LGU Accomplishments - August 2022

GOOD GOVERNANCE

1,184 na kliyente, Natulungan sa Komprehensibong Serbisyo sa Maigpa Elementary School

Iba’t ibang serbisyo ng munisipyo ang dinala sa mga residente ng Maigpa, Batangcaoa, at Tanolong noong July 29 sa Komprehensibong Serbisyo sa Bayan kasama ang buong Team Quiambao-Sabangan at Lokal na Pamahalaan.

Bagong Fire Station, Pinasinayaan

Naging panauhing pandangal si former Mayor Cezar Quiambao sa inagurasyon ng bagong-tayong Fire Station ng BFP sa Zone VI. Ang two-story building na itinayo sa lupang donasyon ng LGU ay naglalayong maging mas mabilis ang pag-responde ng BFP sa mga panahon ng hindi inaasahang sunog o sakuna. 

LGU Employees, Sumalang sa Values Formation 

Sa inisyatibo ni Mayora Niña Jose-Quiambao, nag-organisa ang HR Office ng Values Formation Program para sa mga empleyado ng munisipyo. Naglalayon ito na ipaalala sa mga empleyado ang mga karapat-dapat na values tulad ng kahusayan, katapatan, at mabuting pakikitungo sa tao bilang mga serbisyo publiko. 

Local NGOs, Dumalo sa CSO Conference

Nagkaroon ng isang conference para sa mga presidente ng Civil Society Organizations noong August 5 sa Sangguniang Bayan Session Hall. Dito ay binigyang-diin ng DILG, MPDC, SB, at Legal Office ang kahalagahan ng participatory governance, ang guidelines sa LGU accreditation, iba't ibang paraan ng partisipasyon ng CSOs, at formulation ng Local CSO Network. Ang pag-attend dito ng mga CSOs ay isang preliminary requirement para sa kanilang accreditation.  

Pre-ELA Workshop, Ginanap

Inorganisa ang Newly-Elected Officials (NEO) Program o Pre-Executive-Legislative Agenda Workshop noong August 8-10 sa Bayambang Events Center. Mahalaga ang ELA at Capacity Development Agenda dahil ang mga ito ang magiging gabay ng bawat opisina ng Lokal na Pamahalaan sa pagsasagawa ng mga programa at proyekto na makatutulong sa mga Bayambangueño sa susunod na tatlong taon.

Executive Order No. 38: Bawal ang nakasimangot sa munisipyo

Sa bisa ng Executive Order No. 38 na inilabas ni Mayor Niña Jose-Quiambao, lahat ng kawani ng LGU-Bayambang ay inaatasan na hindi lamang maglingkod ng tapat, kundi magkaroon din ng maaliwalas na pakikitungo sa taumbayan. Bawat isa ay inaasahang maging kalmado sa lahat ng oras at ngumiti ng mula sa ng puso kapag may ka-transaksyong kliyente. 

E.O. No. 40: Values Formation Program para sa LGU Employees

Sa bisa naman ng Executive Order No. 40, sasailalim sa Values Formation Program ang lahat ng kawani ng LGU upang maging malinaw sa lahat ang mga values na isinusulong ng batas para sa lahat ng empleyado ng gobyerno. Ayon sa EO No. 40, kailangang malinaw sa isang kawani ng LGU ang hierarchy of values na nakaugat sa tradisyunal na kultura ng mga Pilipino, partikular na ang pagiging maka-Diyos, makatao, makabayan, at makakalikasan, upang magbigay ng tapat, mahusay, at maasaahang serbisyo publiko. 

EO No. 39: POSO-Bayambang, Tatawagin nang BPSO 

Mula noong unang araw ng Agosto, ang pangalan ng POSO ay ginawa nang BPSO o Bayambang Public Safety Office. Bukod sa pagpalit ng pangalan ay sasailalim rin sa training ang mga empleyado ng BPSO upang lalong palakasin ang departamento at baguhin ang imahe nito bilana force multiplier sa pagpapanatili ng peace and order sa bayan.

KSB Year 5, Dinala sa Brgy. Bani

Tuluy-tuloy ang pagbibigay serbisyo para sa Balon Bayambang, sa Komprehensibong Serbisyo sa Bayan (KSB) na ginanap sa Bani Elementary School noong August 12. Dito ay nagbigay ng serbisyo ang KSB team sa pamumuno ni Dr. Roland Agbuya para sa mga taga-Brgy. Bani, Asin, at Ligue. Sa kabuuuan, mayroong 1,122 ang naitalang benepisyaryo sa naturang event.

LGU Heads, Kasali rin sa Values Formation Program 

Sa ikalawang pagkakataon, naging motivational speaker si Pastor Jeff Eliscupidez ng Victory Church-Fort Bonifacio para sa unang parte ng Values Formation Program na inilunsad nina Mayor Niña Jose-Quiambao at Municipal Administrator, Atty. Rajini Sagarino-Vidad, para sa lahat ng elected officials, department at unit heads, at municipal consultants noong August 15 sa Niña's Cafe. Dito ay ipinaala-ala ni Pastor Jeff kung ano ang mga values na dapat pahalagahan ng lahat ng pinuno ng LGU sa kanilang pagbibigay-serbiso sa publiko. 

ELA 2023-2025, Binuo sa Tulong ni DILG ASEC Pasaraba

Binuo ng lokal na pamahalaan ng Bayambang sa pangunguna ni Mayor Niña Jose-Quiambao at Vice-Mayor Ian Camille C. Sabangan ang Executive-Legislative Agenda (ELA) nito para sa unang termino, sa ginanap na programa sa Ortigas Center, Pasig City noong August 22 to 24. Naroon lahat ng mga department at unit head ng LGU, mga miyembro ng Sangguniang Bayan, mga hepe ng national agencies, at CSO representative. Naging panauhing pandangal sa programa si DILG OIC Assistant Secretary for Government, Atty. Odilon Pasaraba, na siyang nagbigay ng mga komento kung paano pa magiging mas epektibo ang mga proyektong ipatutupad ng Quiambao-Sabangan administration sa susunod na tatlong taon.

KSB Year 5, Dinala sa Amancosiling Sur

Noong August 26, ang buong team ng Komprehensibong Serbisyo sa Bayan (KSB) mula Munisipyo ay bumiyahe papuntang Amancosiling Sur Covered Court upang magbigay serbisyo sa tatlong barangay sa District 3, ang Brgy. Amancosiling Norte at Sur at San Gabriel 1st, sa pangunguna ng mga Municipal Councilors at mga duktor ng RHUs. Nagkaroon ng libreng gupit, pamamahagi ng medical supplies, dental services, covid-19 vaccination, anti-rabies vaccination, at iba pang serbisyo para sa lahat ng nagpunta. bilang tanda ng mapagmahal na pamamahala ng administrasyong Quiambao-Sabangan. Ayon sa overall organizer na si Dr. Roland Agbuya, may 1,082 beneficiaries sa naturang event.

Laban para sa Bayambang Central School, Patuloy

Patuloy pa ring ipinaglalaban ang karapatan ng mga Bayambangueño sa dating Bayambang Central School. Sa pinakabagong development sa kaso, kinumpirma ng Office of the Ombudsman na naaayon sa batas ang pagsampa ng kasong GRAFT AND CORRUPTION at PERJURY kay ex-Mayor Ricardo Camacho at Willy Chua, ang sinasabing nakabili ng paaralan. Binigyan naman ng penalty si dating Provincial Legal Officer, Geraldine U. Baniqued, sa halaga ng kanyang tatlong (3) buwang sahod dahil sa simple neglect of duty matapos mapatunayan ang kanyang kapabayaan sa kasong ito. 

Hindi tumitigil ang Lokal na Pamahalaan ng Bayambang sa pagbawi sa Bayambang Central School dahil ang paaralang ito ay pagmamay-ari ng bawat Bayambangueño.

Happy Birthday, Mayora Niña! 

Noong August 26, nagpamahagi si Mayor Nina Jose-Quiambao ng libreng pananghalian para sa lahat ng empleyado ng LGU, mga miyembro ng TODA, at sa lahat ng vendors sa public market, at libreng sorbetes naman ng Bani Delicious Ice Cream naman sa lahat ng barangay sa loob ng tatlong araw. 

Muli, maraming salamat at happy birthday, Mayor Niña Jose-Quiambao!

FINANCIAL ADMINISTRATION & TAXATION

Planning at Budgeting Rules, Ipinaala-alang Muli sa mga Barangay Officials at mga myembro ng Sangguniang Kabataan 

Inorganisa ng Municipal Planning and Development Office ang "Barangay Annual Investment Planning and Budgeting Seminar for Calendar Year 2023" upang mapalawak ang kaalaman ng Barangay at SK officials sa tama at maayos na pag-budget ng kanilang income. Ito ay parte ng layunin ng administrasyong Quiambao-Sabangan na magkaroon ng responsible fiscal management sa lokal na pamahalaan. 

Updates mula sa Treasury Office 

Noong buwan ng Hulyo, naging abala ang Municipal Treasury Office sa mga sumusunod na aktibidad:

- Tax Information Campaign sa iba’t ibang barangay

- Monitoring of establishments ng BPLO

- Cattle branding ng 79 na alagang baka

- Releasing ng 1,151 license plates sa mga rehistradong tricycle. 

Treasury, Naglunsad ng Tax Info Campaign

Nagsagawa ng Tax Information and Education Campaign ang Treasury Office mula August 3 hanggang 11 sa Zones I to VI at Brgy. Bani, bilang parte ng mas pinaigting na pagbibigay-kaalaman tungkol sa real property tax o amilyar. Doon ipinaliwanag kung ano ang amilyar at ang batas na sumasaklaw sa nasabing buwis, ang kahalagahan ng pagbabayad ng buwis, kung saan ito napupunta, at kung paano nakikinabang dito ang bawat Bayambangueño. 

Online Payment sa LGU-Bayambang, Puwede na sa Tulong ng Land Bank! 

Maaari nang magbayad ng Business Permit, Real Property Tax, at iba pang piling transaksyon sa munisipyo gamit ang Land Bank online portal. Ito ay ibinalita ng Land Bank of the Philippines sa Lokal na Pamahalaan ng Bayambang noong August 12. Gamit ang LinkBiz Portal ng bangko, hindi na kailangang magtungo ng kliyente sa munisipyo upang magbayad ng mga obligasyon katulad ng amilyar. Kaya't isa na naman itong hakbang sa pagpapadali ng transaksyon sa LGU gamit ang teknolohiya.

LEGISLATIVE WORK

SB, Dininig ang mga Hinaing ukol sa Trike Fare Matrix 

Noong August 31, nagsagawa ang Sangguniang Bayan Committee on Transportation and Communication ng isang pagdinig ukol sa panukalang ordinansa sa bagong fare matrix ng mga pampasaherong tricycle sa bayan ng Bayambang. Sa public hearing na ginanap sa Balon Bayambang Events Center at inorganisa ni SB Secretary Joel Camacho, tinalakay ang iba't-ibang paksa kaugnay ng ordinansa, gaya ng load capacity limit, penalty for violators, atbp., subalit naging sentro ng usapin ang paggawa ng bagong fare matrix. Sa kasalukuyan ay pinag-aaralan pa ang ukol sa bagong fare matrix matapos ang magkakasalungat na suhestiyon ukol rito.

HEALTH

DOST Calibration of Barangay Weighing Scales

Sa pagtutulungan ng Nutrition Office at DOST Provincial Office, muling ginanap ang isang mass calibration activity para sa weighing scales na ginagamit sa lahat ng barangay upang masiguro na accurate ang mga ito. 

DOH Program Implementation Review 

Noong August 5, bumisita ang Department of Health sa Bayambang para sa Semi-Annual Program Implementation Review. Ang PIR ay isang tool upang mamonitor at maevaluate ang implementasyon ng mga national at local health program implementation

DSP for Pregnant Women, Muling Inilunsad

Muling inimplementa ng Municipal Nutrition Action Office (MNAO) ang Dietary Supplementation Program (DSP) nito para sa mga buntis, lalo na sa mga pregnant teenagers. Ang DSP ay isa nang regular na programa simula noong 2021, kung saan binibigyang prayoridad ang mga buntis sa nutrition program ng LGU sa loob ng tatlong buwan. Kabilang sa mga benepisyaryo ang mga 4Ps members na buntis na nasa survival at subsistence category. Ito ay unang bugso pa lamang ng tulong ng MNAO para sa mga lokal na teenage pregnant women.

Mental Health Orientation Program, Isinagawa ng RHU

Sa gabay nina Mayor Niña Jose-Quiambao, nag-organisa ang RHU I ng tatlong araw na "Tulong, Alalay, at Gabay (TAG) Orientation Program" sa tulong ng DOH Region I. Ito ay nagsimula noong August 17 at matatapos noong August 19 sa Royal Mall. Natuto sa naturang programa ang mga nurse, midwives, Barangay Health Workers, at ilang mga Binibining Bayambang ng mga bagong kaalaman kung paano matukoy ang mental health issues sa isang indibidal at kung paano ito matutulungan, maalalayan, o magagabayan.

RHU I, Puspusan ang Kampanya Kontra NCDs

Tuluy-tuloy sa pagsuyod ang RHU I sa lahat ng 47 barangays na sakop nito para sa kanilang information-education campaign na "NCD ay Kontrolado kung Maagap Tayo." Kanilang ipinapakalat ang mga kaalaman ukol sa pag-iwas sa mga kumplikasyon ng non-communicable diseases (NCD) dulot ng maling lifestyle. Kabilang sa mga kumplikasyong ito ang stroke, paralysis, hypertension, at dialysis. Sinikap rin ng RHU I na magbuo ng mga health clubs kada barangay upang ipromote ang healthy lifestyle para iwas NCD.

EDUCATION

LSB, Namigay ng School Supplies sa Magsaysay ES

Noong August 12, namahagi ang Local School Board ng school supplies sa Magsaysay Elementary School sa Brgy. Nalneran sa karatig-bayan ng Basista, kung saan 70% hanggang 80% ng mga mag-aaral ay taga-Bayambang. Gamit ang Children's Fund, ang LSB ay namigay ng 186 school bags, 206 na payong, at 123 pad paper naman para sa Grades 3-6 learners.

Mga Kurso ng BPC, Aprubado na ng CHED!

Inaprubahan na ng Commission on Higher Education ng Department of Education ang mga kurso na handog ng Bayambang Polytechnic College. Sa kanilang pagbisita sa kolehiyo sa 3rd Floor ng Royal Mall noong August 16, inaprubahan ng mga bumisitang opisyal ang dalawang 4-year courses ng BPC na BS Entrepreneurship at BS Agribusiness. Malugod na tinanggap nina Mayor Niña Jose-Quiambao at BPC President, Dr. Rafael Saygo, ang magandang balita mula sa CHED Region I officials.

Pamamahagi ng Libreng School Supplies, Nag-umpisa Na

Nag-umpisa nang magpamahagi ang Local School Board, sa tulong ng General Services Office, ng mga libreng school supplies para sa lahat ng 49 public elementary schools sa Bayambang. Kabilang dito ang mga bag, pad paper para sa Grades 1 to 6, ballpen, pencil, at notebook, at may parating pang payong. Para rito ay naglaan si former Mayor Cezar Quiambao at kasalukuyang Mayor Niña Jose-Quiambao ng P3M mula sa Children's Welfare Fund ng LGU. 

YOUTH DEVELOPMENT

Kabataang Bayambangueño, Nagpasiklaban sa Talent Search

Naging hurado sina Yuki Sakamoto at Bugoy Cariño, kasama si Vice-Mayor Ian Camille Sabagan, sa ginanap na Bayambang Youth Got Talent na inorganisa ng Local Youth Development Office (LYDO), kasama ng Sangguniang Kabataan (SK). Dito ay nagningning ang iba't-ibang talento ng kabataang Bayambangueño. Sa pitong mga kalahok, itinanghal na grand winner ang Lil Crew na nanalo ng P15,000 para sa kanilang nakakabilib na dance production number. 

Pagtaas ng Teenage Pregnancy Cases, Tinutukan sa Summit 

Noong August 20, ginanap ang isang Teenage Pregnancy Summit sa Events Center bilang parte ng pagdiriwang ng LGU sa Linggo ng Kabataan 2022 sa pag-oorganisa ni Local Youth Development Officer Johnson Abalos. Dito ay ipinatawag ni Mayor Niña Jose-Quiambao ang walong sektor na pinaka-apektado sa isyung ito upang magkaisang bumuo ng mga posibleng programa at proyektong makatutulong para mapigilan ang patuloy na pagtaas ng bilang ng kaso ng teenage pregnancy sa Bayambang. Dito ay nagtulung-tulong ang SK, BPRAT, MSWDO, RHU, PopCom, PNP, Victory Church, at mga Bb. Bayambang.

Yuki Sakamoto at Bugoy Cariño, Naging Hurado sa BYGT 2.0; Disenyo ng Gagawing Youth Hub, Ipinasilip

Sa ikalawang pagkakataon, nag-organisa ang Local Youth Development Office (LYDO), kasama ng Sangguniang Kabataan (SK), ng Bayambang Youth Got Talent, kung saan nagningning ang iba't-ibang talento ng kabataang Bayambangueño. Ito ay pinangunahan ni LYD Officer Johnson Abalos at SK Federation President Gabriel Tristan Fernandez. Naging hurado sina Vice-Mayor Ian Camille Sabangan, Showtime 'Bida Man,' boy band member, artist, at singer na si  Yuki Sakamoto, at ang model, live streamer, G channel player, at former "Goin' Bulilit" star, Bugoy Cariño. Sa pitong mga kalahok, itinanghal na grand winner ang Lil Crew, na nanalo ng P15,000 para sa kanilang nakamamanghang dance production number. 

LYDO, Ipinagdiwang ang International Youth Day 

Noong August 11, sa pangunguna ng Local Youth Development Office, kasama ang DILG at National Youth Commission, ipinagdiwang ang International Youth Day sa pamamagitan ng isang Short Film-Making Contest sa Balon Bayambang Events Center. Ang short film na gawa nina John Darryl Malicdem at Jovian Dean Malicdem ang nangibabaw sa tatlong lumahok. Sila ay nakatanggap ng P10,000 cash prize.

LIVELIHOOD & EMPLOYMENT

BOFA Officials, Nag-oathtaking 

Itinalaga ni Mayora Niña Jose-Quiambao noong August 1 ang 44 elected officials ng Bayambang OFWs and Their Family Association sa pangunguna ng kanilang Presidente na si G. Joseph Ong sa Events Center.

Municipal Cooperative Development Office, nagsagawa ng iba’t ibang training bilang pagtulong sa mga lokal na kooperatiba

MESO, Sinagip ang Isang Bayambangueña OFW 

Isa na namang OFW ang nagtungo sa Municipal Employment Services Office upang magpasalamat matapos itong matulungan ng opisina na makauwi noong July 30. Ang OFW ay isang 24 taong gulang na babae mula sa Barangay San Vicente na nagtrabaho bilang isang domestic worker sa Riyadh, Saudi Arabia. Nagdesisyon itong umuwi matapos makaranas ng sexual harassment mula sa kanyang among lalaki.

Local Recruitment Activity: Epson Batangas

Isang Local Recruitment Activity para sa Epson Batangas ang inorganisa ng Municipal Public Employment Services Office noong August 16 sa Aguinaldo Room ng Balon Bayambang Events Center. May 15 job applicants ang dumating, at 12 sa kanila ang hired on the spot. Ang kumpanyang Epson Precision (Philippines), Inc. ay matatagpuan sa Special Economic Processing Zone (SEPZ), Lima Technology Center, Lipa City, Batangas.

Mandatory Seminar-Training para sa 2 Co-ops

Noong Agosto 16 at 17, nag-organisa ang Municipal Cooperative Development Office (MCDO) ng "Mandatory Trainings on Governance and Management" para sa BNHS Multi-Purpose Cooperative at BAMACADA Transport Cooperative, sa pangunguna ni MCDO head Albert Lapurga at sa pakikipag-ugnayan sa Cooperative Development Authority (CDA)-Dagupan. Ito ay ginanap sa Bayambang National High School gymnasium.

SPES Payout

May 80 kabataang Bayambangueño ang tumanggap ng kanilang suweldo matapos maging benepisyaryo ng Special Program for Employment of Students (SPES) ng DOLE sa taong ito, sa tulong ng PESO-Bayambang. Ang mga naturang estudyante ay sumahod ng P492.25 kada araw ng pasok, kaya't bawat isa ay nakatanggap ng P9,845 matapos ang 20 araw na pagtatrabaho sa LGU. 60% ng kanilang sinahod ay galing sa LGU, at 40% ay galing sa DOLE. Ginanap ang payout sa Aguinado Room ng Balon Bayambang Events Center noong August 17.

Salted Egg-Making Training, Isinigawa sa Managos 

Noong August 26, isang training sa Salted Egg-Making ang inorganisa ng MSWDO sa Brgy. Managos, sa tulong ni Sammy Camorongan Lomboy Jr. bilang trainor. Sa naturang training, ipinamahagi ng libre ng MSWDO ang mga gagamitin sa paggawa ng itlog maalat sa 30 miyembro na taga-Brgy. Managos, kabilang ang itlog, containers, basin, measuring cups, at iba pa.

OTHER SOCIAL SERVICES

Child Development Workers, Nagtraining sa First Aid 

Nagsagawa muli ang MSWDO, kasama ang MDRRMO, ng Annual Capability Enhancement Training kung saan sinanay ang mga CDW na makapagbigay ng first aid sa mga di inaasahang insidente ng sakuna. Ang training ay ginanap noong July 27-29 sa Pavilion 1 ng St. Vincent Ferrer Prayer Park. 

Maraming Salamat, Alonzo Family!

Sa tulong ng MSWDO, nagkaroon ng isang feeding program, distribution of groceries, at magical show noong August 7 sa Events Center para sa ating mga children with disability. Ito ay handog nina Gng. Genirose 'Gemma' Alonzo at kanyang pamilya mula sa Brgy. Carungay, bilang parte ng pagdiriwang ng kanyang kaarawan. Kasabay nito ay ang pagbibigay rin ng libreng covid-19 medical kits ng mga miyembro ng Alpha Kappa Rho Fraternity at Sorority, Beta Rho Chapter. Maraming salamat kina Gng. Alonzo and family at sa Alpha Kappa Rho Confraternity!

2 Pasyente ng MAC, Matagumpay ang Operasyon

Dalawang batang pasyente ang naoperahan sa tulong nina Mayora Niña Jose-Quiambao at former Mayor Cezar Quiambao. Ayon sa Mayor’s Action Center, sila ay sumailalim sa operasyon dahil sa cleft palate at congenital heart disease. Nagpasalamat naman ng personal ang mga magulang ng mga bata sa matagumpay na operasyon.

Mayora Niña, Tinugunan ang Mga Hinaing ng 4Ps Members

Sa ikatlong pagpupulong ng Municipal Action Committee (MAC) sa taong 2022 noong August 12, pinangunahan ng bagong MAC Chairperson na si Mayora Niña Jose-Quiambao ang naturang meeting, sa pag-oorganisa ng DSWD-RFO 1 Municipal Links at MSWDO. Ipinabatid niya sa pulong na tutulungan nito ang dalawang walang palikuran at anim na miyembro ng 4Ps na nakabilang sa pinakamababang income bracket ng DSWD.

LCR, Nag-briefing ukol sa Delayed Registration of Birth

Noong August 19, dumalo ang mga barangay official at barangay health worker sa isang orientation ukol sa libreng Delayed Registration of Birth na isinagawa ng Local Civil Registrar, kasama ang Philippine Statistics Authority (PSA)-Pangasinan. Ginawaran ng PSA-Pangasinan ang LGU-Bayambang ng 837 slots para sa free registration ng negative certificate at birth certificate. Kaya kanilang inabisuhan ang mga dumalo na ikalat ang impormasyong ito upang marami ang mag-avail ng free delayed registration of birth.  

STAC Pupils, Pasukan na rin sa Sept. 5

Noong August 22, tinalakay ng MSWDO ang mga planong aktibidad para sa mga learners ng Stimulation and Therapeutic Activity Center (STAC)-Bayambang at para sa mga PWD para sa huling quarter ng taon. Ito ay ginanap sa 3rd quarter meeting ng Stimulation and Therapeutic Activity Center (STAC) Parents Association at Bayambang Association of Persons with Disability Inc. Kasabay nito ay nagsagawa rin ng isang orientation para sa mga STAC/SPED students. Ang pasukan sa STAC Bayambang ay mag-uumpisa na sa September 5.

BNHS Batch '90, Muling Nag-feeding Activity

Isang panibagong feeding activity ang isinagawa ng Bayambang National High School Class of 1990 noong August 27. Bukod sa snacks at food packs para sa mga undernourished at indigent children sa ating bayan, mayroon pang distribution of gift packs. Sa pakikipag-ugnayan sa Municipal Nutrition Action Office, sila ay nagtungo sa Brgy. Bongato East, Tococ East, Manambong Sur, Manambong Parte, at Pugo, kung saan mayroong 216 affected at indigent children ang kanilang nabiyayaan. Salamat muli, BNHS Batch 90!

BANC at RC-Bayambang, Namigay ng Financial Aid 

Muling namigay naman ng financial aid ang Bayambang Association of Northern California kasama ang Rotary Club of Bayambang para sa 20 indigent at deserving na mga estudyante ng Pangasinan State University (PSU) para sa kasalukuyang semester. Ito ay inisyatibo ni dating Rotary Club of Bayambang President Aster Perez-Wilhelm. Nanguna sa turnover ng student assistance ang kasalukyang Presidente ng Club na si Ms. Maribel Barlaan. 

Mula sa LGU, maraming salamat po, Bayambang Association of Northern California at Rotary Club of Bayambang.

Assessment for Educational Assistance, Isinagawa ng MSWDO

Patuloy ang MSWDO, kasama ang Mayor's Action Center, sa pag-assess sa mga aplikante para sa Educational Assistance ng DSWD national office sa lahat ng mga estudyanteng nangangailangan, sa ilalim ng programa nitong Assistance to Individuals in Crisis Situations. Ang assessment ay ginaganap sa Balon Bayambang Events Center.

Bayambang Bayanihan Lions Club, Namigay ng Relief Goods

Noong August 29, namahagi ng relief goods ang Bayambang Bayanihan Lions Club International sa Brgy. Manambong Parte sa mga farmers na naapektuhan ng baha dulot ng bagyong "Florita" sa pamumuno ng President nito na si Engr. Eulito C. Junio at Pangasinan Zone Chair Rainier B. Gutierrez. Ang Bayambang Bayanihan Lions Club ay miyembro ng Bayambang Municipal Association of NGOs.

TOURISM

DOT Region 1, Isinama ang Bayambang in Kanilang Simulation Tour

Mainit na sinalubong ng Tourism, Information and Cultural Affairs Office, sa pangunguna ni Dr. Rafael Saygo, ang pagbisita ng Department of Tourism Region 1 kasama ang mga local tourism officers ng lalawigan ng Pangasinan noong August 30. Kasama ang LGU-Bayambang sa itinerary ng Provincial Tourism and Cultural Affairs Office sa kanilang Simulation Tour project, kung saan ang 22 tourism officers mula sa lalawigan ay bumisita sa Saint Vincent Prayer Park, CS1st Green Aid Inc. bamboo processing plant, at ang planta ng 1Food Corporation. Lubos na nasiyahan ang mga delegado sa kanilang pagbisita sa mga pinakabagong atraksiyong ito ng bayan ng Bayambang.

PEACE AND ORDER & PUBLIC SAFETY

Pagtatayuan ng 2 Bagong PCP, Ininspeksyon ng POSO at PNP

A. Noong July 29, ininspeksyon ng POSO kasama ng PNP, ang Brgy. Mangayao at Brgy. Balaybuaya para sa planong pagtatayuan ng bagong Police Community Precinct sa mga naturang barangay.  Ang presensiya ng kapulisan sa barangay ay magpapaigting sa kaayusan at seguridad sa distrito. 

B. Sa kabilang dako, muli na namang umikot ang POSO at PNP-Bayambang sa Brgy. Nalsian Sur at Nalsian Norte upang ipaalaala sa mga barangay officials at mga residente na bawal ang road obstructions at pagbibilad ng mais sa national road. 

BPSO, Nag-refresher Course sa Traffic Management

Noong August 17 hanggang 19, nagkaroon ng refresher training ang mga traffic enforcer ng Bayambang Public Safety Office sa Pavilion I ng St. Vincent Ferrer Prayer Park. Sa pagsasanay na ito, iniangat ang kaalaman ng 31 traffic enforcers sa pagsasaayos sa trapiko at mga alintuntunin ayon sa batas, kabilang na ang local ordinance. Naging tagapagsanay ang mga opisyal ng Highway Patrol Group (HPG) galing sa Lingayen, Pangasinan.

SPORTS & PHYSICAL FITNESS

ZumBayambang, Nabuhay Muli

Muling nabuhay ang mga Zumba sessions ng ZumBayambang matapos ang lifting ng mga pandemic restrictions. 

AGRICULTURAL MODERNIZATION

E-Agro Agri-Business Loan Program, Nagsimula Na; Libreng Fertilizer mula sa pamilya Quiambao, ipinamigay sa mga nag-avail ng serbisyo. 

Organic Farming NGO delegates mula pa sa South at Southeast Asian countries, Bumisita sa Trial Farm sa Brgy. Warding upang matunghayan ang makabagong breed ng organic na palay. 

Training para sa Hog Raising Beneficiaries 

Bilang pagtugon pa rin sa mga naapektuhan ng African swine fever noong mga nakaraang taon, nagkaroon ng pagsasanay para sa 51 na bagong benepisyaryo ng Hog Raising Project sa Barangay Langiran noong August 4 sa pagtutulungan ng iba’t ibang opisina at organisasyon. 

RBAC BOD Special Meeting 

Noong August 5, nagkaroon ng special meeting ang Board of Directors ng RiceBIS Bayambang Agriculture Cooperative sa Brgy. Tampog. Naroon ang PhilRice, kasama ang Agriculture Office, para umantabay sa pag-audit ng kanilang agro-enterprise at magbigay ng gabay sa issues at concerns ng kanilang pigmented rice business. 

MAO, Gumawa ng Rice Damage Assessment

Noong August 23, nagtungo ang Municipal Agriculture Office (MAO) sa Brgy. Sapang upang magsagawa ng assessment sa pananalasang sanhi ng isang peste na iniulat sa lugar. Ayon sa site investigation ng MAO, nakitaan ng sakit na tinatawag na leaf streak at leaf blast ang mga pananim na palay ng mga magsasaka. Upang mapuksa ang naturang sakit, kanilang inirekomenda ang paggamit ng copper-based fungicide, kapalit ng ginamit na insecticide na hindi naging angkop sa naturang sakit.

RiceBIS Farmers, Nag-refresher Course sa General Assembly

Muling nagtungo ang PhilRice sa Bayambang upang magbigay ng Retooling Course para sa lahat ng participants at magkaroon ng updates ukol sa kalagayan ng bawat cluster. Noong August 30, lahat ng 14 production clusters ng RiceBIS Bayambang ay nagtipon sa isang general assembly sa San Vicente Covered Court. Dito ay nireview ng PhilRice ang napag-aralan ng mga farmers sa pagpapalay at kung ang mga makabagong kaalamang ito ay tunay na naisasagawa sa kanilang sakahan

INFRASTRUCTURE DEVELOPMENT

Engineering Construction Projects

Narito naman ang ongoing projects ng Engineering Office. 

Construction of Multi-purpose Covered Court under 2022 20% Development Fund: 

Upgrading works in Warding 

Phase 1 construction in Langiran...

Balaybuaya and Pangdel

Phase 3 construction in Tanolong 

Phase 2 in Telbang 

Multi-purpose Hall, Phase 3 (Finishing) at Bani 

Multi-purpose Hall, Phase 3 (Finishing) at M.H. del Pilar 

Multi-purpose Hall and Plaza Stage at  Sancagulis 

Road Widening of Core Local Access Road at Buenlag 

Core Local Access Road at Mangayao 

ENVIRONMENTAL PROTECTION

Ambayat 1st, Bayambang's Cleanest Barangay for July

Nasungkit ng Barangay Ambayat 1st ang titulong Cleanest Barangay sa buwan ng Hulyo, at gaya ng naipangako ni Mayora Niña Quiambao, ay nakatanggap ng P15,000 cash ang barangay bilang parte ng programang “Bali-Bali’n Bayambang” ng kasalukuyang administrasyon. Congratulations, Brgy Ambayat 1st!

District 2, Dumalo sa Solid Waste IEC 

Tuluy-tuloy ang ESWMO-Bayambang sa kanilang information campaign kada buwan ukol sa RA 9003, at sa buwan ng Agosto, kanilang tinipon ang mga barangay officials mula sa District 2 sa Events Center. Kabilang sa mga tagapagsalita sina Environmental Management Specialists Luz Cayabyab at Eduardo Angeles Jr. ng ESWMO at Atty. Glee-ce Macaranas-Basco mula sa Public Attorney's Office.

DISASTER RESILIENCY

MRDDM Council, Pinaghandaan ang Bagyong 'Florita' 

Noong August 22, nagkaroon ng emergency meeting ang Bayambang Municipal Disaster Risk Reduction and Management Council sa pangunguna ni Mayor Niña Jose-Quiambao bilang paghahanda sa mga maaaring maging epekto ng bagyong Florita sa bayan ng Bayambang. Sa pulong ng MDRRM Council, idinetalye ni MDRRM Officer Genevieve Benebe ang mga hakbang na ginawa na ng opisina upang mapaghandaan ng mga barangay at mga Bayambangueño ang paparating na bagyo. 

MDRRM Council, Nagsagawa ng mga Paghahanda

Bilang paghahanda sa bagyong “Florita,” nagdeklara ng RED alert status ang Municipal Disaster Risk Reduction Management Council at nagdaos ng isang emergency meeting. Pagkatapos ay umikot naman ang MDRRMO staff sa iba’t-ibang barangay upang magmonitor ng mga lugar at sakahan na posibleng binabaha sa tulong ng mga barangay DRRM council at Agriculture Office. Nagsagawa rin sila ng clearing operation at monitoring ng lebel ng tubig sa Agno River. Pagkaraan ng bagyo ay nagsagawa rin ang MDRRMC ng isang post-assessment activity.

Bayambang, handa sa pagdating ng Bagyong Gardo at Henry

Bilang paghahanda sa pagdating ng Bagyong Gardo at Super Typhoon Henry, nag-inspeksyon ng mga evacuation center ang Municipal Disaster Risk Reduction and Management Council noong August 31, 2022. Ulat ni MDRRM Officer Genevieve U. Benebe, handa na ang mga pangunahing pangangailangan sa mga evacuation center katulad ng mga higaan at CR, kasama pa ang mga hygiene kits, pati na rin ang mga pagkain at tubig kung sakaling kailanganing lumikas doon.

AWARDS & RECOGNITION

RHU I, Top Performing Newborn Screening Facility 

Congratulations muli sa RHU I sa pagiging isa sa Top Performing Newborn Screening Primary Care Facilities sa buong Region I. Nakapagtala ang RHU ng 0.0% unsatisfactory rate para sa 2nd quarter ng taong 2022. 

LGU, Binigyan ng Pagkilala ng Red Cross

Isang "Pinabli Award" ang iginawad sa LGU-Bayambang ng Philippine Red Cross-Pangasinan Chapter noong August 12, matapos nitong makapagkolekta ng 465 bags ng dugo mula taong 2021 to 2022. Naging matagumpay ang bawat blood donation drive dahil sa masisipag na duktor at kawani ng health department at mga dahil sa malasakit sa kapwa ng bawat donor na Bayambangueño.

Bayambang's LPOC Rated as Functional 

Bayambang's Local Peace and Order Council has been rated as FUNCTIONAL by the DILG for the years 2019 and 2021.