Monday Report - August 12, 2024

 Monday Report - August 12 2024

[INTRO]

NEWSCASTER 1: Magandang Monday morning, Bayambang! Ako po Johnroy Jalac, SK Federation Vice-President ng Bayambang.

NEWSCASTER 2: At ako naman po si Marlo Sinay, SK Federation Secretary.  

NEWSCASTER 1: Narito na ang buong puwersa ng LGU-Bayambang...

NEWSCASTER 2: Maghahatid sa inyo ng mga maiinit at napapanahong balita...

SABAY KAYO: Ito ang….BayambangueNews!

***

[SALITAN NA KAYO RITO NEWSCASTER 1 & 2]

NEWSCASTER 1: Sa ulo ng nagbabagang mga balita!


1. RHU II, Naging Abala sa Anti-dengue Drive

Ang RHU II ay nagsasagawa rin ng sariling anti-dengue drive sa kanilang catchment area, sa pamamagitan ng fogging sa mga pinamumugaran ng lamok at pamamahagi ng mga Olyset Net sa mga pampublikong paaralan.


2. PESO, May Special Recruitment Activity

Noong August 1, ang PESO-Bayambang ay nagconduct ng isa na namang Special Recruitment Activity kasama ang Saint Rosalia International Recruitment Agency para sa mga naghahanap ng trabaho bilang domestic workers at semi-skilled at skilled workers sa Hong Kong, Singapore, at Kingdom of Saudi Arabia.


3. Parents ng CDC Learners, Inorient ng MSWDO

Bago nagsimula ang unang araw ng pasukan noong August 5 ng mga Child Development Center (CDC) learners para sa School Year 2024-2025, nagsagawa ang MSWDO ng limang araw na Parents' Orientation alinsunod sa ECCD Council schedule of activities sa 76 CDCs ng Bayambang. Dito ay tumulong sa MSWDO ang mga Child Development Workers at Teachers sa pakikipagtulungan sa mga barangay officials mula July 29 hanggang August 2.


4. Mga BPSO Staff, Trim 'n Triumph Grand Winners!

Itinanghal na grand champion sina Ferdinand Ramos at Menmar Bravo ng 'Team Bang' mula sa Bayambang Public Safety Office, sa katatapos na Trim 'n Triumph Weight Loss Challenge ni Mayor Niña Jose-Quiambao. Ito ay matapos mapagtagumpayan ng dalawa ang anim na buwang pagbabawas ng timbang sa pamamagitan ng physical activity at pag-iwas sa unhealthy habits. Sila ay tumanggap ng P100,000 cash prize mula sa sariling bulsa ng alkalde.


5. BPRAT, Naghanda para sa Antipoverty Summit

Noong August 5, pinulong ng Bayambang Poverty Reduction Action Team (BPRAT) ang mga team leader ng lahat ng development sectors sa ilalim ng Bayambang Poverty Reduction Plan o BPRP 2018-2028. Ito ay upang mareview at mafinalize ang Sectoral Assessment Report ng LGU para sa ikapitong anibersaryo ng deklarasyon ng Rebolusyon Laban sa Kahirapan. Nakatakdang talakayin ang naturang report sa Anti-Poverty Summit upang maging basehan ng pag-update ng BPRP.


6. Food Items para sa Dietary Supplementation Program, Ipinamahagi

Noong August 7, dumating ang mga food items mula sa DSWD para sa taunang implementasyon ng 90-day Dietary Supplementation Program (DSP) ng Nutrition Office. Ang mga food items na ito ay nakalaan para sa 500 undernourished at indigent na 6-month-old to 59-month-old children.


7. Calibration of Weighing Scales, Isinagawa

Kasabay nito, nagsagawa rin ang MNAO at Office of the Special Economic Enterprise ng calibration ng lahat ng weighing scales na ginagamit sa lahat ng barangay sa tulong ng mga nagtraining na LGU calibrators. Ito ay upang masiguro na tama ang pagsukat ng timbang sa mga kabataan at maiwasan ang mga false positive readings, at tama ang panimbang ng lahat ng weighing scales sa palengke.


8. Bayambang, 100% ZOD sa Municipal-Level Validation

Ang bayan ng Bayambang ay napag-alamang isang 100% zero open defecation (ZOD) town, matapos na maging matagumpay ang naging municipal-level validation. Ayon sa ulat ng RHU II, 100% ng mga barangay sa Bayambang ang maituturing na may zero open defecation. Ibig sabihin nito ay may maayos na toilet at tamang pagtatapon ng basura ang bawat sambahayan sa Bayambang.


9. Treasury Office, Magdidispose ng mga Laman ng Ballot Boxes

Nais iparating ng Office of the Municipal Treasurer na bubuksan nito ang mga ginamit na ballot boxes noong nakaraang eleksyon "for purposes of disposal," ayon sa direktiba ng Commission on Elections. Ito ay gaganapin sa alas nuwebe ng umaga sa Agosto 15 sa Balon Bayambang Events Center. Iniimbitahan ang lahat ng election stakeholders at concerned electoral parties na saksihan ang nasabing aktibidad at maging parte nito.


10. Mayor NJQ at LGU, Pinarangalan ng PRC

Isang Blood Samaritan Bronze Award at Certificate of Appreciation ang iginawad kay Mayor Niña Jose-Quiambao ng Philippine Red Cross-Pangasinan Chapter, dahil sa aktibong pakikilahok nito sa iba’t ibang Blood Services Program ng organisasyon bilang Presidente ng PRC-San Carlos City Branch Council. Iginawad naman ang Pinabli Award ng PRC sa LGU-Bayambang matapos makalikom ng LGU ang 438 blood units sa loob lamang ng taong 2023.


***


It's Trivia Time!

Alam ba ninyo na ang SK o Sangguniang Kabataan ay binuo mula sa Kabataang Barangay na itinatag noong Martial Law ni Pangulong Ferdinand Marcos?

Itinatag ni Marcos ang KB noong Abril 15, 1975 sa bisa ng Presidential Decree 684, at ang panganay na anak niyang si Imee Marcos ang naging unang pangulo.

Sa pamamagitan ng Kabataang Barangay -- na ngayon nga ay tinatawag nang Sangguniang Kabataan -- nabigyan ng pagkakataon ang mga kabataan na makilahok sa mga aktibidad sa komunidad at magbigay ng paraan para ipaalam ng pamahalaan sa mga kabataan ang mga pagsisikap ng pamahalaan sa pagpapaunlad.

At alam niyo rin ba na ang kauna-unahang naging KB President ng Bayambang ay si Ms. Filipinas Santillan noong 1974? Siya rin ang naging KB Federation President ng buong Pangasinan. Ngayon ay isa na siyang residente sa bansang Belgium.  Si Ginoong Gabriel Tristan Fernandez naman ang SK Federation President na naging pinakamatagal sa katungkulan, dahil siya ay nagsilbi ng walong taon matapos ma-extend ang kanyang term.

Samantala, nais naming ipaalam na ngayong araw, August 12, ay umpisa na ng Linggo ng Kabataan kasabay ng pagdiriwang ng International Youth Day.

Mabuhay ang mga kabataan ng Bayambang!


[OUTRO]

NEWSCASTER 1: At iyan po ang mga balitang nakatutok sa iba't ibang programa at proyekto ng LGU-Bayambang.

NEWSCASTER 2: Mga balitang may tatak Total Quality Service.

NEWSCASTER 1: Muli, ako po ang inyong lingkod, Johnroy Jalac, SK Federation Vice-President.

NEWSCASTER 2: At ako naman po si Marlo Sinay, SK Federation Secretary.

[SABAYANG BIGKAS]: At ito ang... Bayambangueñews!