Monday Report - August 19, 2024

Monday Report - August 19, 2024

[INTRO]

NEWSCASTER 1: Magandang Monday morning, Bayambang! Ako po si _____.

NEWSCASTER 2: At ako naman po si ___, at kami ay mula sa Rural Health Unit I.

NEWSCASTER 1: Narito na ang buong puwersa ng LGU-Bayambang...

NEWSCASTER 2: Maghahatid sa inyo ng mas pinalakas at mas pinalawak...

NEWSCASTER 1: Mga maiinit at napapanahong balita...

SABAY KAYO: Ito ang….BayambangueNews!

***

[SALITAN NA KAYO RITO]

NEWSCASTER 1: Sa ulo ng nagbabagang mga balita!

1. Mga Incoming Freshmen ng BPC, Winelcome ni Mayor Niña

Noong August 9, dumalo si Mayor Niña Jose-Quiambao at Vice Mayor IC Sabangan sa isang orientation program para sa incoming freshman students ng Bayambang Polytechnic College, kung saan kanilang winelcome ang mga estudyante sa BPC. Ang programa ay ginanap sa Events Center, sa pangunguna ni BPC President, Dr. Rafael Saygo.

2. SPES Beneficiaries, Tinanggap ang Sahod

Tinanggap ng may 25 na benepisyaryo ng DOLE-Special Program for the Employment of Students (SPES) ang kanilang sahod sa Treasury Office noong August 8. Naroon ang DOLE at PESO-Bayambang bilang saksi sa pay-out.

3. RHU 3 Animal Bite Center, Accredited Na!

Ang Rural Health Unit III Animal Bite Treatment Center sa Brgy. Carungay ay ginawaran ng accreditation ng Department of Health (DOH) Center for Health Development I. Dahil dito, di na kailangan pang magtungo ng mga taga-distrito at karatig-barangay sa RHU I at BDH upang magpa-inject ng anti-rabies vaccine.

4. Mobile Kitchen, Inihandog ni Mayor Niña

Isang mobile kitchen o food truck ang inihandog ni Mayor Niña Jose-Quiambao sa tulong ng mga Binibining Bayambang noong August 12 bilang parte ng pagdiriwang ng kanyang kapanganakan sa buwan ng Agosto. Ang mobile kitchen, na binansagang 'Mangan Tila, Ka-Niña-Aro,' ay nakatakdang gamitin sa iba't-ibang aktibidad ng LGU Bayambang, kabilang ang Komprehensibong Serbisyo sa Bayan at isang literacy program na malapit nang ilunsad.

5. Brgy. Pantol, Biniyayaan ng Service Vehicle

Isang brand new L300 van ang iginawad ni Mayor Niña Jose-Quiambao sa Brgy. Pantol upang maging service vehicle nito. Malugod na tinanggap ni Punong Barangay Arnel Ochave ang sasakyan na nagkakahalaga ng P1,032,000 noong August 12. Ang sasakyan ay donasyon ng Agricultural Infrastructure and Leasing Corporation, Niña Cares Foundation, at Kasama Kita sa Barangay Foundation.

6. Iba’t Ibang Isyu, Tinalakay ni Mayor Niña Kasama ang mga Kapitan

Muling pinulong ni Mayor Niña Jose-Quiambao ang mga kapitan ng barangay noong August 12 upang talakayin ang mahahalagang usapin at hinaing ng bawat barangay at masigurong may tamang tugon ang bawat isyu na kanilang kinakaharap. Kabilang sa mga naging usapin ang pagsumite ng Barangay Financial Reports, patuloy na pagtaas ng kaso ng dengue sa bayan, fogging operations, Clean and Bloom Project, Zero Open Defecation regional validation, at isyu ukol sa mga dumadaang cargo truck sa Calvo Bridge.

7. 50 RBAC Members, Nagtraining sa PhilGAP

May 50 miyembro ng RiceBIS Bayambang Agriculture Cooperative (RBAC) ang natuto sa Philipine Good Agricultural Practices o PhilGAP, matapos silang dumalo sa training ng Department of Agriculture  katuwang ang Municipal Agriculture Office. Itinuro ng PhilRice sa mga magsasaka ang mga tamang pamamaraan sa pagtatanim upang maging GAP-certified ang mga ito at maging competitive sa merkado.

8. Mayor Niña, Nagdonate ng Kagamitan para Dengue Patients sa BDH

Bilang tugon sa patuloy na pagtaas ng kaso ng dengue sa bayan, nagkaloob si Mayor Niña Jose-Quiambao ng 50 hospital beds, 10 stand fans, at 2 water dispensers sa Bayambang District Hospital (BDH) noong Agosto 13 upang mas maging kumportable ang mga pasyenteng nagpapagaling sa ospital. Maraming salamat sa Agricultural Infrastructure and Leasing Corp. (AILC), Niña Cares Foundation, at Kasama Kita sa Barangay Foundation.

9. SOGIE Ordinance ng Bayambang, Inaprubahan ng SP

Pormal na inaprubahan ng Sangguniang Panlalawigan ang Municipal Ordinance No. 15, series of 2023 o

"An Ordinance Protecting the Rights of LGBTQIs in Bayambang Against Discrimination" matapos ang deliberasyon noong August 12 sa kapitolyo. Ang ordinansa, na akda ni Councilor Benjie de Vera, ay naglalayong protektahan ang karapatan ng mga miyembro ng LGBTQI community at mapigilan ang anumang uri ng diskriminasyon laban sa komunidad.

10. Residente, Nagsurrender ng Alagang Unggoy

Isang residente ang nagsurrender ng kanyang alagang unggoy matapos itong sitahin ng mga kawani ng ESWMO. Isinurrender ng isang residente ng Brgy. Carungay noong Agosto 14 ang isang Philippine long-tailed macaque sa MENRO matapos siyang maabisuhan na labag sa batas at may kaparusahan ang pag-aalaga nito ayon sa R.A. 9147. Agad na inihatid ng ESWMO staff ang nasabing matsing sa CENRO Dagupan.

11. BNHS Alumni, Namahagi ng School Supplies

Ang tinaguriang 'BTS' o Born to Serve Team na pawang mga alumni ng Bayambang National High School ay namahagi ng mga school supplies sa mga mag-aaral ng Langiran Elementary School at San Gabriel-Iton Elementary School noong August 14. Ang Team ay nagdonate ng bags, raincoats, at payong sa 252 na kabataan at isang ceiling fan at sampung kurtina sa ilang piling guro.

12. Treasury, Nagdispose ng mga Laman ng Ballot Boxes

Noong August 15, binuksan ng Treasurer’s Office ang mga ginamit na ballot boxes noong nakaraang eleksyon upang idispose ang mga laman nitong balota, base sa direktiba ng Commission on Elections. Ito ay ginanap sa Events Center sa tulong at presensiya ng mga election stakeholders at concerned electoral parties.

13. Komprehensibong Serbisyo sa Bayan, Dinala sa Idong

Ang Komprehensibong Serbisyo sa Bayan Year 7 ay dinala sa Idong-Inanlorenza Elementary School sa Brgy. Idong noong August 15, kasama ang food truck ni Mayor Nina.  Ito ay upang direktang dalhin ang mga serbisyo ng Munisipyo sa mga barangay ng Idong, Inanlorenza, at Sanlibo, sa pangunguna ni Vice-Mayor IC Sabangan. Mayroong 1,201 na residente ang nag-avail ng mga libreng serbisyo gaya ng dental services, medical check-up, at animal vaccination, kung kaya’t sila ay nakatipid ng halagang ₱160,622.07.

14. HRMO at ICTO, Nagbigay ng Orientation ukol sa Programang PRIME HRM

Noong August 15, ang HRM Office ay nagbigay ng isang orientation activity ukol sa programa ng Civil Service Commission na tinaguriang PRIME HRM o Program to Institutionalize Meritocracy and Excellence in Human Resource Management. Ang implementasyon ng PRIME HRM ay nakatakdang magpalawig sa professinalization sa hanay ng mg opisyal at kawani ng LGU.

15. Sectoral Assessment para sa Recalibration ng BPRP, Pinaigting

Noong August 12 at 13, nagkaroon ng Sectoral Assessment Meeting ang BPRAT kasama ang National Anti-Poverty Commission para maifinalize ang bagong objectives at mga plano sa Bayambang Poverty Reduction Plan (BPRP) 2018-2028. Dito ay nirepaso at fininalize ang mga bagong target objectives na nabuo mula sa mga inisyal na assessment, at dinivelop ang mga detalyadong plano at istratehiya para sa implementasyon.

16. Anti-Poverty Summit, Naging Matagumpay

Noong August 14 naman, pinangunahan ni Mayor Niña at former mayor, Dr. Cezar Quiambao, ang Anti-Poverty Summit, na nilahukan ng iba’t ibang sektor. Sa pag-oorganisa ng BPRAT at sa tulong ng NAPC, nagkaroon ng mahabang talakayan sa pagitan ng mga sektor upang maayos na mabuo ang kanya-kanyang nailatag na plano at masiguro ang epektibong implementasyon ng mga ito. 

Samantala, magkakaroon ng isang serye ng mga aktibidad ang BPRAT bilang parte ng pagdiriwang ng ikapitong anibersaryo ng deklarasyon ng Rebolusyon Laban sa Kahirapan sa darating na August 28.

17. Bagong Ambulansya, Itinurn-over sa BPSO

Opisyal na naiturnover sa Bayambang Public Order and Safety Office ang isang ambulansya mula sa Department of Health (DOH) noong August 16. Ito ay isang inisyatibo ni Mayor Niña Jose-Quiambao, Vice Mayor IC Sabangan, at SB members, sa tulong ni Congresswoman Rachel 'Baby' Arenas at ng DOH. Malaking tulong ito sa mabilis na pagresponde sa mga Bayambangueño sa oras ng medical emergencies.

18. Batas sa Road Clearing, Ipinatupad; Nalsian Sur, Sinampolan

Isang emergency road clearing operation ang isinagawa ng LGU upang mahigpit na ipatupad ang batas laban sa mga market stall sa gilid ng highway. Kinailangan ng Road Clearing Task Force na ipatupad ang batas matapos matagpuang nagpabalik-balik ang mga vendors na nirelocate sa isang bagong gawang puwesto na malapit din sa tabi ng nasabing mga stall. Nananawagan ang LGU sa lahat ng mamamayan na magkaroon ng disiplina para sa kaligtasan ng lahat at upang ang bayan ng Bayambang ay may kaayusan. 

***

It's Trivia Time!

Alam ba ninyo na tanging ang LGU-Bayambang lang sa buong probinsya ng Pangasinan ang may tatlong public health doctors na magkakapareho ng salary grade? Idagdag pa rito ang pagtaas ng bilang ng mga health workers mula 26 positions matapos ang devolution sa Department of Health noong 1992 hanggang sa 84 permanent plantilla positions simula 2016 nang maupo ang administrasyong Quiambao-Sabangan.

Ang patuloy na paglago ng bilang ng mga health workers at doctors ay patunay ng matinding pagpapahalaga ng Bayambang sa kalusugan ng mga residente nito, na naglalayong magbigay ng mas mahusay at mas komprehensibong serbisyong pangkalusugan. Serbisyong may tatak TOTAL QUALITY SERVICE!

***

[OUTRO]

NEWSCASTER 1: At iyan po ang mga balitang nakatutok sa iba't ibang programa at proyekto ng LGU-Bayambang.

NEWSCASTER 2: Mga balitang may tatak Total Quality Service.

NEWSCASTER 1: Muli, ako po ang inyong lingkod, __________.

NEWSCASTER 2: At _______, mula sa Rural Health Unit I.

[SABAYANG BIGKAS]: At ito ang... Bayambangueñews!