Children's songs and poems in Pangasinan language

(From Santiago Villafania)

 

1. Wala'y manok kon Taras

 

Wala'y manok kon Taras

Bagsit ya melamelag

Bangno manotongtong ak

Siber-siber ed arap.

Taras kuan ko'd Taras

Anto'y binarungan mo'd siak,

Agta ka met binakbak

Dinuksan pinairap.

No komun ta maruksa ak

Man almusal ka'y bakbak,

Mangugto ka'y basibas,

Tan mandem ka'y litok-lipak.

Natan ta marunong ak

Man almusal kay gatas,

Mangugto ka'y broas,

Tan mandem ka'y entortas.

 

2. Saray Kabulongan

 

Mayakan bulong na talon

Ta pagawa takan payong,

Payong nen Nana Sion

Ya ompasiar ed kalongkong.

Mayakan bulong na kamatis

Ta pagawa takan tapis,

Tapis da'y mamarikit

Ya ompasiar ed paritpit.

Mayakan bulong na ponti

Ta pagawa takan kapoti

Kapoti ra'y babalolaki

Ya ompasiar ed Malasiqui.

Mayakan bulong na saleng

Ta pagawa takan ikamen,

Ikamen da'y mamasiken

Ya ompasiar ed Lingayen.

Mayakan bulong na kakaw

Ta pagawa takan ikaw,

Ikaw na akukulaw

Ya ompasiar ed Calasiao.

Mayakan bulong na palya

Ta pagawa takan tualya

Tualya ra'y kakastila

Ya ompasiar ed kalsada.

 

3. Limon

 

No siak so mangaro ed satan ya limgas mo

Agtaka paakseben no mayemyem so tiempo,

Say yurongan mon silya apisa'y panyolito,

Say dakatan mon datal mantilyasa'y aro.

No komun agita limon kan kakanen

lyan taka'd nguro'y dilak ya pantolin-tolinen,

Agtaka gatgaten, agtaka akmonen,

lyan ta ka'd nguro'y dilak ya amamayoen.

 

4. Balbalinong

 

Balbalinong tubo'd libsong

Amamayoen taka komon;

No oras la'y palbangon

Balingit mo'y masamsamyong.

 

5. Saray Tanaman

 

Masurin tua'y mangga

Ta mandokdokol et manbubunga,

Pobri balet si kayanga

Ta manrosas et natata.

Masurin tua'y ponti

Ta melmelag ni et mansisii,

Pobri balet si kamoti

Ta manrosas et ag onyari.

Masurin tua'y pantol

Ta bunga to'y nasisipor,

Pobri balet si talon

Ta bunga to'y kitaoytaoy.

 

6. Nantanem ak na Katuray

 

Nantanem ak na katuray

Dia'd gilig na baybay,

Kabangon ko'd kabuasan

Kulasisin mamangan.

Mayakan kulasisi

Ta patitan taka naani,

No naala taka'd sali

Bosis mo'y pakaskasi.

 

7. Kinamalab ak...

 

Kinmalab ak ed mabolo,

Inusilan ak na tuko,

Binalintuagan kon binambo,

Anta manaya si Laki Tiago.

Kinmalab ak ed mangga,

Inusilan ak na angga,

Binalintuagan kon pinika,

Anta si Laki Piro manaya.

 

8. Saray Manok Ko

 

Wala'y manok kon pogo

Nitan lan mangutdo-kutdo,

Agak ni akaluto

Ta amakan ak ni'y aso.

Wala'y manok kon sikling

Nitan lan mangiling-kiling,

Agak ni akapising

Ta amakan ak ni'y kuting.

Wala'y manok kon taras

Mantodtoon ed apayas,

Pitalaran ton onlabas

Si Rosing a malimlimgas.

 

9. Saray Pusan Masinan

 

Bulan-bulan katiban

Nia'y kanen mon lukban,

Sinakuban ko'y panganan

Kina'y pusan baklayan.

......

Nia'y kanen mon deremen,

Sinakuban ko'y ikamen

Kina'y pusan maermen.

Kankanti, kankanti

Nia'y kanen mon ponti,

Sinakuban ko'y kawali

Kina'y pusan amputi.

 

10. Binmasis si Tiki

 

Binmasis si tiki,

Inmukok si tuko,

Inbuldag to'y mata to.

Melag ed kabalgan,

Balbaleg ed ulo,

Tekepa'y pasman midio itikado.

Ta si gamayan balet et

Maistro'y gitara,

Kansionista'y tilay

Lapud duara'y dila.

Sinmayaw si patang

Manlukso, mantakba,

Akaeyag si tukak

Lapud agto amta.

 

11. Dalem na Dayat

 

Dalem na dayat so nanayaman ko

Ed loob na sakey bulan,

Akanengneng ak na sira-siran

Singara dagom kinakekelagan.

Apatiran urang so

Inter dan siraen ko

Kinamitan a bunor so,

Inter dan palamis ko.

Nen siak la'y ayadyari

Danum la'y kekerewen ko,

Say kuanen pating so,

"Ay! sikato ta'y anggapo."

 

12. Ed Dayat

 

Arasdasig ira'y beldat,

Nankapitan da'y igat,

Binmaliw ira'd dayat.

Alama, alama, alama,

Ongkurong makalkalna,

Bingalo, bingalo, bingalo,

Apikpiklo'y balangbang to.

 

13. Saray Sirasira

 

Aranuman lara'y kapasulan,

Aboyboyak lara'y urang,

Tinyinti ra'y Begsang,

Kapitan da'y Bulan-bulan.

Pantat, supok ka'd legma,

Ayungin, paritpit ka

Ta si Alalo nala'd taga.

Bang si Siwisiwi, lingoslingos manarawi,

Bang si Bulasi, onlemuas mitimiti;

Bang balet si Patang, onkogtot mantirakiang,

Bang balet si Bisukol, beneg to'y nibogkol.

 

14. Lirio

 

Nen sakey a labi siak so nankugip

Naplag ed pagew ko'y rosas ya maababig,

Rosas ya si pulana sikato'y akugkogip.

Rosas kan amputiputi, rosas kan ambalbalingit

Ya tinmubo'd man ed utel da'y sabi-sabit,

Deralen ka'y manok, deralen ka'y bigis

No siak so mangaro'd sika et agtaka padiwit.