LGU Accomplishments - December 2021

SUMMARY OF LGU ACCOMPLISHMENTS

GOOD GOVERNANCE

LGU, Lumahok sa Data Privacy Webinar

Ang ilang departamento ng lokal na pamahalaan na humahawak ng mga personal data ay lumahok sa isang webinar ukol sa Data Privacy Compliance na inorganisa ng National Privacy Commission noong December 1 sa Mayor’s Conference Hall. Ang aktibidad na ito ay nakapaloob sa batas na naglalayong protektahan ang lahat ng uri ng impormasyon, maging pribado, personal, o sensitibo. Ipinaliwanag dito na ang isang organisasyong tumatalima sa privacy compliance ay nagbibigay ng seguridad upang matiyak ang pagiging kumpidensyal ng mga personal na impormasyon, at maiwasan ang hindi awtorisado na pag-access sa data.

Mayor CTQ at LGU Heads, Dumalo sa Performance Review and Planning Conference

Alinsunod sa Good Governance thrust ng Bayambang Poverty Reduction Plan, dinaluhan ni Mayor Cezar T. Quiambao at ng mga department heads ng Lokal na Pamahalaan ang 2021 Performance Review and Planning Conference sa Niña’s Café noong December 13. Sa nasabing conference inilatag ng pinuno ng bawat tanggapan ang kani-kanilang mga nagawang accomplishment para sa taong 2021 at mga magiging programa at aktibidad sa darating na taong 2022. Nilalayon nito na lalong mapagtibay ang transparency at accountability ng lahat empleyado ng munisipyo para sa mas epektibong serbisyo publiko.

LGU Employees, Umindak sa Christmas Fitness Dance Party

Patuloy pa rin ang wellness program ng Human Resource Management Office para sa mga empleyado ng LGU. Ang HRMO at mga miyembro ng Balon Bayambang Employees Association ay nagsanib-pwersa para sa Zumba Christmas Fitness Dance Party noong December 14 sa Events Center kung saan inanyayahan ang mga  empleyado na sumali upang maging  masigla ang pangangatawan at maging mas epektibong lingkod-bayan. Ang indakan ay pinangunahan ng Zumba instructors mula sa Kasama Kita sa Barangay Foundation, at nilahukan nina Coun. Philip Dumalanta, KKSBFI COO Romyl Junio, Vice-Mayora IC Sabangan.

2021 LGU Year-End Assessment Program

Sa 2021 Year-End Assessment Program ng LGU na ginanap sa St. Vincent Ferrer Prayer Park noong December 29, binigyang-diin ni Mayor Quiambao ang mga naging accomplishments ng LGU, lalo na ang mga 21 na pinakamalaking proyektong naisakatuparan sa taong 2021 at ang mga pagbabagong nagawa ng Team Quiambao-Sabangan para sa buong LGU organization, kabilang na ang pamimigay ng libreng uniporme, pagpromote ng mga karapat-dapat, pagdami ng hinire na empleyado, at marami pang ibang benepisyo.

SB, Muling Naggawad ng Parangal

Pagkatapos ng flag-raising ceremony noong December 20 sa Balon Bayambang Events Center, pinarangalan ng LGU ang bagong batch ng achievers na Bayambangueño. Ang ikalawang recognition sa taong 2021 ay isang pagkilala sa angking husay, talino, at kakayahan ng bawat Bayambangueño.

Recognition para sa mga Donors

Kasabay nito ay ang pagrecognize din sa lahat ng mga naging donors sa bayan ng Bayambang simula nang maupo ang Team Quiambao-Sabangan. Ang mga donors ay kinilala sa pagbibigay ng makabuluhang ambag sa pamamagitan ng pagtulong sa ating mamamayan, lalo sa panahon ng pandemya.

Ang dalawang seremonyang ito ay inorganisa ni Sangguniang Bayan Secretary Joel Camacho.
 
FINANCIAL ADMINISTRATION & TAXATION

Assessor's Office, Nag-Inspect ng mga Communication Tower ng Smart

Kamakailan din ay nag-inspeksyon ang Municipal Assessor's Office sa mga communication tower na itinayo ng Smart Communications sa iba't ibang barangay ng Bayambang. Ang inspection team ay nagsagawa ng appraisal of property at kasabay ng tax declaration ng nasabing mga ari-arian.

Pre-Bidding Conference

Isang maagang Pre-Bidding Conference ang isinagawa ng Bids and Awards Committee sa Mayor's Conference Room noong December 29. Dito ay binigyan ang mga interesadong kumpanya ng pagkakataon upang magtanong ukol sa second batch ng items for public bidding ng LGU Bayambang para sa taong 2022. Ito ay parte pa rin ng policy of transparency ng LGU pagdating sa proseso ng procurement of goods and services nito.

LEGISLATIVE WORK

SB, Nagsagawa ng Year-End Assessment

Sa kanilang Year-End Assessment Program, iniulat ng Sangguniang Bayan ang kanilang mga naging accomplishment sa taong 2021. As of December 15, ayon sa ulat, ang SB ay nakapagpasa, sa likod ng banta ng pandemya, ng 23 ordinances kung saan lima rito ay appropriation ordinances, at 593 ay resolutions. Ang Konseho ng Bayambang ay nagconduct para rito ng 55 regular sessions, at may 3 special sessions na kinonvene para pag-usapan ang mga urgent measures. Bukod dito ay nagkaroon din ng apat na public hearings at siyam na committee hearings.

Public Hearing Ukol sa LPTRP

Isang public hearing ang isinagawa ng Sangguniang Bayan ukol sa panukalang "Ordinance Adopting the Local Public Transport Route Plan of the Municipality of Bayambang" noong December 28 sa SB Session Hall. Ang naturang pampublikong pandinig ay pinangunahan ni SB Chairman on the Committee on Transportation, Councilor Martin Terrado II. Ang naturang route plan ay nauna nang nabigyan ng Notice of Complicance ng LTFRB. Sa naturang ordinansa, kinakatigan ng SB ang implementasyon ng naturang Route Plan ng executive branch.

HEALTH

McDonalds, City Saving Bank, Ginawaran ng Safety Seal

Nagpatuloy ang Treasury Office sa pag-inspeksiyon ng mga business establishment sa ating bayan. Noong November 26, iginawad ng team ang official Safety Seal para sa McDonalds at City Savings Bank matapos makapasa ang mga ito sa lahat ng requirements. Matapos nito ay ininspeksyon ng team ni Business Permit and Licensing Officer Renato 'Bong' Veloria ang iba pang mga bangko sa bayan.

Iba’t Ibang LGU Offices, Pasado sa Safety Seal

Ang Municipal Assessor's Office ay pumasa na rin sa Safety Seal inspection noong Nobyembre 25, matapos bisitahin ng Municipal Local Government Operations Office, Philippine National Police, at Bureau of Fire Protection. Noon namang December 2, sunud-sunod na pumasa sa inspection requirements ang Local Civil Registry Office, Human Resource Management Office, at Accounting Office ng LGU. Ang mga opisinang ito ay matatagpuan sa Municipal Annex Bldg., Bayambang Municipal Hall Compound.
 
National Vaccination Days sa Bayambang, Naging Matagumpay

Naging matagumpay ang implementasyon ng Task Force Bakuna ng Bayambang sa National Vaccination Day. Ito ay ginanap mula November 29 hanggang December 1 sa limang venues: ang harap ng Munisipyo, Pugo Vaccination Center, Pantol Evacuation Center, Sanlibo Covered Court, at Macayocayo Covered Court. Ang aktibidad ay binisita nina Department of Health (DOH) Assistant Secretary Maylene Beltran at DOH Assistant Regional Director Marwin Bello. Mayroong 10,048 ang sumatotal na nabakunahan, kabilang ang mga kabataan edad 12 to 17 years old.

Buwanang Pagbabakuna sa mga Sanggol, Tuluy-Tuloy

Noong December 8, kahit national holiday ay pinangasiwaan ng Rural Health Unit I ang buwanang Immunization Day para sa  0- to 12-month-old na mga sanggol sa Brgy. Ataynan at Zone 6. Ito ay upang makaiwas ang mga sanggol sa mga sakit na maaaring puksain gamit ang bakuna, kabilang ang tuberculosis, diphtheria, polio, tetanus, mumps, measles, pertussis, at hepatitis B.

Massive Antirabies Drive sa Zone 7

Patuloy si Municipal Veterinarian, Dr. Joselito Rosario, at ang kanyang team sa Municipal Agriculture Office sa pag-iikot sa bawat barangay upang mabigyan ng bakuna ang mga alagang aso at nang maiwasan ang anumang kaso ng rabies infection. Nitong December 10, sila ay nagtungo sa Brgy. Zone 7 kung saan sila ay dinumog ng mga residente doon.

National Vaccination Days sa Bayambang, Muling Matagumpay

Naging matagumpay muli ang ikalawang implementasyon ng Bayambang Task Force Bakuna sa National Vaccination Days mula December 15 hanggang December 17. Libu-libo muli ang nabakunahan sa iba’t ibang vaccination sites sa Pugo Evacuation Center, sa harap ng munisipyo, at sa iba pang mga barangay kabilang na ang Sapang, Beleng, Bani, Tanolong, at San Gabriel 2nd. Ito ang isa sa pinakamabisang paraan upang maabot na ang herd immunity at maging ligtas ang mga mamamayan mula sa COVID-19.

Lima pang Establisimyento, May Safety Seal na Rin

Muling nag-ikot ang LGU Safety Seal Inspection and Certification Team sa iba't ibang establisimyento sa bayan ng Bayambang noong December 15. Ito ay upang masiguro na nakasusunod sila sa standard health protocols at matiyak ang kaligtasan ng mga mamimili sa kanilang lugar lalo na sa nalalapit na Pasko at Bagong Taon kung saan mas dagsaan ang mga customer. Ang mga ito ay ang Niñas Cafe, St. Joseph Drug Store, Siapno-Tada Optical, Switch Café, at Pook ni Urduja.

148 Blood Bags, Nakolekta sa Huling Blood Drive ng Taon

Bago matapos ang taong 2021, nagsagawa ang RHU 1 at 3 ng isang Blood Donation Drive, kung saan umabot sa 148 bags ng dugo ang nalikom ng RHU na siyang dadalhin sa Region 1 Medical Center. Ito ay ginanap noong December 21 sa Balon Bayambang Events Center. Bilang tanda ng pasasalamat sa mga bagong bayani na hindi nagdalawang-isip na tumulong sa pagsalba ng buhay ng iba, nakatanggap ang lahat ng donor ng isang T-shirt mula sa Kasama Kita sa Barangay Foundation Inc. at grocery package mula naman sa Local Council of Women sa ilalim ni Mayora Niña Jose-Quiambao. Naroon din ang mga miyembro ng Rotary Club sa pamumuno ni Coun. Benjie De Vera upang mag-asiste sa mga nagdonate.

Mga Opisina at Establisimyento, Pasado para sa Safety Seal

Ang LGU Safety Seal Inspection and Certification Team ay patuloy na nag-iikot sa iba't ibang parte ng bayan ng Bayambang upang masiguro na ang bawat lugar dito ay ligtas dahil nakasusunod sa iba't ibang public health protocols na ipinatutupad sa bayan. Noong December 17 ay kanilang ininspeksyon ang pinagsanib na mga tanggapan ng Bayambang Poverty Reduction Action Team, Municipal Tourism and Cultural Affairs Office, at Public Information Office sa 2nd Floor ng Municipal Annex Bldg.

Noon namang December 22-23 ay kanilang pinuntahan ang LTO at Goldilocks Bayambang upang siyasatin ang bawat sulok ng mga nasabing lugar. Sa huli ay naipasa ng mga ininspeksyong opisina at establisimyento ang mga requirements at sila'y matagumpay na ginawaran ng Safety Seal.

Municipal Annex Bldg., Ginawaran ng Safety Seal

Ginawaran ng Safety Seal ang buong Municipal Annex Bldg. ng inspection team para sa mga government agencies noong December 29, sa pangunguna ni MLGOO Royolita Rosario, PNP-Bayambang OIC Chief Jim F. Helario, at representante ng Bureau of Fire Protection. Ito ay matapos isa-isang pumasa ang lahat ng tanggapan dito, kabilang na ang Assessor's, LCR, GSO, Treasury, BPLO, HRMO, Accounting, Budget, Tourism, PIO, at BPRAT.

EDUCATION

SEF-Funded Projects para sa DepEd Bayambang II

Naritong muli kung saan napupunta ang parte ng ambag mong buwis: mga laptop at computer printer para sa mga public school teachers at construction ng handwashing facility para naman sa mga mag-aaral, na siyang mga proyektong hiling ng DepEd Bayambang II sa ilalim ni Public Schools District Supervisor Mary Joy Agsalon na nag-oopisina sa Buayaen Central School. Ang pondo ay nagmula sa Municipal Special Education Fund na nakalaan sa DepEd Bayambang I at II.  Kasama sa SEF ang buong taong suweldo na idinodonate ni Mayor Cezar T. Quiambao sa educational sector taun-taon simula noong 2016.

DepEd Bayambang I, Nagpasalamat sa mga Natupad na Hiling

Naritong muli ang mga kongkretong resulta ng inyong ambag na buwis para sa kinabukasan ng ating mga mag-aaral sa pamamagitan ng Special Education Fund. Kasama sa mga hiniling ng Department of Education-Bayambang District I ang mga IT equipment, Risograph machine, television units, school supplies, at handwashing facilities na agad na inaprubahan ni Mayor Quiambao at inasikaso ng Local School Board. Nagpapasalamat si DepEd Bayambang I District Supervisor, Dr. Angelita Munoz, dahil ang mga ito ay malaking tulong upang walang mag-aaral ang mapag-iwanan lalo na sa panahon ng bagong normal.

Eating Utensils para sa mga Day Care, Ipinamahagi

Noong December 21, namahagi ng mga iba’t ibang eating utensils o kagamitang pangkain sa iba’t ibang day care centers sa Bayambang sa pangunguna ng Department of Social Welfare and Development-Field Office I at Municipal Social Welfare and Development Office. May 1,700 na piraso ng utensils ang ipinamahagi bilang bahagi ng supplemental feeding program na naglalayong lutasin at iwasan ang child malnutrition sa Bayambang.

LIVELIHOOD & EMPLOYMENT

50 Child Laborers, Nakatanggap ng Tulong mula sa DOLE

Noong Nov. 22, nakatanggap ng panibagong ayuda ang mga kabataan ng Bayambang na natukoy ng Department of Labor and Employment bilang child laborers ayon sa kanilang datos. Ang mga ito ay mga anak ng onion at corn farmers sa Brgy. Maigpa at Sanlibo. Kasama ang kanilang mga magulang, mayroong 50 child laborers ang nabigyan ng school supplies, grocery packs, at packed lunch ng departamento, sa pakikipag-ugnayan sa Municipal Employment Services Office at Bayambang Poverty Reduction Action Team. Hinikayat ng kinatawan ng DOLE ang mga magulang na hayaan nilang "maging malaya ang mga bata" at nang matanggal na sila sa listahan ng child labor.

MCDO Mentors RBAC

Noong December 6, tinuruan ng Municipal Cooperative Development Office ang RiceBIS Bayambang Agriculture Cooperative sa Brgy. Tampog sa buwanang pagpupulong ng kanilang Board of Directors. Ito ay upang mapagtibay ang kanilang mga kalaaman kung paano itaguyod ang isang kooperatiba.

Pre-Registration Seminar, Inorganisa ng MCDO at MSWDO

Nagsagawa naman ang Municipal Cooperative Development Office ng isang pre-registration seminar para sa tatlong kooperatiba  ng  Bani, Bongato East, at Maigpa sa ilalim ng Sustainable Livelihood Program ng MSWDO at DSWD noong December 7 sa Events Center. Ito ay isang basic requirement para sa mga asosasyon na nais maging ganap na kooperatiba dahil dito nila malalaman kung ano at para saan ang isang kooperatiba at kung anu-ano ang mga benepisyo ng pagiging miyembro.

Project ITLOG sa ANCOP Ville, Nasa Training Phase Na

Sa pagtutulungan ng Municipal Agriculture Office, Kasama Kita sa Barangay Foundation, Inc., Municipal Social Welfare and Development Office at Bayambang Poverty Reduction Action Team, sumabak na noong December 15 sa training ang sampung benepisyaryo ng Project ITLOG mula sa ANCOP Ville. Sa training ay nabigyan ng ideya ang mga benepisyaryo patungkol sa pag-aalaga ng egg layering chicken at nagbigayan din ng updates ukol sa nakaraang programang Project ITLOG sa Brgy. Pantol bilang kanilang modelo sa pinasok na livelihood. Ito ay dagdag na kabuhayan na naman para sa mga Bayambangueño sa Brgy. Sancagulis.

Local Recruitment Activity, Ginanap

Isang Local Recruitment Activity ang ginanap sa Events Center noong December 20 sa pag-oorganisa ng Municipal Employment Services Office. May 39 applicants ang dumating para mag-apply na Service Crew, Cashier, Dining Staff, at Kitchen Staff -- mga bakanteng posisyon na inoffer ng recruitment company na Staff Search Asia Service Corp. Mayroong 2 aplikante ang hired on the spot at 28 na qualified applicants.

Ready-to-Lay Chickens, Ipinamahagi

Narito ang update ukol sa Project ITLOG. Noong madaling araw ng December 22, idineliver sa ANCOP Ville sa Brgy. Sancagulis ang 192 na ready-to-lay chickens kada pamilya bilang parte ng livelihood loan program ng Kasama Kita sa Barangay Foundation. Ayon sa Foundation, ang mga ito ay ipinamahagi sa sampung pamilya na benepisyaryo ng Sustainable Livelihood Program bilang dagdag na pagkakakitaan. Ang LGU ay nagpapasalamat muli sa tulong na ito ng Kasama Kita sa Barangay Foundation.

Halos 100 Applicants, Hired on the Spot sa Mega Job Fair 2021

Noon ding December 30, dinumog ang isinagawang Mega Job Fair ng Municipal Employment Services Office sa Royal Mall, matapos makahanap ng 1,477 job vacancies mula sa 20 participating companies ang MESO sa tulong Bayambang Poverty Reduction Action Team. Sa 491 na aplikanteng dumating, 391 ang lumabas na qualified, at mayroong 99 naman ang hired on the spot at 18 na near hires. Dahil panahon pa rin ng Kapaskuhan, nagkaroon din ng raffle draw sa Mega Job Fair na ito, na naghatid ng kaunting tuwa sa mga nagsidating na aplikante. Naging panauhin sa naturang job fair si Philippine Overseas Employment Administration Regional Director Ferdinand Jose E. Merrera.

OTHER SOCIAL SERVICES

Kasalang Bayan sa Bagong Normal | Umaapaw na Pag-ibig sa Buwan ng Disyembre

Isang engrandeng Kasalang Bayan ang inihatid ng LGU Bayambang sa pag-oorganisa ng Local Civil Registrar bilang maagang aginaldo para sa mga magsing-irog noong December 3 sa Balon Bayambang Events Center. May 30 na magkasintahan ang pinag-isang dibdib ni Mayor Cezar T. Quiambao na siyang tumayong solemnizing officer, sa harap ng kani-kanilang mga magulang, ninong at ninang, at malalapit na kaibigan. Kasama sa mga sponsors sina Mayora Nina Jose-Quiambao, Vice-Mayor Raul Sabangan at mga Municipal Councilors. Ayon sa tradisyong Pilipino, ang kasal ay isang sagradong ritwal na isinasagawa bago pa man magsama sa iisang bubong ang dalawang pusong nag-iibigan. Kaya't minarapat ng buong lokal na pamahalaan na ituloy ito kahit pa mayroong pandemya basta't nakasusunod sa public health standard.  Gaya ng dati, ang bawat pares ay tumanggap ng iba't ibang regalo mula sa mga official sponsors.

Isang mainit na pagbati para sa mga bagong kasal mula sa LGU Bayambang.

Pamaskong Handog ng TQS, Napuno ng Panangaro at Ilalo

Sa ika-apat na taon ng Pamaskong Handog ng Team Quiambao-Sabangan, muling nadama ang diwa ng pagbibigayan at pagmahahalan sa pitumpu’t pitong barangay ng bayan ng Bayambang. Ang selebrasyong ito ay naglalayong maghandog ng munting tuwa at inspirasyon sa mga Bayambangueño sa gitna ng pandemya at upang gunitain na rin ang nalalapit na Kapaskuhan. Sa nasabing pagdiriwang, nakisaya ang buong Team Quiambao-Sabangan sa pangunguna ni Mayor Cezar Quiambao at Mayora Niña Jose Quiambao, Vice-Mayor Raul Sabangan at maybahay na si Ian Camille 'IC' Sabangan, ang mga konsehal ng bayan, at mga panauhing opisyal mula sa Team Aguila. Sa loob ng dalawang linggo, nilibot ng mga nasabing personalidad ang lahat ng barangay sa Bayambang hatid ang mga pamaskong mula sa pagmamahal ng pamilya Quiambao.

Karapatan ng Kababaihan, Pinahahalagahan sa Bayambang

Sa pangunguna ng Municipal Social Welfare and Development Office, nagpatuloy ang mga seminar ukol sa Rights of Women and Children kasabay ang patuloy na pag-oorganisa ng mga grupo ng kababaihan sa kanya-kanyang komunidad.  Layunin ng aktibidad na magbigay kaalaman sa mga kababaihan ukol sa mga katangian ng isang ligtas na komunidad at palawigin ang responsibilidad ng mga opisyal para sa maayos na komunidad at bumuo ng organisasyon kung saan nagkakaisa ang mga lokal na kababaihan. Mayroong 20 na barangay kung saan nabuo ang community-based organization ng kababaihan na may 472 participants mula sa iba’t ibang barangay. Inaasahan ng MSWDO na magpapatuloy ang aktibidad na ito sa taong 2022.

Pamaskong Handog sa Kabataan Year 19, Napuno ng Surpresa at Kasiyahan

Simula noong taong 2002, naging tradisyon na para kay Mayor Quiambao at sa Kasama Kita sa Barangay Foundation, sa pakikipag-ugnayan sa LGU, ang pamimigay ng munting tuwa’t saya sa mga kabataang Bayambangueño tuwing Kapaskuhan. Sa ika-labingsiyam na taon ng Pamaskong Handog sa Kabataan, tuwang-tuwa muli ang mga kabataang Bayambangueño nang ito ay ganapin sa Saint Vincent Ferrer Prayer Park mula December 13 hanggang December 16. Kitang-kita ang kasiyahan sa mga Child Development Learners dahil bukod sa mga regalo na kanilang natanggap, mayroon pang magic show, at palabas na Disney musical kung saan tampok ang mga talentadong kabataan ng Bayambang mula sa "Beauty and the Beast" production ni Mayor Cezar at Mayora Niña Quiambao.

Plastic Waste Recycling Project, May Reward kay Mayora Niña

Sa Year-End Assessment program ng Local Council of Women (LCW) at Kalipunan ng Liping Pilipina (KALIPI) noong December 20, itinampok ni KALIPI President Jocelyn Espejo ang kanilang plastic waste recycling project. Ang proyekto ay nagbigay kagalakan sa bawat barangay na nakapag-ipon sa loob ng buong taon ng plastic bottles, candy wrappers, at iba pa uri ng plastic waste. Lahat ng nakaipon ng plastic ay ginantimpalaan ni LCW President, Mayora Niña Jose Quiambao, ng mga gift certificate na maaari nilang igrocery sa Royal Supermarket, depende sa kilo ng plastic. Ang mga plastic ay kokolektahin at lilinisin ng Solid Waste upang gawing stuffing material ng mga unan.

MANGOs Gift-Giving Activity

Noon mismong araw ng Pasko, nagsagawa ang Bayambang Municipal Association of NGOs ng isang Community Christmas Gift Giving activity para sa mga senior citizens na PWD. Ito ay dahil sa kagustuhan ng MANGOs, isang pribadong pederasyon, na mapasaya ang kanilang kababayan tuwing Pasko kahit sa munting paraan na kanilang nakayanan. Kasama ng MANGOs ang Xtreme Riders na siyang naghanap ng mga beneficiaries ng kanilang asosasyon ngayong taon. Ang MANGOs ay nagpapasalamat sa mga naging donor at partners kabilang na ang mga member associations nito.

Senior Citizens Federation, Tinanggap ang P2M na Tulong ni Mayor Quiambao

Sa Year-End Assessment program ng Federation of Senior Citizens Association of the Philippines- Bayambang Chapter (FSCAB) at Office of the Senior Citizen's Affairs (OSCA) noong December 28 sa Events Center, tinupad ni Mayor Cezar Quiambao ang kanyang ipinangakong donasyon na P2M bilang tulong sa mga namayapang senior citizen na rehistradong miyembro ng pederasyon. Ang mga tseke ay malugod na tinanggap ng mga opisyales ng pederasyon na si Pres. Benigno de Vera at OSCA Chairman Eligio Veloria. Naroon din siyempre sina Mayora Niña Jose Quiambao, Vice-Mayor Raul Sabangan at iba pang bisitang opisyal upang ipakita ang kanilang pagpapahalaga sa naturang sektor sa kanilang papel sa progreso ng ating bayan.

PEACE AND ORDER & PUBLIC SAFETY

Kortesiya at Disiplina, Binigyang-Diin sa POSO General Assembly

Sa ginanap na General Assembly ng Public Order and Safety Office noong December 12 sa Events Center, ibinahagi ni POSO Chief, Col. Leonardo Solomon, ang mga bagong alituntunin sa departamento at mga ordinansa ng LGU at ng pambansang pamahalaan upang tuluy-tuloy na maitaguyod ang disiplina tungo sa mabilis na pag-unlad. Ipinaalala ni Col. Solomon sa mga tauhan nito na pairalin ang antas ng kortesiya at disiplina sa pagpapatupad ng kanilang tungkulin bilang public servants. Dinaluhan ang naturang assembly ni Mayor Cezar Quiambao, kung saan tinalakay niya ang mga ordinansa mula sa national government, lalo na ang patungkol sa tricycle at motorbike ban sa lahat ng national highway.

Peace and Order Cluster, Binalangkas ang Naging Accomplishments

Noong December 20 sa Events Center, iprinisenta ng mga miyembro ng Peace and Order Cluster ng LGU-Bayambang ang kanilang mga naging accomplishment sa taong 2021. Naroon bilang kinatawan ni Mayor Cezar Quiambao si Municipal Administrator, Atty. Raymundo Bautista Jr., kasama ang organizer na si Municipal Local Government Operations Officer Royolita Rosario. Kabilang sa mga nagpresenta sina PNP-Bayambang OIC Chief, Jim Helario; Bureau of Fire Protection Fire Marshall, SFO3 Randy Fabro; Municipal Health Officer, Dr. Paz Vallo; at Municipal Disaster Risk Reduction and Management Officer Genevieve Benebe.

Anti-Illegal Drugs Awareness Program

Isang Anti-Illegal Drugs Awareness Program ang isinagawa ng Municipal Anti-Drug Abuse Council sa Balon Bayambang Events Center noong December 29, sa pag-oorganisa ng DILG at sa tulong ng PNP, RHU 1 at Kasama Kita sa Barangay Foundation para sa halos 600 drug reformists. Ipinaala sa mga reformists ang kanilang mga nararapat gawin para sa tuluy-tuloy na pagbabagong-buhay. Sa event na ito ay nagkaroon din ng vaccination activity kontra COVID-19, free medical and dental checkup, at pamamahagi ng grocery package mula kay Mayora Niña Jose-Quiambao.  

TOURISM, CULTURE & ARTS

Maligayang Pasko, mga Bayambangueño!

Bilang iisang pamilya ay sama-samang sinalubong ng mga Bayambangueño ang Pasko sa Saint Vincent Ferrer Prayer Park noong hatinggabi ng December 25. Pagkatapos ng isang misa, nagkaroon ng mini-concert at countdown kung saan naghandog si Mayor Cezar T. Quiambao at buong Team Quiambao-Sabangan ng fireworks display para sa mga mamamayan ng bayan.

Kabayanihan ni Rizal, Inala-ala sa 125th Anniversary

Sa isang simple ngunit makabuluhang selebrasyon ng Rizal Day 2021, inalala ng Lokal na Pamahalaan ng Bayambang ang 125th na anibersaryo ng kabayanihan ni Dr. Jose P. Rizal. Dito ay ipinaalala sa mga Bayambangueño ang sakripisyo ng pambansang bayani upang makamit ang kalayaang tinatamasa ngayon ng mga Pilipino mula sa kamay ng mga dayuhan. Ang selebrasyon ng Araw ni Rizal ay ginanap noong December 30 sa harap ng monumento ng pambansang bayani sa Municipal Plaza sa pangunguna ni Vice-Mayor Raul R. Sabangan bilang kinatawan ni Mayor Quiambao. Ang aktibidad na ito ay inorganisa ng Municipal Tourism, Information, and Cultural Affairs Office sa pakikipagtulungan ng PNP-Bayambang, Public Order and Safety Office, at iba pang mga opisina at departamento.

AGRICULTURAL MODERNIZATION

MAO, Nagmonitor ng Mushroom Production sa SG2

Noong November 26, nagtungo ang Municipal Agriculture Office sa Barangay San Gabriel 2nd para sa pagpupulong tungkol sa iba't ibang programa ng lokal at nasyunal na pamahalaan para sa mga magsasaka sa barangay. Nagmonitor rin sila sa kanilang mushroom production doon para malaman ang lagay ng proyektong ito sa naturang barangay.

Agri Office, Tumutok sa Onion Demo Farm

Alang-alang sa mga onion farmers na nasalanta ng harabas, tinutukan ng Municipal Agriculture Office ang onion demo farm sa sakahan ng farmer-cooperator na si Sandy de Vera sa Brgy. Wawa. Ayon sa MAO, dito ay magkakaroon ng tinatawag na "varietal derby," kung saan susuriin kung anu-anong onion variety ang resistant sa harabas at iba pang sakit ng sibuyas.

MAO, Namahagi ng Fertilizer Voucher sa mga Magsasaka

Nagsimula nang mamahagi ng Fertilizer Voucher ang Municipal Agriculture Office sa pangunguna ni OIC Municipal Agriculturist Zyra Orpiano noong November 29. Ang programang ito ay mula sa National Rice Program-Fertilizer Discount Vouchers Support (NRP-FDVS) to Rice Farmers ng Department of Agriculture. Ang voucher ay nagkakahalaga ng P9,000,000 na magagamit ng mga benepisyaryo sa pagbili ng abono mula sa mga agricultural suppliers. Umabot sa 3,527 ang mga magsasakang mapapamahagian nito na siya ring mga nakatanggap ng binhi ng palay na ipinamigay ng MAO noong nakaraang wet season. Napili ang mga benepisyaro ng mga Team Leader ng Farmers Association sa bawat barangay ayon sa antas ng pangangailan nila ng suporta sa kanilang pagsasaka. Ang pamamahagi ay nag-umpisa sa District 7, at nakatakdang lumibot sa lahat ng farming districts.

Pamamahagi ng Fertilizer Voucher

Patuloy ang Municipal Agriculture Office sa pamamahagi ng Fertilizer Voucher mula sa National Rice Program-Fertilizer Discount Vouchers Support to Rice Farmers ng Department of Agriculture. Ang voucher ay nagkakahalaga ng P9M na siyang hahatihatiin sa higit tatlong libong benepisyaryo. Noong nakaraang linggo, nagsimula nang iredeem ang naturang voucher ng mga benepisyaryo sa accredited agricultural supply store.

District 7 Farmers, Benepisyaryo ng Pump & Engine Set mula DA-RFO1

Noong December 10 naman, tumanggap ang Bayambang District 7 Farmers Cluster Organization ng 3 units ng pump at engine set mula sa Department of Agriculture Regional Field Office-1 sa ilalim ng Corn Banner Program ng ahensya.

Progress Report | Soil and Metarhizium Laboratory

Tunay na malasakit para sa ating mga magsasaka ang nag-udyok sa administrasyong Quiambao-Sabangan upang gawin ang lahat ng paraan upang makatulong sa kanilang mga suliranin sa paraang pangmatagalan -- katulad na lamang ng proyektong Soil and Metarhizium Laboratory sa Brgy. Manambong Parte, isang hakbang na siguradong pakikinabangan sa hinaharap ng mga magsasaka, lalung-lalo na ang mga malimit masalanta ng harabas at iba pang sakit sa pananim.

Limang Farmers’ Association, Tumanggap ng Makinarya mula sa DA

Nagtungo noong December 13 ang Municipal Agriculture Office sa awarding ng farm machinery para sa limang farmers' association ng Bayambang sa Agriculture Training Institute sa Sta. Barbara, Pangasinan. Ang mga makinaryang traktora at harvesters ay pinondohan sa ilalim ng Mechanization Program ng Rice Competitiveness Enhancement Fund ng PhilMech ng DA. Sa turnover ceremony, kasama ng mga agriculture technician ng MAO ang mga presidente ng Balon Malioer, Bani, Managos, Ligue, at Muyongan na Dumaralos ed San Vicente Farmers’ Association.

Pigmented Rice Products ng Bayambang, Inilunsad

Sa pangunguna ni Mayor Cezar T. Quiambao, kasama ang MAO at BPRAT, pormal nang inilunsad ang mga pigmented rice products ng Bayambang. Sa idinaos na Site Working Group Meeting ng iba't-ibang ahensya, kasabay ng product launching ng RiceBIS Agriculture Cooperative sa Niña's Café noong December 14, nagbigay ng mensahe si Mayor Quiambao tungkol sa maayos na pagnenegosyo bilang isang kooperatiba. Binigyang pugay naman ni PhilRice Senior Rice Research Specialist Joel Pascual ang RBAC dahil sa kanilang mabuting pamamalakad, lalo na sa paglunsad nito ng mga produktong pigmented rice at burong isda na sa ngayon ay nasa merkado na.
    
INFRASTRUCTURE DEVELOPMENT

Progress Report | Expansion of Public Market Phase 3

Progress Report | JKQ Hospital

Financial compensation, nagsimulang ipamahagi sa mga apektadong residente sa PRDP Project

Noong December 10, nag-umpisa nang magbigay ng financial compensation ang LGU-Bayambang sa mga residenteng naapektuhan ng proyektong "Improvement of Farm-to-Market Road with Bridge Project" sa Barangay San Gabriel 2nd sa ilalim ng PRDP ng Department of Agriculture. Nanguna rito ang Municipal Assessor's Office, kasama ang Municipal Treasury Office at Municipal Legal Office.

PRDP Project, "Pinakamalaking Procurement Project ng LGU"

Isang Pre-Procurement Conference ang ipinatawag ng Bids and Awards Committee noong December 17 para sa "Improvement of San Gabriel 2nd Farm-to-Market Road with Bridge" Project upang maplantsa ang detalye ng nakatakdang public bidding para sa proyekto. Naroon ang mga miyembro ng BAC, mga representante ng Philippine Rural Development Program ng Department of Agriculture sa pangunguna ni Gng. Erlinda Manipon, at iba pang stakeholders. Dito ay nabanggit na ang DA-PRDP project, na nagkakahalaga ng P126,478,000, ang pinakamalaking procurement project sa kasaysayan ng lokal na pamahalaan ng Bayambang.

Urban Poor, Tinutukan sa Isang Summit

Ang LGU, sa pangunguna ng Municipal Planning and Development Office, ay nag-organisa ng isang Urban Poor Summit na may temang "Karapatan sa Lupa, Panlipunang Katungkulan ng Pagmamay-ari ng Lupa". Ito ay upang matulungan ang mga mahihirap na mamamayan ng Bayambang lalo na ang mga informal settlers, at mabigyan sila ng mga ideya kung papaano nila maa-acquire ang mga lupang kanilang tinitirhan sa legal na pamamaraan, kasama ang iba pang kaakibat na isyu.

ENVIRONMENTAL PROTECTION

MDRRMO, Nakiisa sa DepEd Tree-Planting Activity

Noong December 10, nakiisa ang Municipal Disaster Risk Reduction and Management Office sa tree-planting activity na isinagawa sa Brgy. Dusoc kasama ng Bayambang National High School. Isa ito sa mga paraan ng pangangalaga sa kalikasan na isa sa mga sektor sa ilalim ng Bayambang Poverty Reduction Plan.

DISASTER RESILIENCY

MDRRMO, Nagsanay sa Basic 2-Way Digital Radio Operation

Noong November 25, nagsagawa ng training sa Basic 2-Way Digital Radio Operation ang Korbmatech Enterprises sa pangunguna ni Engr. Eric S. Evalla at sa tulong ni G. Edward Y. Gallarde ng One Document Corp. para sa MDRRMO head at staff. Layunin ng training na ito na maturuan kung paano ang tamang paggamit ng 2-way digital radio upang makatulong sa mabilisan o agarang pagresponde sa anumang sakuna. Isa rin ito sa mahalagang bagay na kailangan ng isang responder upang mas mapabilis ang komunikasyon at pagrescue.

MDRRMO Decontamination Activities, Tuluy-Tuloy

Kahit bumaba na ang kaso ng Covid-19 sa Bayambang, tuluy-tuloy pa rin ang decontamination activities ng MDRRMO sa mga LGU offices at matataong lugar sa ating bayan. Pinapaalalahan ang lahat na obserbahan pa rin ang mga minimum health standards, lalo na at may napapabalitang bagong variant na kumakalat sa ibang bansa. Inaabisuhan lalo na ang lahat ng Punong Barangay na regular na magdecontaminate din ng mga pasilidad sa kanilang area of responsibility, lalo na sa mga covered court na siyang pinagtitipunan ng maraming tao. Noong nakaraang taon, ang December holiday rush ay nagresulta sa biglaang pagtaas ng kaso, at nais nating lahat na ito ay maiwasan.

Handog na Tokens para sa 4Q NSED 2021

Muling namahagi ang MDRRMO ng COVID-19 disinfectant at prevention kits sa mga barangay, Day Care Center, at eskwelahan na nakiisa sa 4th Quarter National Simultaneous Earthquake Drill 2021. Ito ay bilang pasasalamat sa kooperasyon ng lahat ng nabanggit para sa matagumpay na NSED 2021.

AWARDS & RECOGNITION

Mayor Quiambao, Honored Anew as Local Chief Executive of the Year

Mayor Cezar T. Quiambao is among this year's recipients of the Honorary Local Chief Executive of the Year (2021) Award -- formerly the Most Outstanding Mayor Award -- by the international award-giving body Superbrands. Congratulations once again, Mayor Cezar Quiambao! We are very proud of you!

Bayambang, 100% Passer Muli sa ADAC Awards for 2019 at 2020

Samantala, muling nakamit ng LGU-Bayambang ang 100% Functionality rating sa ginanap na audit ng Anti-Drug Abuse Council (ADAC) Performance ng Department of the Interior and Local Government para sa taong 2019 at 2020.

Congratulations sa lahat ng ahensya at departamentong involved sa implementasyon nito, ang Municipal ADAC sa pamumuno ni Mayor Cezar Quiambao, sa patnubay ng MLGOO at sa tulong ng PNP-Bayambang, RHU, MSWDO, at mga Barangay Anti-Drug Abuse Council.

DSWD Congratulates LGU for SAP Implementation

DSWD RFO1 congratulates LGU-Bayambang for its successful implementation of its nationwide Social Amelioration Program. Thank you, DSWD-Regional Field Office 1, and congratulations to Team Quiambao-Sabangan and the Municipal Social Welfare and Development Office under OIC Kimberly Basco!

LGU-Bayambang, Pasadong Muli sa Good Financial Housekeeping Audit

Pasadong muli ang LGU-Bayambang sa Good Financial Housekeeping audit ng DILG as of November 5, 2021. Ito ay nangangahulugang mabuti ang pamamalakad ng Financial Cluster ng LGU sa pananalapi ng bayan, partikular na ang pagpasa nito sa accounting at auditing standards ng pamahalaan sa ngalan ng financial transparency at sa ilalim ng mabuting pamamahala ng administrasyong Quiambao-Sabangan.

Bayambang MDRRMC, Recognized as Fully Compliant

Sa isang virtual Recognition Ceremony noong December 16, ang Municipal Disaster Risk Reduction and Management Council (MDRRMC) ay pinarangalan ng Regional DRRM Council at Office of Civil Defense Region I bilang FULLY COMPLIANT. Ibig sabihin nito, ang LGU-Bayambang ay sumusunod sa mga panuntunan ng pamahalaan para sa establishment at functionality ng mga Local DRRM Councils at Local DRRM Office sa ilalim ng Section 11 at 12 ng Republic Act 10121 o ang Philippine Disaster Risk Reduction and Management Act of 2010. Ang gawad na ito ay equivalent sa Gawad Kalasag Award 2021.

Congratulations sa Bayambang MDRRMC sa pamumuno ng Chairman nito na si Mayor Cezar Quiambao!

Congratulations sa MDRRMO Bayambang sa pamumuno ni Ms. Genevieve Benebe!