Editorial - October 2024 - May Himala

 May Himala

Nang aming marinig ang kuwento ng ospital na ito, hindi maiwasang maantig ang aming damdamin. Batay sa aming pagkaunawa, itinayo ito bilang alaala kay Julius K. Quiambao, na siyang panganay na anak ng dating alkalde ng bayan, Dr. Cezar Quiambao. Ang ospital ay hindi kasama sa orihinal na plano ng kanyang administrasyon, ngunit matapos ang ilang pagka-antala, pinasinayaan ang Julius K. Quiambao Medical & Wellness Center noong Oktubre 18, 2024. Ito ay dinaluhan mismo ni First Lady Marie Louise ‘Liza’ Araneta-Marcos, kasama ang iba pang mga kilalang personalidad mula sa pribado at pampublikong sektor.

Naipatayo ang JKQ Medical & Wellness Center sa loob lamang ng halos tatlong taon – napakabilis kung ihahambing sa mga proyekto ng pamahalaan. Bukod pa rito, ang pondong ginamit ay nagmula sa naiwang pondo sa pangalan ni Julius, at hindi sa pamamagitan ng PPP o investment ng iba’t ibang indibidwal o grupo.

Sa aming pagkakaalam, walang sinuman sa bayan na ito ang nakaisip na magtayo ng isang ospital tulad nito nang ganoon kabilis at sa ganoong paraan sa bayan ng Bayambang, kaya’t ang kwentong ito ay nakakapanindig-balahibo.

Kung tutuusin, ito ay parang isang milagro o himala. Kaya’t tayo ay lubos na nagpapasalamat sa Diyos at narating natin ang araw na ito upang masaksihan ang mga bagay na dati'y mukhang imposible ngunit maaari palang maging posible kapag mayroon tayong mabuting layunin at kapag sinasamantala ang pambihirang pagkakataon upang makatulong sa marami.

Kahit na ang sitwasyon sa likod ng pagtatayo nito ay nababalot ng kalungkutan, kami ay nagagalak na malaman na ang ospital ay itinayo bilang parangal sa isang minamahal na anak. Ito ay isang bagay na siguradong ikagagalak din ni Julius Quiambao, dahil sa kanyang pagiging mapagkawanggawa noong siya ay nabubuhay pa.

Bilang dating alkalde, si Dr. Quiambao ay mayroong maraming malalaking proyekto na nagawa, ngunit ang proyektong ito ay masasabi nating espesyal. At ang pinakabagong proyektong ito ay nagpapakitang muli ng kung ano ang maaari nating marating sa aming tinaguriang "Quiambao model of development."

Sa puntong ito, nananawagan kami sa iba pa nating mga kapwa Pilipino sa ibang bansa na may resources na maaaring gamitin upang maisakatuparan ang tulad ng mga nagawa ni Dr. Quiambao. Nawa’y isaalang-alang din nila ang mga magagandang posibilidad sa pagbalik dito upang magdulot ng tunay na pagbabago sa bayang sinilangan.

Kailangan natin ang mas marami pang makabayang Pilipino upang maging katuwang sa pag-unlad, lalo na sa larangan ng pangkalusugan.