Monday Report – November 9, 2026 - Complete

 

Monday Report – November 9, 2026

 

[Dress up nicely. OBSERVE proper pacing or speed, volume, pronunciation, and rise and fall. Don’t forget to smile.]

 

[INTRO]

 

NEWSCASTER 1: Magandang Monday morning, Bayambang! Ako po si ______________.

 

NEWSCASTER 2: At ako naman po si ___________, at kami po ay mula sa ___________________.

 

NEWSCASTER 1: Narito na ang buong puwersa ng LGU-Bayambang...

 

NEWSCASTER 2: Maghahatid sa inyo ng mga maiinit at napapanahong balita...

 

SABAY KAYO: Ito ang…. BayambangueNews!

 

***

 

[SALITAN NA KAYO RITO]

 

 

 

1.     CSFirst Green AID Inc., Nagdonate ng 180 Upuan at Mesa sa BNHS

Nagkaloob ang CSFirst Green AID Inc. ng 180 set ng upuan at mesa na gawa sa engineered bamboo sa Bayambang National High School (BNHS) upang makatulong sa pagpapabuti ng mga pasilidad at kapaligiran sa pag-aaral ng mga estudyante. Nagpaabot ng pasasalamat ang pamunuan ng paaralan sa donasyong inaasahang makatutulong sa paglikha ng mas maayos at komportableng mga silid-aralan.

 

2.      Learning Sessions para sa Pregnant at Lactating Women, Isinagawa

Nagsagawa ang Nutrition Office ng Pregnant, Lactating & Complementary Feeding Forum noong October 22 sa Brgy. Inirangan at Brgy. Wawa Court. Pinangunahan ng RHU nurses ang mga talakayan tungkol sa pagbubuntis, pagpapasuso, at complementary feeding.

 

3.     Mental Health Awareness Lecture, Isinagawa

Nagsagawa ang Rural Health Unit ng Mental Health Awareness Lecture sa Brgy. Wawa noong October 22. Ito ay dinaluhan ng 220 na mag-aaral mula Grades 4, 5, at 6 bilang bahagi ng Mental Health Awareness Month. Tinalakay sa aktibidad ang wastong pamamahala ng emosyon, pangangalaga sa sarili, pagbuo ng positibong ugnayan, at kahalagahan ng paghingi ng tulong para sa kalusugang pangkaisipan.

 

4.      Mga Kawani, Natuto sa sa Work Ethics

Ang Human Resource Management Office ay nagsagawa ng seminar na “Work Ethics and Professionalism” noong October 27 ukol sa upholding work standards at inspiring professional growth. Tinalakay sa nasabing pagsasanay ang kahalagahan ng disiplina, katapatan, pananagutan, at propesyonalismo sa serbisyo publiko, sa pamamagitan ng mga talakayan at role-playing na pinangunahan ng guro ng BNHS na si Ms. Josephine Loresca.

 

5.     Distribusyon ng Coconut Seedlings sa mga Magsasaka, Nagpatuloy

Ipinagpatuloy ng Agriculture Office ang pamamahagi ng mga punla ng niyog mula sa Philippine Coconut Authority bilang bahagi ng Massive Coconut Planting and Replanting Program ng ahensya. Layunin ng programa na mapalawak ang pagtatanim ng niyog, mapalitan ang mga luma at hindi na produktibong puno, at mapataas ang produksiyon ng niyog bilang suporta sa kabuhayan ng mga magsasaka.

 

6.     Chicken Layering Project, Inilunsad           

Inilunsad ni Mayor Niña, katuwang ang Department of Agriculture at Agriculture Office ang LOVE Project o Chicken Layer Production upang palakasin ang lokal na produksiyon ng itlog at kabuhayan ng mga residente. Namahagi ang proyekto ng battery cages, ready-to-lay chickens, feeds, at iba pang kagamitan matapos ang proseso ng pagpili at pagsasanay sa mga benepisyaryo.

 

7.     Inisyal na Pulong para Buuin ang Bayambang Nutrition Alliance, Isinagawa

Pinangunahan ng Municipal Nutrition Action Office ang paunang pulong para sa mga potensyal na miyembro ng Bayambang Nutrition Alliance noong October 28. Tinalakay sa pulong ang kalagayan ng nutrisyon sa bayan, mga umiiral na programa, at mga posibleng pakikipagtulungan ng iba’t ibang organisasyon upang higit na mapalakas ang mga inisyatiba laban sa malnutrisyon.

 

8.      REDAS Training, Pinalakas ang Kahandaan sa Lindol

Pinalawak ng MDRRMO, katuwang ang DOST at PHIVOLCS, ang kaalaman ng mga kabataang enumerators sa paghahanda at pagtugon sa lindol sa pamamagitan ng Rapid Earthquake Damage Assessment System (REDAS) Training na isinagawa noong October 27–29 sa Wawa Evacuation Center. Lumahok sa pagsasanay ang mga estudyante ng Bayambang Polytechnic College at piling kawani ng LGU upang matutuhan ang paggamit ng REDAS at mga makabagong pamamaraan sa pag-assess ng posibleng pinsala dulot ng lindol.

 

9.     Mga Estudyante, Lumahok sa Seminar ukol sa Pamanang Kultural

Nagsagawa ang Bayambang Municipal Museum ng isang seminar na pinamagatang “Young Curators: Discovering, Interpreting, and Protecting Bayambang Heritage” noong October 29 bilang bahagi ng Museums and Galleries Month 2026. Natuto ang mga kalahok sa mga bagong kaalaman ukol sa lokal na kasaysayan, cultural property registration, dokumentasyon ng mga pamanang kultural, pangangasiwa ng museo, at pangangalaga sa mga makasaysayang bagay at lugar.

 

10.  24 Blood Bags, Nakolekta sa Blood Donation Drive

Nakakolekta ng 24 blood bags ang Rural Health Unit at Philippine Red Cross sa isinagawang mobile blood donation drive noong October 29 sa Brgy. Reynado. Ang boluntaryong pagbibigay ng dugo ay nakatulong ng malaki sa maraming pasyenteng nangangailangan.

 

11.  ALS Learners, Nag-Livelihood Skills Training

Nagsagawa ang LGU, katuwang ang Bureau of Alternative Education, ng Livelihood Skills Training noong October 27 to 29 sa Bayambang Central School, upang sanayin ang mga Alternative Learning System learners at out-of-school youth sa mga kasanayang pangkabuhayan. Kabilang sa mga itinuro ang paggawa ng dishwashing liquid detergent, flower ponytail, at basahan upang mabigyan sila ng dagdag na kaalaman at oportunidad sa paghahanapbuhay.

 

12.  "Lakbay Palay," Inilunsad ng PhilRice

Inilunsad ng Philippine Rice Research Institute o PhilRice ang “Lakbay Palay” para sa 2026 wet season noong October 28 sa Brgy. Tampog. Layunin ng programa na palakasin ang akses ng mga magsasaka sa dekalidad at angkop na mga binhi ng palay sa pamamagitan ng pagpapaunlad ng mga lokal na negosyong nagbebenta ng binhi.

13.  Katata-CUTE-an, Hatid ng mga Chikiting sa Halloween

Sa idinaos na Children’s Halloween Party noong October 28, nakilahok ang mga anak ng mga kawani ng LGU sa Halloween Costume Fashion Show at trick-or-treat. Tampok sa selebrasyon ang paggawad ng mga papremyo sa mga nanalo sa costume competition. Nasungkit ni Zionne Josh Malicdem ang grand prize na P20,000. Sinundan ito ni RJ Maeve Mithelma Orpilla na nag-uwi ng ₱10,000, at 2nd runner-up Eziquel Josh Fama na nag-uwi ng ₱5,000.

 

14.  KSB Team, Masayang Sinalubong sa Sapang

Masayang sinalubong ng mga residente ng Sapang at Duera ang KSB Team Year 9 sa Sapang Elementary School noong Oktubre 29, na pinangunahan ni Mayor Niña kasama ang iba pang lokal na opisyal. Naghatid ang programa ng iba’t ibang libreng serbisyo tulad ng medikal at dental na konsultasyon, legal consultation, serbisyong pang-empleyo, at iba pa, kasama ang mga aktibidad na nagbigay-saya sa mga residente.

 

15.  Public Cemetery, Nilinis at Inihanda para sa Undas

Nagsagawa ang lokal na pamahalaan, sa pakikipag-ugnayan sa Office of the Special Economic Enterprise, ng paglilinis at paghahanda sa pampublikong sementeryo bilang pagsalubong sa Undas 2026. Ito ay upang na ang malinis, ligtas, at maayos ang sementeryo para sa lahat ng bibisita sa panahon ng Undas.

 

16.  Paggunita ng Undas 2026, Naging Maayos at Mapayapa

 

Naging maayos, ligtas, at mapayapa ang paggunita ng Undas 2026 sa Bayambang, sa direktiba ni Mayor Niña. Maraming salamat sa pagtutulungan ng mga miyembro ng MDRRM Council, partikular na ng PNP, MDRRMO, BFP, BPSO, Task Force Disiplina, RHU, SEE, ESWMO, at Engineering, at mga DRRM Council ng mga barangay na nakapaligid sa mga sementeryo at memorial park.

 

17.  Social Pension Payout, Isinagawa para sa Seniors

 

Namahagi ang LGU-Bayambang ng quarterly ₱3,000 social pension sa 991 na kwalipikadong indigent senior citizens na beripikado ng DSWD batay sa datos ng Community-Based Monitoring System. Isinagawa ang payout noong November 4 at 5 sa MSWDO Building.

 

 

18.  Coordinating Board, Nagpulong para sa Maayos na CBMS Implementation

 

Nagsagawa ng pulong ang Municipal Coordinating Board para sa paghahanda at maayos na implementasyon ng 2027 Community-Based Monitoring System o CBMS. Tinalakay ang plano, iskedyul, at mga gagamiting mapa upang mapahusay ang pagpaplano ng mga programa at serbisyong pampubliko.

 

19.  Sports Development Fund, Tinalakay sa Pulong ng LSB

 

Tinalakay ng Local School Board ang usapin sa pondo para sa sports development sa isang biglaang pulong meeting noong November 4. Tinukoy ng LSB ang mga posibleng mapagkukunan ng pondo at paghahanda ng mga resolusyon upang masuportahan ang mga gawaing pampalakasan sa DepEd Bayambang.

 

 

20.   4^th Quarter NSED, Matagumpay

 

Noong November 5, muling nagpractice ang mga Bayambangueño para sa kahandaan sa ‘di inaasahang pagyanig. Ito ay upang makaiwas sa malawakang sakuna na kadalasang dulot ng pagpapanic at kawalan ng preparasyon. Salamat sa walang sawang pakikiisa ng lahat sa regular na earthquake drill bilang parte na ng ating buhay pagdating sa disaster risk reduction and management!

 

 

21.  Bayambang MCDC, Kinilala!

 

Kinilala ang Bayambang Municipal Cooperative Development Council sa Region 1 Cooperative Stakeholders Summit 2026 dahil sa natatanging pamumuno at kontribusyon nito sa pagpapalakas ng sektor ng kooperatiba. Samantala, ginawaran naman ng L.I.K.H.A. Award (Micro Category) ang Managos Farmer Agriculture Cooperative bilang pagkilala sa mahusay nitong pamamahala, inobasyon, at malasakit sa komunidad.

 

22.  RHU-Bayambang, Best iClinicSys Implementor!

 

Ang Rural Health Unit ng Bayambang ay kinilala bilang Best Implementor ng iClinicSys sa ginanap na National EMR System Utilization Forum ng Department of Health noong October 19-23 sa Iloilo City. Ang karangalang ito ay isang ehemplo ng "excellence in consistent and complete digital recording of primary care services.” Naging presentor ng RHU sina Jinky Justo, Lorita Menor, at Jan Michael Garcia.

[OUTRO]

 

NEWSCASTER 1: At iyan po ang mga balitang nakatutok sa iba't ibang programa at proyekto ng LGU-Bayambang.

 

NEWSCASTER 2: Mga balitang may tatak Total Quality Service.

 

NEWSCASTER 1: Muli, ako po ang inyong lingkod, _____________________.

 

NEWSCASTER 2: At ako naman po si _________, mula sa _____________.

 

[SABAYANG BIGKAS]: At ito ang... Bayambangueñews!