangasinan.

--. Medalya ng Kadakilaan, Ipinagkaloob sa Hepe ng PNP-Bayambang

 

Pinarangalan ng Medalya ng Kadakilaan (o PNP Heroism Medal) si PLtCol Rommel Bagsic, Acting Chief of Police ng Bayambang Municipal Police Station, at si PSSg Albert Junio bilang pagkilala sa kanilang husay, dedikasyon, at matagumpay na resolusyon ng isang kaso ng pagpatay noong taong 2025. Iginawad ang parangal sa Lungsod ng San Fernando, La Union. Ang pagkilalang ito ay patunay ng kanilang matibay na paninindigan sa katarungan, paghahari ng batas, at tapat na paglilingkod sa mamamayan ng Bayambang.

[VOLUME, ENERGY, SMILE!]

BAYAMBANG, DAPAT ALAM MO! (Sanitary Permit)

Alam mo ba na dapat LAHAT ng mga business establishment ay may Sanitary Permit?

Ha? Bakit kailangan pa nito? Eh di ba lalong dadami ang mga requirement sa pagkuha ng business permit?!

Wait lang... Ano nga ba ang Sanitary Permit? Bakit kailangan nito?

Ito ang permit na iniisyu ng Rural Health Unit (RHU) para masigurong ang mga negosyo at manggagawa ay malinis, ligtas, at pasado sa health standards upang hindi maging banta sa kalusugan ng publiko bago payagang mag-operate.

Legal Basis

Ito ay alinsunod sa Presidential Decree No. 856 o Code on Sanitation of the Philippines, na nagtatakda ng mga patakaran para sa kalinisan at kaligtasan ng lahat.

**

Requirements for Sanitary Permit:

- Business Application Form for Renewal mula BPLO

- Occupancy Permit galing sa Engineering Office

- Kopya ng Sanitary Permit ng nakaraang taon

- Updated Health Certificate para sa lahat ng empleyado

- Master list ng mga empleyado

For new applicants, bring a picture of the business location and structure for proper evaluation.

**

Requirements for Health Certificate (o ang dating tinatawag na Health Card):

Para sa mga food establishment at employees, submit Normal results of the following:

- Fecalysis / stool examination – available in RHU

- Urinalysis - available in RHU

- Chest X-ray – from radiology provider

Para sa non-food handlers or industrial establishments like funeral homes, hotels, hospitals, motels, apartments, public laundry, tonsorials e.g. barber shops, beauty establishments, massage clinics, submit Normal results of the following:

- Normal chest X-ray-PA result

- CBC (if requested by the individual or physician)

Maaaring gamitin (o magparehistro upang magamit) ang PhilHealth sa Rural Health Unit para sa mga laboratory test na kailangan. (Magdala lamang ng valid I.D.)

**

Mahalagang Paalaala

Ang resulta ng laboratoryo ay batayan sa pag-iisyu ng Health Certificate na siyang isang requirement ng Sanitary Permit at pagpayag na makapagtrabaho sa isang establisimyento. Kapag hindi pasado ang resulta, kailangang magpagamot at magpa-clear muna bago maaprubahan.

At ang Sanitary Permit ay dapat nakadisplay sa mismong establishment at hindi ginagamit sa ibang business.

***

Proseso ng Pagkuha:

- Mag-apply at magsumite ng requirements sa RHU

- May sanitary inspection sa establisimyento

- Ayusin muna ang kakulangan kung meron

- Kapag pasado, iniisyu ang Sanitary Permit

**

Validity at Renewal

Ang Sanitary Permit ay valid ng isang taon at kailangang i-renew taun-taon.

Revocation o Pagkansela

Maaaring bawiin o kanselahin ang permit kung may paglabag sa sanitation standards o may banta sa kalusugan ng publiko.

Isang paala-ala… Ang Sanitary Permit ay hindi lang papel o requirement. Ito ay pangako ng proteksyon ng kalusugan at kaligtasan ng bawat Bayambangueño.

At mayroong tayong good news! In-extend ang deadline sa pag-aapply ng business permit mula January 20 ayon sa Local Revenue Code to January 30 sa bisa ng Executive Order No. 3, series of 2026.

Bayambang, ang lahat ng ito ay... dapat alam mo!

 

KONKLUSYON:

[VOLUME, ENERGY, SMILE!]

1: Ang mga balitang ito ay sumasalamin sa patuloy na adbokasiya para sa maayos na pamamahala.

2: Sama-sama nating isulong ang isang maunlad na Bayambang.

1: Muli, ako po si ____ ng ______.

2: At ako naman po si ___ ng ______.

1&2: At ito ang... BayambangueNews!