Editorial - July 2023 - Pagkaing Masustansya, Gawing Abot-Kaya

Pagkaing Masustansya, Gawing Abot-Kaya

 

Sa patuloy na pagtaas ng bilihin ngayon, kailangan nating maging madiskarte sa buhay. Pagdating sa mapagkukunan ng makakain sa araw-araw, kailangan nating maging maparaan. Mabuti naman at ito ang napiling tema ngayon para sa Nutrition Month 2023 ng National Nutrition Council sapagkat ito ay naaakma.

Kaya naman ang Bayambang Municipal Nutrition Council ay naging puspusan ang pag-iisip ng mga pamamaraan kung paano makatutulong sa puntong ito.

Isa sa mga naisip na puwedeng gawin ay ang pagpapaigting ng backyard gardening na matagal nang isinusulong ng Quiambao-Sabangan administration. Nagkaroon pa nga ng nursery kada barangay upang masiguradong patuloy ang proyekto. Kailangan lamang na buhaying muli ang mga napabayaang taniman. Kung maaari, lahat ng bakanteng espasyo ay tamnan, at kung kinakailangang magtanim sa mga paso gamit ang recycled water bottles ay gawin ito. Kung talagang walang espasyo ay puwede namang subukan ang vertical gardening na usung-uso ngayon.

Maaari ring magtayo ang isang sambahayan ng mga punong maaaring igulay gaya ng malunggay na sagana sa mga bitamina, mineral, at maging protina. Mainam na isama na rin ang pagtatanim ng mga fruit-bearing trees upang libreng mapagkunan ng mga masasarap at masusustansyang prutas.

Kung may oras pa at espasyo ang pamilya, lalong mas makatutulong kung may alagang manok, pato, kambing, baboy, at baka bilang mapagkukunan ng libre at sariwang itlog, karne, at gatas.

Isa ring posibilidad ang magtayo ng isang small-scale backyard fishery upang makapagpalaki ng tilapia at hito na maaaring gawing ulam at pangbenta. Isa pa ay ang aquaponics na isang teknolohiya kung saan maaaring makapagtanim ng mga gulay nang walang gamit na lupa habang ang tubig na gamit pang-irigasyon ay may laman ding mga alagang isda.

Usung-uso rin ngayon sa social media (dito man o maging sa ibang bansa) ang foraging, kung saan sinusubukang ibalik ang sinaunang istilo ng paghahanap ng libre, masustansya, ngunit nakaligtaan nang mga pagkain. Ito ay ang pag-iikot sa mga parang at ilang na lugar upang maggapas ng mga tradisyunal na pagkaing tila nakalimutan na, kabilang ang mga herbs na itinuturing lamang natin na pagkain ng baboy ngunit sagana pala sa sustansiya gaya ng ngalub (purslane o Portulaca oleracea) na nagkalat sa mga bukirin ng Bayambang.

Kapag sumobra ang ating ani, maaari natin itong ibarter sa mga kapitbahay o sa social media para sa iba nating pangangailangan.

Sa pamamagitan ng mga istratehiyang ito, ang “healthy food ay magiging affordable for all,” gaya ng sabi ng tema ng taon.